ಸೋಮವಾರ, ಸೆಪ್ಟೆಂಬರ್ 20, 2021
29 °C

ಮಗು ಕದ್ದು ಮಾರಾಟ: ಮೂವರ ಬಂಧನ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಬೆಂಗಳೂರು: 38 ದಿನಗಳ ಮಗುವನ್ನು ಕದ್ದು ಮಾರಿದ್ದ ಆರೋಪದಡಿ ಮೂವರು ಆರೋಪಿಗಳನ್ನು ವಿಲ್ಸನ್‌ ಗಾರ್ಡನ್ ಪೊಲೀಸರು ಬಂಧಿಸಿದ್ದಾರೆ.

ತರುಣಮ್ ಬಾನು (38), ನಿಶಾತ್ ಕೌಶರ್ (35) ಹಾಗೂ ಕೆ.ಸವೋದ್ (51) ಬಂಧಿತರು.

‘ವಿಲ್ಸನ್‌ ಗಾರ್ಡನ್ ಠಾಣಾ ವ್ಯಾಪ್ತಿಯ ಅಗಡಿ ಆಸ್ಪತ್ರೆಯ ಬಳಿ ಹಣಕ್ಕಾಗಿ ಇಬ್ಬರು ಜಗಳವಾಡುತ್ತಿದ್ದ ಮಾಹಿತಿ ಪೊಲೀಸರಿಗೆ ಬಂದಿತ್ತು. ಸ್ಥಳಕ್ಕೆ ಭೇಟಿ ನೀಡಿದಾಗ ಪೊಲೀಸರನ್ನು ಕಂಡು ವ್ಯಕ್ತಿಯೊಬ್ಬ ಪರಾರಿಯಾದ. ಅಲ್ಲೇ ಇದ್ದ ತರುಣಮ್ ಬಾನುಳನ್ನು ಠಾಣೆಗೆ ಕರೆತಂದು ವಿಚಾರಣೆ ನಡೆಸಿದಾಗ, ಮಗು ಕದ್ದು ಮಾರಾಟ ಮಾಡಿರುವ ವಿಚಾರ ಹೇಳಿದಳು’ ಎಂದು ಪೊಲೀಸರು ತಿಳಿಸಿದರು.

‘ಪರಾರಿಯಾದ ಮುಬಾರಕ್ ಎನ್ನುವ ವ್ಯಕ್ತಿಗೆ ಮತ್ತು ಮಹಿಳೆಯೊಬ್ಬರಿಗೆ ಅಕ್ರಮ ಸಂಬಂಧವಿತ್ತು. ಅವರಿಗೆ ಈ ಮಗು ಜನಿಸಿತ್ತು. 15 ವರ್ಷಗಳಿಂದ ಮಕ್ಕಳಿಲ್ಲದ ಸಮಸ್ಯೆ ಎದುರಿಸುತ್ತಿದ್ದ ಸವೋದ್‌ಗೆ ಮಗುವನ್ನು ಮಾರಾಟ ಮಾಡಲು ಸಂಚು ರೂಪಿಸಿದ್ದರು. ಇದಕ್ಕಾಗಿ ತರುಣಮ್, ಮುಬಾರಕ್‌ ಹಾಗೂ ನಿಶಾತ್ ಸೇರಿ ತಾಯಿಗೆ ತಿಳಿಯದಂತೆ ಮಗುವನ್ನು ಕದ್ದಿದ್ದರು. ಸವೋದ್‌ಗೆ ₹1.30 ಲಕ್ಷಕ್ಕೆ ಮಗುವನ್ನು ಮಾರಿ, ಮುಂಗಡವಾಗಿ ₹50 ಸಾವಿರ ಹಣ ಪಡೆದಿದ್ದರು’ ಎಂದು ವಿವರಿಸಿದರು.

‘ಆರೋಪಿ ತರುಣಮ್ ನೀಡಿದ ಮಾಹಿತಿ ಮೇರೆಗೆ ಸವೋದ್‌ನನ್ನು ಬಂಧಿಸಲಾಯಿತು. ಮಗುವನ್ನು ರಕ್ಷಿಸಿ ತಾಯಿಗೆ ಹಸ್ತಾಂತರಿಸಲಾಗಿದೆ. ಮುಂಗಡವಾಗಿ ನೀಡಿದ ₹50 ಸಾವಿರ ಜಪ್ತಿ ಮಾಡಲಾಗಿದ್ದು, ತಲೆಮರೆಸಿಕೊಂಡಿರುವ ಮುಬಾರಕ್‌ನ ಪತ್ತೆ ಕಾರ್ಯ ಮುಂದುವರಿದಿದೆ’ ಎಂದೂ ಹೇಳಿದರು.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು