‘ಕೆ.ಆರ್. ವೃತ್ತದಲ್ಲಿರುವ ಸರ್ಕಾರಿ ಟೆಕ್ಸ್‌ಟೈಲ್‌ ಟೆಕ್ನಾಲಜಿ ವಿಭಾಗದ ಪ್ರಾಧ್ಯಾಪಕರು ಹಾಸಿಗೆ ಮತ್ತು ದಿಂಬುಗಳ ಗುಣಮಟ್ಟವನ್ನು ಪರಿಶೀಲಿಸಿದ್ದು, ಟೆಂಡರ್‌ನಲ್ಲಿ ಉಲ್ಲೇಖವಿರುವ ಗುಣಮಟ್ಟದಂತೆಯೇ ಪೂರೈಕೆ ಮಾಡಲಾಗಿದೆ’ ಎಂದು ವರದಿ ನೀಡಿದ್ದಾರೆ. 

‘ಮಾರುಕಟ್ಟೆಯಲ್ಲಿ ₹3 ಸಾವಿರಕ್ಕೆ ದೊರೆಯುವ ಹಾಸಿಗೆಗೆ ₹5,900 ಹಾಗೂ ₹150ಕ್ಕೆ ಸಿಗುವ ದಿಂಬಿಗೆ ₹650 ನೀಡಿ ಖರೀದಿಸಲಾಗಿದೆ’ ಎಂದು ವಿದ್ಯಾರ್ಥಿಗಳು ಆಪಾದಿಸಿದ್ದಾರೆ. ‘ಹಿಂದೆ ಗುಣಮಟ್ಟದ ಹಾಸಿಗೆ, ದಿಂಬುಗಳನ್ನು ನೀಡಲಾಗಿತ್ತು. ಇವು ಬಳಸಲಾಗದ ರೀತಿಯಲ್ಲಿವೆ. ಈ ಖರೀದಿ ಪ್ರಕ್ರಿಯೆಯಲ್ಲಿ ಅವ್ಯವಹಾರ ನಡೆದಿದೆ. ಈ ಬಗ್ಗೆ ಯಾರೂ ಪ್ರಶ್ನೆ ಮಾಡದಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಈ ಹಗರಣದ ಕುರಿತು ತನಿಖೆ ನಡೆಸಿ ತಪ್ಪಿತಸ್ಥರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು’ ಎಂದು ವಿದ್ಯಾರ್ಥಿಗಳು ಆಗ್ರಹಿಸಿದ್ದಾರೆ.

‘ಟೆಕ್ಸ್‌ಟೈಲ್‌ ಟೆಕ್ನಾಲಜಿ ವಿಭಾಗಕ್ಕೆ ಪರಿಶೀಲಿಸಲು ಗುಣಮಟ್ಟದ ಹಾಸಿಗೆ, ದಿಂಬುಗಳನ್ನೇ ನೀಡಲಾಗಿತ್ತು. ಆದರೆ, ಪೂರೈಕೆಯಾಗಿರುವ ಹಾಸಿಗೆ– ದಿಂಬುಗಳು ಸಂಪೂರ್ಣ ಕಳಪೆ ಗುಣಮಟ್ಟದಿಂದ ಕೂಡಿವೆ. ಈ ಬಗ್ಗೆ ತನಿಖೆಯಾಗದಿದ್ದರೆ ಲೋಕಾಯುಕ್ತಕ್ಕೆ ದೂರು ಸಲ್ಲಿಸಲಾಗುವುದು’ ಎಂದರು.