ಗೌರವಗಳೊಂದಿಗೆ ಯೋಧ ರಾಮದಾಸ ಅಂತ್ಯಕ್ರಿಯೆ

ಬೆಡಕುಂದಾ ಗ್ರಾಮದಲ್ಲಿ ಬೆಳಿಗ್ಗೆ 8ಕ್ಕೆ ಪಾರ್ಥಿವ ಶರೀರವನ್ನು ಸಾರ್ವಜನಿಕರ ದರ್ಶನಕ್ಕೆ ಇಡಲಾಯಿತು. 10ಕ್ಕೆ ಅಲಂಕೃತ ವಾಹನದಲ್ಲಿ ಪಾರ್ಥಿ ವ ಶರೀರ ಇಟ್ಟುಸಂಗಮ–ಔರಾದ್ ರಸ್ತೆ ಮೂಲಕ ಠಾಣಾಕುಶನೂರು ಹಾಗೂ ಬೆಡಕುಂದಾದ ಲಕ್ಷ್ಮಿನಗರದವರೆಗೆ ಮೆರವಣಿಗೆ ಮಾಡಲಾಯಿತು. ಯುವಕರು ಬೈಕ್ ರ‍್ಯಾಲಿ ನಡೆಸಿದರು. ಸರ್ಕಾರದ ಪರವಾಗಿ ಪಶು ಸಂಗೋಪನೆ ಸಚಿವ ಪ್ರಭು ಚವಾಣ್‌ ಹೂಗುಚ್ಛ ಇರಿಸಿ ನಮನ ಸಲ್ಲಿಸಿದರು.

11.45ಕ್ಕೆ ಲಕ್ಷ್ಮಿ ನಗರದ ತೋಟದಲ್ಲಿ ಸಕಲ ಸರ್ಕಾರಿ ಗೌರವಗಳೊಂದಿಗೆ ಅಂತ್ಯಕ್ರಿಯೆ ನಡೆಯಿತು.

ಪೊಲೀಸರು ಮೂರು ಸುತ್ತು ಗುಂಡು ಹಾರಿಸಿದರು.

ಕುಟುಂಬದವರ ಆಕ್ರಂದನ ಮುಗಿಲು ಮುಟ್ಟಿತ್ತು.

ಈ ಸಂದರ್ಭದಲ್ಲಿ ಗ್ರಾಮಸ್ಥರು ಬೆಡಕುಂದಾ ಗ್ರಾಮದಲ್ಲಿ ಯೋಧ ರಾಮದಾಸ ಚಂದಾಪುರೆ ಅವರ ಸ್ಮಾರಕ ನಿರ್ಮಿಸಿಕೊಡಬೇಕು ಎಂದು ಸಚಿವರಿಗೆ ಮನವಿ ಸಲ್ಲಿಸಿದರು. ಸಚಿವ ಪ್ರಭು ಚವಾಣ್‌ ಮಾತನಾಡಿ,‘ರಾಮದಾಸ ಕುಟುಂಬಕ್ಕೆ ರಾಜ್ಯ ಸರ್ಕಾರದಿಂದ ಎಲ್ಲ ಸೌಕರ್ಯಗಳನ್ನು ಒದಗಿಸಲಾಗುವುದು. ನಿವೇಶನ ಒದಗಿಸಿದರೆ ಸ್ಮಾರಕ ನಿರ್ಮಿಸಲಾಗುವುದು. ಅವರ ಮಗುವಿನ ಶಿಕ್ಷಣ ಸೇರಿದಂತೆ ಇತರ ವೆಚ್ಚಗಳನ್ನು ಭರಿಸಲಾಗುವುದು’ ಎಂದು ಹೇಳಿದರು.

ತಹಶೀಲ್ದಾರ್‌ ರಮೇಶಕುಮಾರ ಪೆದ್ದೆ, ಮುಖಂಡರಾದ ರಾಮಶೆಟ್ಟಿ ಪನ್ನಾಳೆ, ಸಚಿನ್ ರಾಠೋಡ ಹಾಗೂ ಗಿರೀಶ ವಡೆಯರ್ ಇದ್ದರು.