ಬೆಂಗಳೂರು: ರಾಜಾಜಿನಗರ ಪೊಲೀಸ್ ಠಾಣೆ ಮೇಲೆ ಲೋಕಾಯುಕ್ತ ಪೊಲೀಸರು ದಾಳಿ ಮಾಡಿದ್ದು, ₹ 50 ಸಾವಿರ ಲಂಚ ಪಡೆಯುತ್ತಿದ್ದ ಹೆಡ್‌ ಕಾನ್ಸ್ಟೆಬಲ್ ಆಂಜನೇಯ ಅವರನ್ನು ಬಂಧಿಸಿದ್ದಾರೆ.
‘ಹಲ್ಲೆ ಪ್ರಕರಣದಲ್ಲಿ ಬಿ–ರಿಪೋರ್ಟ್ ಸಲ್ಲಿಸಲು ₹ 50 ಸಾವಿರ ಲಂಚಕ್ಕೆ ಠಾಣೆಯ ಪೊಲೀಸರು ಬೇಡಿಕೆ ಇರಿಸಿದ್ದರು. ಈ ಸಂಬಂಧ ಸಲ್ಲಿಕೆಯಾದ ದೂರು ಆಧರಿಸಿ ಕಾರ್ಯಾಚರಣೆ ನಡೆಸಲಾಯಿತು. ಲಂಚ ಪಡೆಯುವಾಗಲೇ ಠಾಣೆಯ ಬರಹಗಾರನೂ ಆಗಿದ್ದ ಹೆಡ್‌ ಕಾನ್ಸ್ಟೆಬಲ್ ಆಂಜನೇಯ ಸಿಕ್ಕಿಬಿದ್ದ’ ಲೋಕಾಯುಕ್ತ ಪೊಲೀಸ್ ಮೂಲಗಳು ಹೇಳಿವೆ.
‘ಕಾರಿನ ವಿಚಾರವಾಗಿ ಮಹಿಳೆ ಹಾಗೂ ಸಾಗರ್–ಅವರ ತಂದೆ ನಡುವೆ ಗಲಾಟೆ ಆಗಿತ್ತು. ಹಲ್ಲೆ ಆರೋಪದಡಿ ಸಾಗರ್–ತಂದೆ ವಿರುದ್ಧ ಮಹಿಳೆ ದೂರು ನೀಡಿದ್ದರು. ಪ್ರಕರಣ ದಾಖಲಿಸಿಕೊಂಡಿದ್ದ ಪೊಲೀಸರು, ‘ನ್ಯಾಯಾಲಯಕ್ಕೆ ಬಿ–ರಿಪೋರ್ಟ್ ಸಲ್ಲಿಸಲಾಗುವುದು. ಇದಕ್ಕಾಗಿ ₹ 50 ಸಾವಿರ ಲಂಚ ನೀಡಬೇಕು’ ಎಂದು ಬೇಡಿಕೆ ಇರಿಸಿದ್ದರು. ಲಂಚದ ಸಂಬಂಧ ಸಾಗರ್ ದೂರು ನೀಡಿದ್ದರು.’
‘ಸಾಗರ್ ಅವರಿಂದ ಹೆಡ್‌ ಕಾನ್ಸ್ಟೆಬಲ್ ಆಂಜನೇಯ ₹ 50 ಸಾವಿರ ಲಂಚ ಪಡೆಯುತ್ತಿದ್ದ ಸಂದರ್ಭದಲ್ಲಿ ದಾಳಿ ಮಾಡಿ ಬಂಧಿಸಲಾಗಿದೆ’ ಎಂದು ಮೂಲಗಳು ತಿಳಿಸಿವೆ.
‘ಲಂಚದ ಪ್ರಕರಣದಲ್ಲಿ ಇನ್‌ಸ್ಪೆಕ್ಟರ್ ಲಕ್ಷ್ಮಣ್ ಗೌಡ ಹಾಗೂ ಪಿಎಸ್‌ಐ ಮಾರುತಿ ಪಾತ್ರವೂ ಇದೆ. ದಾಳಿ ಮಾಡುತ್ತಿದ್ದಂತೆ ಅವರಿಬ್ಬರು ತಲೆಮರೆಸಿಕೊಂಡಿದ್ದಾರೆ’ ಎಂದು ಮೂಲಗಳು ಹೇಳಿವೆ.
