ಬೆಂಗಳೂರು: ಬೆಂಗಳೂರು ವಿಶ್ವವಿದ್ಯಾಲಯದ ಒಂಬತ್ತು ವಿದ್ಯಾರ್ಥಿ ನಿಲಯಗಳಿಗೆ ಅಗತ್ಯವಿದ್ದ ಹಾಸಿಗೆ–ದಿಂಬುಗಳ ಖರೀದಿಯಲ್ಲಿ ಅಕ್ರಮ ನಡೆದಿದೆ ಎಂಬ ಆರೋಪ ಕೇಳಿ ಬಂದಿದೆ.
ಪೂರೈಕೆಗೆ ಕರೆಯಲಾಗಿದ್ದ ಟೆಂಡರ್ನಲ್ಲಿ ಉಲ್ಲೇಖಿಸಲಾಗಿದ್ದ ಗುಣಮಟ್ಟವೂ ಇಲ್ಲ. ಪೂರೈಸುವುದಾಗಿ ತೋರಿಸಲಾಗಿದ್ದ ಹಾಸಿಗೆ–ದಿಂಬುಗಳ ಬದಲು ಕಳಪೆ ಗುಣಮಟ್ಟದ ಹಾಗೂ ಮಾರುಕಟ್ಟೆಯಲ್ಲಿ ಅತಿ ಕಡಿಮೆ ದರಕ್ಕೆ ಲಭ್ಯವಿರುವ ಹಾಸಿಗೆ–ದಿಂಬುಗಳನ್ನು ಪೂರೈಸಲಾಗಿದೆ.
ಹಾಸಿಗೆ ಮತ್ತು ದಿಂಬು ಖರೀದಿಸಲು 2021–22ನೇ ಸಾಲಿನಲ್ಲಿ ಟೆಂಡರ್ ಆಹ್ವಾನಿಸಲಾಗಿತ್ತು. 2022ರ ಫೆಬ್ರುವರಿ 3ರಂದು ನಡೆದ ತಾಂತ್ರಿಕ ಬಿಡ್ನಲ್ಲಿ ಅರ್ಹಗೊಂಡ ಸಂಸ್ಥೆಯಿಂದ ಪ್ರತಿ ಹಾಸಿಗೆಗೆ ₹5,900 ಮತ್ತು ಪ್ರತಿ ದಿಂಬಿಗೆ ₹650 ದರ ನಿಗದಿ ಮಾಡಲಾಗಿತ್ತು.
1,848 ಹಾಸಿಗೆ ಮತ್ತು 2,273 ದಿಂಬು ಪೂರೈಕೆಯ ಟೆಂಡರ್ಗೆ 2022ರ ಜೂನ್ 27ರಂದು ನಡೆದ ವಿಶ್ವವಿದ್ಯಾಲಯದ ಕೇಂದ್ರ ಖರೀದಿ ಸಮಿತಿ ಸಭೆಯಲ್ಲಿ ಅನುಮೋದನೆಯನ್ನೂ ನೀಡಲಾಗಿತ್ತು. ಇದಕ್ಕಾಗಿ ₹1.24 ಕೋಟಿ ಮೊತ್ತಕ್ಕೆ ಒಪ್ಪಿಗೆಯನ್ನೂ ನೀಡಿ, ಖರೀದಿಸಲು ಆದೇಶಿಸಲಾಗಿತ್ತು.