ಬೆಂಗಳೂರು:ಬಿಎಚ್ಇಎಲ್ (ರೆಮ್ಕೊ) ಎಂಪ್ಲಾಯಿಸ್ ಹೌಸ್ ಬಿಲ್ಡಿಂಗ್ ಕೊ– ಆಪರೇಟಿವ್ ಸೊಸೈಟಿಯುರಿಯಲ್ ಎಸ್ಟೇಟ್ ನಿಯಂತ್ರಣ ಮತ್ತು ಅಭಿವೃದ್ಧಿ ಕಾಯ್ದೆಯ (ರೇರಾ) ನಿಯಮಗಳನ್ನು ಉಲ್ಲಂಘಿಸಿ ಎಲೆಕ್ಟ್ರಾನಿಕ್ ಸಿಟಿಯಲ್ಲಿ ಬಡಾವಣೆ ಅಭಿವೃದ್ಧಿಪಡಿಸಿದೆ. ಅಲ್ಲದೆ, ನಿಯಮಬಾಹಿರವಾಗಿ ನಿವೇಶನಗಳನ್ನು ಹಂಚಿಕೆ ಮಾಡಲಾಗುತ್ತಿದೆ ಎಂದು ಸೊಸೈಟಿ ಸದಸ್ಯರೇ ಆರೋಪಿಸಿದ್ದಾರೆ.
ಆದರೆ, ಸೊಸೈಟಿ ಚುನಾವಣೆ ಸಂದರ್ಭದಲ್ಲಿ ಪದೇ ಪದೇ ಈ ರೀತಿ ಸುಳ್ಳು ಆರೋಪ ಮಾಡಲಾಗುತ್ತದೆ ಎಂದು ಸಂಘದ ಅಧ್ಯಕ್ಷ ವಿಜಯ್ಕುಮಾರ್ ಪ್ರತಿಕ್ರಿಯಿಸಿದ್ದಾರೆ.
ನಿಯಮ ಉಲ್ಲಂಘನೆ:‘ಯಾವುದೇ ಹೌಸಿಂಗ್ ಸೊಸೈಟಿಯು ಬಡಾವಣೆ ಅಭಿವೃದ್ಧಿ ಪಡಿಸುವಾಗ ರೇರಾದಲ್ಲಿ ನೋಂದಣಿ ಮಾಡಿಸಬೇಕು. ಎಲ್ಲದಕ್ಕೂ ಪರವಾನಗಿ ಪಡೆಯಬೇಕು. ಆದರೆ, ಬಿಎಚ್ಇಎಲ್ ರೆಮ್ಕೊ ಹೌಸಿಂಗ್ ಸೊಸೈಟಿಯು ಈ ಯಾವ ಪರವಾನಗಿ
ಯನ್ನೂ ಪಡೆಯದೆ, ಬಡಾವಣೆ ಅಭಿವೃದ್ಧಿಪಡಿಸಿ, ನಿವೇಶನಗಳನ್ನು ಹಂಚಿಕೆ ಮಾಡುತ್ತಿದೆ’ ಎಂದು ಸೊಸೈಟಿ ಸದಸ್ಯ ಅಶೋಕ್ ಕುಳ್ಳಿ ಆರೋಪಿಸಿದ್ದಾರೆ.
‘ಸಂಘದ ಸದಸ್ಯರಲ್ಲದವರಿಗೂ ನಿವೇಶನಗಳನ್ನು ಮಾರಾಟ ಮಾಡಲಾಗಿದೆ. ಸೊಸೈಟಿಯ ಚಟುವಟಿಕೆಯಲ್ಲಿ ವ್ಯಾಪಕ ಅಕ್ರಮ ನಡೆದಿದೆ’ ಎಂದು ಆರೋಪಿಸಿ ಬಿಎಚ್ಇಎಲ್ ನೌಕರರೂ ಆಗಿರುವ ಅಶೋಕ್ ದೂರಿದರು.
‘ಬೆಂಗಳೂರು ದಕ್ಷಿಣ ತಾಲ್ಲೂಕಿನ ಪಟ್ಟಣಗೆರೆಯಲ್ಲಿಯೂ ಇದೇ ಸೊಸೈಟಿ ಲೇಔಟ್ ಮಾಡಿದೆ. ಆದರೆ, ನನಗೆ ನಿವೇಶನ ನೀಡಿಲ್ಲ. ನಿವೇಶನ ನೀಡುವಂತೆ ಹೈಕೋರ್ಟ್ ಹೇಳಿದ್ದರೂ ಈವರೆಗೆ ನೀಡಿಲ್ಲ’ ಎಂದೂ ಅವರು ದೂರಿದರು.
ಚುನಾವಣೆ ವೇಳೆ ಸಾಮಾನ್ಯ:‘ಎಲೆಕ್ಟ್ರಾನಿಕ್ ಸಿಟಿಯಲ್ಲಿ ಅಭಿವೃದ್ಧಿಪಡಿಸಿರುವ ಲೇಔಟ್ ನಿರ್ಮಾಣ ಕಾರ್ಯ ಆರಂಭವಾಗಿದ್ದು 2004ರಲ್ಲಿ. 2006ರಲ್ಲಿ ಯೋಜನೆ ಮುಗಿದ ನಂತರ ಬಿಎಂಆರ್ಡಿಎದಿಂದ ಎಲ್ಲ ಅನುಮೋದನೆ ಪಡೆಯಲಾಗಿದೆ. ಇದರಲ್ಲಿ ಶೇ 40ರಷ್ಟು ನಿವೇಶನಗಳನ್ನು ಸೊಸೈಟಿ ಸದಸ್ಯರಿಗೆ ಮಂಜೂರು ಮಾಡಲಾಗಿದೆ’ ಎಂದು ವಿಜಯ್ಕುಮಾರ್ ಹೇಳಿದರು.
‘2016ರ ನಂತರ ರೇರಾ ಕಾಯ್ದೆ ಜಾರಿಯಾಗಿದೆ. ಈ ಕಾಯ್ದೆಯಲ್ಲಿ ಕೆಲವು ವಿನಾಯ್ತಿಗಳನ್ನು ಘೋಷಿಸಲಾಗಿದೆ.ಸ್ಥಳೀಯ ಯೋಜನಾ ಪ್ರಾಧಿಕಾರ ರೂಪಿಸಿರುವ ನಿಯಮದ ಅನುಸಾರ ಸಿಎ ನಿವೇಶನಗಳು, ಉದ್ಯಾನ, ರಸ್ತೆಗಳನ್ನು ಒಳಗೊಂಡಂತೆ ಯಾವುದೇ ಬಡಾವಣೆಯನ್ನು ನಿರ್ಮಿಸಿದ್ದರೆ, ಅದು ರೇರಾ ಕಾಯ್ದೆಯಡಿ ಬರುವುದಿಲ್ಲ. ಈ ವಿನಾಯ್ತಿಯನ್ನೇ ನಾವು ಪ್ರಾಧಿಕಾರದಿಂದ ಕೇಳುತ್ತಿದ್ದೇವೆ. ಬುಧವಾರ ಈ ಕುರಿತು ರೇರಾ ವಿಚಾರಣೆ ನಡೆಸಲಿದ್ದು, ನಮ್ಮ ವಕೀಲರು ವಾದ ಮಂಡಿಸಲಿದ್ದಾರೆ’ ಎಂದು ತಿಳಿಸಿದರು.
‘ಭಾನುವಾರ (ಫೆ.23) ಸೊಸೈಟಿಯ ನಿರ್ದೇಶಕ ಮಂಡಳಿಗೆ ಚುನಾವಣೆ ನಡೆಯಲಿದೆ. ನಮ್ಮ ಘನತೆಗೆ ಚ್ಯುತಿ ತರುವ ಉದ್ದೇಶದಿಂದ ಚುನಾವಣೆ ವೇಳೆ ಈ ರೀತಿ ಆರೋಪ ಮಾಡಲಾಗುತ್ತಿದೆ’ ಎಂದೂ ಅವರು ದೂರಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.