ಪ್ರಧಾನ ಮಂತ್ರಿ ಸ್ವ-ನಿಧಿ ಯೋಜನೆ: ಬೀದಿಬದಿ ವ್ಯಾಪಾರಸ್ಥರ ಬದುಕಿಗೆ ಆಸರೆ

ಕಲಬುರಗಿ ವಿಭಾಗ ಮಟ್ಟದಲ್ಲಿ ಇಲ್ಲಿನ ನಗರಸಭೆ ಮಾತ್ರ ಈ ಪ್ರಶಸ್ತಿಗೆ ಭಾಜನವಾಗಿದೆ. ಆಗಸ್ಟ್ 22ರಂದು ಬೆಂಗಳೂರಿನ ವಿಕಾಸ ಸೌಧದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ವೈದ್ಯಕೀಯ ಶಿಕ್ಷಣ, ಕೌಶಲ್ಯಾಭಿವೃದ್ಧಿ ಮತ್ತು ಉದ್ಯಮಶೀಲತೆ, ಜೀವನೋಪಾಯ ಸಚಿವ ಡಾ.ಶರಣ ಪ್ರಕಾಶ ಪಾಟೀಲ ಪ್ರಶಸ್ತಿ ಪ್ರದಾನ ಮಾಡಿದರು. ಪೌರಾಯುಕ್ತ ರಾಜೀವ ಬಣಕಾರ್, ಸಂಪನ್ಮೂಲ ವ್ಯಕ್ತಿಗಳಾದ ಜ್ಯೋತಿ ರಘು, ರಾಣಿ ವಡ್ಡೆ, ಸರಸ್ವತಿ ಅಮರಪಾಲ್ ಪ್ರಶಸ್ತಿ ಸ್ವೀಕರಿಸಿದ್ದಾರೆ.

ರಾಷ್ಟ್ರೀಯ ಜೀವನೋಪಾಯ ಅಭಿಯಾನದ ಅಡಿಯಲ್ಲಿ ವ್ಯಾಪಾರಸ್ಥರನ್ನು ಸ್ವಾವಲಂಬಿಗಳನ್ನಾಗಿ ಮಾಡುವುದೇ ಈ ಯೋಜನೆಯ ಧ್ಯೇಯೋದ್ದೇಶವಾಗಿದೆ. ಬೀದಿಬದಿ ವ್ಯಾಪಾರಸ್ಥರಿಗೆ ಸ್ವಂತ ಮನೆ, ಸ್ವಂತ ಅಂಗಡಿ, ವ್ಯಾಪಾರಕ್ಕಾಗಿ ಜಾಗ ಇರುವುದಿಲ್ಲ. ತಳ್ಳು ಬಂಡಿ, ಬುಟ್ಟಿ, ಚಾಪೆಯ ಮೇಲೆ ಅಲ್ಪಸ್ವಲ್ಪ ತರಕಾರಿ, ಹಣ್ಣು, ತಿನಿಸು, ಅಲ್ಲದೆ ವಿವಿಧ ಸಾಮಾನುಗಳನ್ನು ಹರಡಿಕೊಂಡು ಇಡೀ ದಿನ ಅತ್ತಿಂದಿತ್ತ ಓಡಾಡುತ್ತಾರೆ. ಲಾಭವೂ ಅಷ್ಟಕ್ಕಷ್ಟೇ, ಕುಟುಂಬಕ್ಕೆ ಎರಡು ಹೊತ್ತಿನ ಊಟವೂ ಸಿಗದಂಥ ಪರಿಸ್ಥಿತಿ ಇದೆ. ಅಂಥವರ ಬದುಕಿಗೆ ಈ ಯೋಜನೆ ಆಸರೆಯಾಗಿದೆ.

‘ಸಾಮಾನ್ಯ ಜನರು ಆರ್ಥಿಕವಾಗಿ ಸದೃಢರಾಗಲಿ ಎಂಬ ಸದುದ್ದೇಶದಿಂದ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಸ್ವ-ನಿಧಿ ಯೋಜನೆ ಆರಂಭಿಸಿದ್ದಾರೆ. ನಗರಸಭೆ ಬರೀ ನಾಗರಿಕ ಸೌಲಭ್ಯ ನೀಡುವುದಕ್ಕೆ ಅಷ್ಟೇ ಅಲ್ಲ, ಈ ಯೋಜನೆಯ ಅನುಷ್ಠಾನದಲ್ಲಿಯೂ ಹೆಚ್ಚಿನ ಕಾಳಜಿ ವಹಿಸುತ್ತಿದೆ’ ಎಂದು ಪೌರಾಯುಕ್ತ ರಾಜೀವ ಬಣಕಾರ್ ತಿಳಿಸಿದ್ದಾರೆ.

‘2023-24ನೇ ಸಾಲಿನಲ್ಲಿ ನಗರದ 1,090 ಫಲಾನುಭವಿಗಳಿಗೆ ಸಾಲ ಸೌಲಭ್ಯ ಒದಗಿಸಲಾಗಿದೆ’ ಎಂದು ನಗರಸಭೆ ಸಮುದಾಯ ಸಂಘಟಕ ಶಿವಕುಮಾರ ರಾಗಾ ತಿಳಿಸಿದ್ದಾರೆ.

‘ತರಕಾರಿ, ಬಟ್ಟೆ, ಹಣ್ಣು ಮಾರಾಟಗಾರರು ಹಾಗೂ ಕಿರಾಣಿ ಅಂಗಡಿಯವರನ್ನು ಹುಡುಕಿಕೊಂಡು ಹೋಗಿ ಸಾಲ ಸೌಲಭ್ಯ ನೀಡಿದ್ದೇವೆ. ಪ್ರಥಮ ಹಂತದಲ್ಲಿ ₹10 ಸಾವಿರ, ನಂತರದಲ್ಲಿ ₹20 ಸಾವಿರ, ಅದಾದ ಮೇಲೆ ಇನ್ನೂ ಹೆಚ್ಚಿನ ಸಾಲ ದೊರಕಿಸಿ ಕೊಡಲಾಗಿದೆ’ ಎಂದು ಸಂಪನ್ಮೂಲ ವ್ಯಕ್ತಿ ಜ್ಯೋತಿ ರಘು ತಿಳಿಸಿದ್ದಾರೆ.

‘ಸಾಲ ಸೌಲಭ್ಯದ ಜೊತೆಗೆ ಪಡಿತರ ಚೀಟಿ ಮತ್ತು ಕಾರ್ಮಿಕರ ಗುರುತಿನ ಚೀಟಿಗಳನ್ನು ಸಹ ಮಾಡಿಸಿ ಕೊಡಲಾಗಿದೆ. ಇದಲ್ಲದೆ ಸರ್ಕಾರದ ವಿವಿಧ ಯೋಜನೆಗಳ ಬಗ್ಗೆಯೂ ಜನಸಾಮಾನ್ಯರಿಗೆ ಮಾಹಿತಿ ನೀಡಲಾಗಿದೆ’ ಎಂದು ಸಂಪನ್ಮೂಲ ವ್ಯಕ್ತಿಗಳಾದ ರಾಣಿ ವಡ್ಡೆ ಹಾಗೂ ಸರಸ್ವತಿ ಅಮರಪಾಲ್ ಮಾಹಿತಿ ನೀಡಿದ್ದಾರೆ.