ಔರಾದ್: ಬಿಸಿಲಿನ ಝಳಕ್ಕೆ ಚುನಾವಣೆ ಸಿಬ್ಬಂದಿ ತತ್ತರ

ಔರಾದ್ ಹಾಗೂ ಕಮಲನಗರ ಸೇರಿ ಒಟ್ಟು 255 ಬೂತ್ ವ್ಯವಸ್ಥೆ ಮಾಡಲಾಗಿದೆ. ಇದಕ್ಕಾಗಿ ಮತಗಟ್ಟೆ ಹಾಗೂ ಸಹಾಯಕ ಮತಗಟ್ಟೆ ಅಧಿಕಾರಿ ಸೇರಿ 279 ಸಿಬ್ಬಂದಿ ನೇಮಕ ಮಾಡಲಾಗಿದೆ. ಮತಗಟ್ಟೆಗೆ ಸಿಬ್ಬಂದಿ ಸಾಗಿಸಲು ಒಟ್ಟು 40 ಬಸ್ ಹಾಗೂ 7 ಜೀಪ್ ವ್ಯವಸ್ಥೆ ಮಾಡಲಾಗಿದೆ. ಮತಗಟ್ಟೆಗೆ ತೆರಳಬೇಕಾದ ಸಿಬ್ಬಂದಿ ಇಲ್ಲಿಯ ಅಮರೇಶ್ವರ ಕಾಲೇಜಿನಲ್ಲಿ ಬೆಳಿಗ್ಗೆಯೇ ಬಂದಿದ್ದಾರೆ. ಬಂದವರಿಗೆ ಕೂರಲು ಟೆಂಟ್ ವ್ಯವಸ್ಥೆ ಮಾಡಿದರೂ ಬಿಸಲಿನ ಝಳದಿಂದ ತಪ್ಪಿಸಿಕೊಳ್ಳಲು ಸಾಧ್ಯವಾಗಿಲ್ಲ.

‘ನಾವು ಈ ಹಿಂದೆ ಅನೇಕ ಚುನಾವಣೆ ನೋಡಿದ್ದೇವೆ. ಆದರೆ ಇಂತಹ ಪರಿ ಉರಿ ಬಿಸಿಲು ಎಂದೂ ಕಂಡಿಲ್ಲ. ಎರಡು ದಿನ ಹೇಗೆ ಕಳೆಯಬೇಕು? ಎಂದು ಚುನಾವಣೆ ಕರ್ತವ್ಯ ನಿರತ ಸಿಬ್ಬಂದಿ ಹೇಳಿಕೊಂಡಿದ್ದಾರೆ. ಮತದಾನ ಕೇಂದ್ರಗಳಿಗೆ ಹೊರಡುವ ಮುನ್ನ ಎಲ್ಲ ಸಿಬ್ಬಂದಿಗೆ ಇಲ್ಲಿ ಊಟದ ವ್ಯವಸ್ಥೆ ಮಾಡಲಾಗಿದೆ. ಆದರೆ ಬಿಸಿಲಿನ ತಾಪಕ್ಕೆ ಹೆದರಿ ಅನೇಕರು ಮಜ್ಜಿಗೆ ಕುಡಿದು ಹೊರಟು ಹೋದರು.

‘ನಿನ್ನೆಕ್ಕಿಂತ ಇಂದು ಬಿಸಿಲು ಜಾಸ್ತಿ ಇದೆ. ಕರ್ತವ್ಯ ಜತೆ ತಮ್ಮ ಆರೋಗ್ಯದ ಕಡೆಗೂ ಗಮನ ಹರಿಸಿ‘ ಎಂದು ಸ್ಥಳಕ್ಕೆ ಭೇಟಿ ನೀಡಿದ ಜಿಲ್ಲಾಧಿಕಾರಿ ಗೋವಿಂದರೆಡ್ಡಿ, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಚನ್ನಬಸವಣ್ಣ ಎಸ್.ಎಲ್. ಸಲಹೆ ನೀಡಿದರು.

‘ಬಿಸಿಲು ಹೆಚ್ಚಿರುವುದರಿಂದ ಎಲ್ಲ ಮತಗಟ್ಟೆಗಳಲ್ಲಿ ಕುಡಿಯುವ ನೀರು, ನೆರಳು ಸೇರಿದಂತೆ ಅಗತ್ಯ ವ್ಯವಸ್ಥೆ ಮಾಡಲಾಗಿದೆ. ಸಮಸ್ಯೆ ಇದ್ದರೆ ಸಂಬಂಧಿತ ಅಧಿಕಾರಿಗಳ ಗಮನಕ್ಕೆ ತರುವಂತೆ’ ಅವರು ತಿಳಿಸಿದರು.

ಮಂಗಳವಾರ ನಡೆಯಲಿರುವ ಚುನಾವಣೆಯಲ್ಲಿ ಔರಾದ್ ಕ್ಷೇತ್ರದಲ್ಲಿ 1,17,100 ಪುರುಷರು, 1,093,01 ಮಹಿಳೆಯರು ಸೇರಿದಂತೆ ಒಟ್ಟು 2,26,401 ಜನರು ಮತಾಧಿಕಾರ ಚಲಾಯಿಸಲಿದ್ದಾರೆ. 255 ಬೂತ್ ಪೈಕಿ 25 ಕಡೆ ವಿಶೇಷ ಅಧಿಕಾರಿ ಹಾಗೂ 20 ವಿಡಿಯೊ ಚಿತ್ರೀಕರಣ ವ್ಯವಸ್ಥೆ ಮಾಡಲಾಗಿದೆ ತಹಶೀಲ್ದಾರ್ ನಾಗಯ್ಯ ಹಿರೇಮಠ ತಿಳಿಸಿದ್ದಾರೆ.