ಮಕ್ಕಳ ಸಾಧನೆ ನೋಡಲು ಬಂದ ಪೋಷಕರಿಗೆ ನಿರಾಸೆ

ಕೋವಿಡ್–19 ಕಾರಣದಿಂದ, ಸಮಾರಂಭ ಆಯೋಜಿಸಿದ್ದ ಸಭಾಂಗಣದಲ್ಲಿ 100 ಮಂದಿಗೆ ಮಾತ್ರವೇ ಅವಕಾಶ ಕಲ್ಪಿಸಲಾಗಿತ್ತು. ಮಾಧ್ಯಮದವರು, ಪೋಷಕರು ಮೊದಲಾದವರಿಗೆ ಸೆಂಟ್ರಲ್ ಹಾಲ್‌ನಲ್ಲಿ ದೊಡ್ಡ ಪರದೆ ಅಳವಡಿಸಿ ಕಾರ್ಯಕ್ರಮದ ನೇರಪ್ರಸಾರದ ವ್ಯವಸ್ಥೆ ಮಾಡಲಾಗಿತ್ತು. ಆದರೆ, ಘಟಿಕೋತ್ಸವದ ಪ್ರಮುಖ ಘಟ್ಟವಾದ ಘಟಿಕೋತ್ಸವ ಭಾಷಣ, ಪದವಿ, ಚಿನ್ನದಪದಕಗಳ ಪ್ರದಾನ ಸಂದರ್ಭದಲ್ಲಿ ತಾಂತ್ರಿಕ ಕಾರಣದಿಂದಾಗಿ ನೇರಪ್ರಸಾರದಲ್ಲಿ ಅಡಚಣೆ ಉಂಟಾಯಿತು. ಅರ್ಧಂಬರ್ಧ ಮೂಡುತ್ತಿದ್ದ ದೃಶ್ಯಗಳು, ಸಭಾಂಗಣದಲ್ಲಿದ್ದವರಿಗೆ ಕಿರಿಕಿರಿ ಉಂಟು ಮಾಡಿತು.

ಸಮಸ್ಯೆ ಪರಿಹಾರಕ್ಕೆ ವಿಶ್ವವಿದ್ಯಾಲಯದ ಪ್ರತಿನಿಧಿಗಳು ಗಮನಹರಿಸಲೇ ಇಲ್ಲ! ಇದು ಪೋಷಕರ ಅಸಮಾಧಾನಕ್ಕೆ ಕಾರಣವಾಯಿತು. ‘ಇದು ವಿಶ್ವವಿದ್ಯಾಲಯದವರ ಬೇವಾಬ್ದಾರಿ’ ಎಂದು ಖಂಡಿಸಿದರು.

ಈ ವೇಳೆ ಮೊದಲ ರ‍್ಯಾಂಕ್‌ ಪಡೆದ ಸೃಷ್ಟಿ ಗ್ಯಾನಿ ಅವರ ಪೋಷಕ ಗುರು ಅಮರೇಂದ್ರ ರೆಡ್ಡಿ ಪುತ್ರಿ ಚಿನ್ನದ ಪದಕ ಪಡೆಯುವ ದೃಶ್ಯ ನೋಡಲಾಗದಿದ್ದಕ್ಕೆ ಭಾವುಕರಾದರು. ‘ಸಮಾರಂಭವನ್ನು ನೇರವಾಗಿ ವೀಕ್ಷಿಸಲು ಅವಕಾಶ ಸಿಗಲಿಲ್ಲ. ಇಲ್ಲಿ ನೇರಪ್ರಸಾರವೂ ಬರಲಿಲ್ಲ. ಜೀವನದಲ್ಲಿ ಸಿಗುವ ಅತ್ಯಂತ ಮಹತ್ವದ ಕ್ಷಣಗಳಿವು. ಅದನ್ನು ನೋಡಲಾಗಲಿಲ್ಲ. ಇದರಿಂದ ಬಹಳ ಬೇಸರವಾಯಿತು’ ಎಂದು ಪ್ರತಿಕ್ರಿಯಿಸಿದರು.