ದಾಬಸ್ ಪೇಟೆ: ಮಹಿಳೆ ಮೇಲೆ ಚಿರತೆ ದಾಳಿ

ಅಮ್ಮಯ್ಯ (55) ಚಿರತೆ ದಾಳಿಗೆ ಒಳಗಾದವರು. ಗಾಯಗೊಂಡಿದ್ದ ಅವರಿಗೆ ಚಿಕಿತ್ಸೆ ಕೊಡಿಸಲಾಗಿದೆ. ಈ ಘಟನೆಯಿಂದ ಹೋಬಳಿಯ ಜನ ಭಯಭೀತರಾಗಿದ್ದಾರೆ.

’ಸಮೀಪದ ತೊರೆಹಳ್ಳದ ಪಕ್ಕದಲ್ಲಿ ಎಂದಿನಂತೆ ಹಸು, ಮೇಕೆಗಳನ್ನು ಮೇಯಿಸುತಿದ್ದೆ. ಏಕಾಏಕಿ ಚಿರತೆ ಮೇಕೆಗಳ ಮೇಲೆ ದಾಳಿ ನಡೆಸಿತು. ಮೇಕೆಗಳು ತಪ್ಪಿಸಿಕೊಂಡು ಓಡಿ ಹೋದವು. ಆಗ ಚಿರತೆ ನನ್ನ ಮೇಲೆ ದಾಳಿ ಮಾಡಿತು. ಗಾಬರಿಗೊಂಡು ಜೋರಾಗಿ ಕೂಗಿದೆ. ಅಕ್ಕಪಕ್ಕದ ಜಮೀನುಗಳಲ್ಲಿದ್ದ ರೈತರು ಕೂಗುತ್ತಾ ಓಡಿ ಬಂದರು. ಚಿರತೆ ಓಡಿಹೋಯಿತು. ಜನ ಬರುವುದು ತಡವಾಗಿದ್ದರೆ ನನ್ನ ಪ್ರಾಣ ಉಳಿಯುತ್ತಿರಲಿಲ್ಲ’ ಎಂದು ಚಿರತೆ ದಾಳಿಯ ಬಗ್ಗೆ ಅಮ್ಮಯ್ಯ ವಿವರಿಸಿದರು.

ನೆಲಮಂಗಲ ತಾಲ್ಲೂಕಿನ, ಸೋಂಪುರ ಹೋಬಳಿಯಲ್ಲಿ ಚಿರತೆ ಹಾವಳಿ ದಿನೇ ದಿನೇ ಹೆಚ್ಚುತ್ತಿದ್ದು, ಚಿರತೆ ಓಡಾಡುವ ದೃಶ್ಯಗಳು ಸಿಸಿಟಿವಿ ಕ್ಯಾಮೆರಾದಲ್ಲಿ ಸರಿಯಾಗಿವೆ. ಈ ಬಗ್ಗೆ ಹಲವು ಬಾರಿ ಅರಣ್ಯ ಅಧಿಕಾರಿಗಳಿಗೆ ದೂರು ನೀಡಿದ್ದರು ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸುತ್ತಿಲ್ಲ ಎಂದು ಸಾರ್ವಜನಿಕರು ದೂರುತ್ತಾರೆ.