Varamahalakshmi Festival 2023 | ಗಗನಕ್ಕೇರಿದ ಹೂವಿನ ದರ

ಕೆ.ಆರ್.ಮಾರುಕಟ್ಟೆ, ಮಲ್ಲೇಶ್ವರ, ಯಶವಂತಪುರ, ಜಯನಗರ, ಶಿವಾಜಿನಗರದ ಮಾರುಕಟ್ಟೆ ಪ್ರದೇಶಗಳಲ್ಲಿನ ರಸ್ತೆ ಇಕ್ಕೆಲಗಳಲ್ಲಿ ನಡೆದಾಡಲು ಕಷ್ಟವಾಗುವಷ್ಟು ಗ್ರಾಹಕರು ಜಮಾಯಿಸಿದ್ದರು. ಇದರಿಂದ, ಸಂಚಾರ ದಟ್ಟಣೆಯುಂಟಾಗಿ ವಾಹನ ಸವಾರರು ಪರದಾಡಬೇಕಾಯಿತು.

ವರಮಹಾಲಕ್ಷ್ಮಿ ಹಬ್ಬದಂದು ಮನೆಗಳಲ್ಲಿ ಲಕ್ಷ್ಮಿ ಮೂರ್ತಿಗಳನ್ನು ಕೂರಿಸಿ, ಪೂಜಿಸುವುದು ವಾಡಿಕೆ. ಈ ವೇಳೆ ಅಲಂಕಾರಕ್ಕಾಗಿ ತರಹೇವಾರಿ ಹೂಗಳು ಮತ್ತು ಹಣ್ಣನ್ನು ಬಳಸುತ್ತಾರೆ. ಹಾಗಾಗಿ, ಪ್ರತಿ ವರ್ಷದಂತೆ ಈ ಬಾರಿಯೂ ಹೂವು ಮತ್ತು ಹಣ್ಣಿನ ದರಗಳಲ್ಲಿ ಏರಿಕೆಯಾಗಿದೆ.

ಹೂಗಳು ಗಗನಮುಖಿ: ‘ರಾಜ್ಯದಲ್ಲಿ ಮಳೆ ಕೊರತೆಯಿಂದ ಮಾರುಕಟ್ಟೆಗೆ ಹೂವುಗಳ ಆವಕ ಕಡಿಮೆಯಾಗಿದ್ದು, ದರ ದುಬಾರಿಯಾಗಿದೆ. ಈ ಹಬ್ಬದಲ್ಲೇ ಹೂವಿನ ಬೆಳೆಗಾರರು ಮತ್ತು ವರ್ತಕರು ಸ್ವಲ್ಪ ಲಾಭ ಕಾಣುತ್ತಾರೆ’ ಎಂದು ಕೆ.ಆರ್.ಮಾರುಕಟ್ಟೆಯ ಹೂವಿನ ವರ್ತಕರಾದ ಗಂಗಾ ಮತ್ತು ಸುರೇಶ್ ಮಾಹಿತಿ ನೀಡಿದರು.

‘ಈ ಬಾರಿಯ ವರಮಹಾಲಕ್ಷ್ಮಿ ಹಬ್ಬದ ಸಂದರ್ಭದಲ್ಲಿ ಮಲ್ಲಿಗೆ  ಕೆ.ಜಿ.ಗೆ ₹1 ಸಾವಿರ ಮತ್ತು ಕನಕಾಂಬರದ ಗರಿಷ್ಠ ದರ ಪ್ರತಿ ಕೆ.ಜಿ.ಗೆ ₹2 ಸಾವಿರ ಇದೆ. ಸೇವಂತಿಗೆ ₹ 200, ಗುಲಾಬಿ ₹ 250, ಸುಗಂಧರಾಜ ₹300ರಂತೆ ಮಾರಾಟವಾಗುತ್ತಿವೆ’ ಎಂದು ತಿಳಿಸಿದರು.

ಹಬ್ಬದಲ್ಲಿ ಲಕ್ಷ್ಮಿ ಪೂಜೆಯ ವೇಳೆ ವಿವಿಧ ಬಗೆಯ ಹಣ್ಣುಗಳನ್ನು ಜೋಡಿಸುವುದರಿಂದ ಹಣ್ಣುಗಳ ದರ ಸ್ವಲ್ಪ ಏರಿಕೆಯಾಗಿದೆ. ತರಕಾರಿಗಳಲ್ಲಿ ಕೆಲವು ತರಕಾರಿಗಳ ಬೆಲೆಯಲ್ಲಿ ಏರಿಳಿತವಾಗಿದೆ. ಉಳಿದ ತರಕಾರಿ ದರಗಳು ಸ್ಥಿರವಾಗಿವೆ. ಸೊಪ್ಪಿನ ಬೆಲೆಯೂ ಕಡಿಮೆಯಾಗಿದೆ.

‘ಬೆಂಗಳೂರು, ತುಮಕೂರು, ಕುಣಿಗಲ್, ಶಿವಮೊಗ್ಗ, ಮೈಸೂರು ಮುಂತಾದ ಕಡೆಗಳಿಂದ ನಗರದ ಮಾರುಕಟ್ಟೆಗಳಿಗೆ ಹೂವು ಪೂರೈಕೆಯಾಗುತ್ತದೆ. ಮಳೆ ಕೊರತೆ ಕಾರಣ ಹೂವುಗಳು ಆವಕ ಕಡಿಮೆಯಾಗಿದೆ. ಇದರಿಂದ ತಾಜಾ ಹೂವಿನ ಪೂರೈಕೆಗೂ ತೊಂದರೆಯಾಗಿದೆ. ಹಬ್ಬಗಳು ಆರಂಭವಾಗಿರುವುದರಿಂದ ಹೂವಿಗೆ ಬೇಡಿಕೆ ಹೆಚ್ಚು. ಈ ಕಾರಣಕ್ಕೆ ದರದಲ್ಲಿ ಭಾರಿ ಏರಿಕೆಯಾಗಿದೆ’ ಎಂದು ಕೆ.ಆರ್. ಮಾರುಕಟ್ಟೆಯ ಹೂವಿನ ವ್ಯಾಪಾರಿಗಳು ತಿಳಿಸಿದರು.

ಹೂವುಗಳ ದರ ಪ್ರತಿ ಕೆಜಿಗೆ (₹ಗಳಲ್ಲಿ)

ಕಳೆದ ವಾರ;ಈ ವಾರ ಮಲ್ಲಿಗೆ;500;1000 ಗುಲಾಬಿ;150;250 ಸೇವಂತಿಗೆ;150;200 ಕನಕಾಂಬರ;1200;2000 ಸುಗಂಧರಾಜ;100;300 –– ಹಣ್ಣುಗಳ ದರ ಪ್ರತಿ ಕೆ.ಜಿಗೆ ಸೇಬು;150;220 ದಾಳಿಂಬೆ 50;100 ಏಲಕ್ಕಿ ಬಾಳೆ;80;100 ಸೀತಾಫಲ;80;120 ಸಪೋಟ;80;120 –– ತರಕಾರಿ ದರಗಳು ಪ್ರತಿ ಕೆಜಿಗೆ ಬಟಾಣಿ;120;160 ಕ್ಯಾರೆಟ್‌;50;40 ಕ್ಯಾಪ್ಸಿಕಮ್;40;60 ಈರುಳ್ಳಿ;25;35 ಬೀನ್ಸ್;50;60 ಟೊಮೆಟೊ;80;30 ಆಲೂಗಡ್ಡೆ;25;30 ಹಿರೇಕಾಯಿ;50;60 ಚವಳಿಕಾಯಿ;40;60 ಕಾಪ್ಸಿಕಮ್‌;50;60 ಕ್ಯಾರೆಟ್‌;60;40 ಮೆಣಸಿನಕಾಯಿ;120;100 ಬೆಳ್ಳುಳ್ಳಿ;200;160 ಬೀನ್ಸ್‌;80;60 –– ಬಾಳೆಕಂಬ ಜೋಡಿಗೆ;50 ಮಾವಿನ ತೋರಣ;20 100 ವೀಳ್ಯೆದೆಲೆಗೆ;150 5 ತೆಂಗಿನಕಾಯಿಗೆ;100