ಹನೂರು | ಬಾಯಿಬೀಗ ಹಾಕಿಸಿಕೊಂಡು ಹರಕೆ ಸಲ್ಲಿಸಿದ ಭಕ್ತರು

ಬಾಯಿಬೀಗ ಹಾಕಿಸಿಕೊಳ್ಳುವ ಭಕ್ತರು ಒಂದು ವಾರದಿಂದ ಬೆಟ್ಟಳ್ಳಿ ಮಾರಮ್ಮ ದೇವಾಲಯ, ಮೈಸೂರು ಮಾರಮ್ಮ ದೇವಾಲಯದಲ್ಲಿ ಪೂಜೆ ಸಲ್ಲಿಸಿದರು. ಬಳಿಕ ಪಟ್ಟಣದ ಆಂಜನೇಯ ದೇವಸ್ಥಾನದಲ್ಲಿ ಸಂಪ್ರಾದಾಯಿಕ ವಿಧಿ ವಿಧಾನಗಳೊಂದಿಗೆ ದೊಡ್ಡ ಬಾಯಿ ಬೀಗವನ್ನು ಹಾಕಿಸಿಕೊಂಡು ಸುಮಾರು ಎರಡು ಕಿಲೋಮೀಟರ್‌ ದೂರದಲ್ಲಿರುವ ಬೆಟ್ಟಳ್ಳಿ ಮಾರಮ್ಮ ದೇವಾಲಯದವರೆಗೆ ಬಿರುಬಿಸಿಲಿನ ಬೇಗೆ, ದೈಹಿಕ ಬಾಧೆಯನ್ನು ಲೆಕ್ಕಿಸದೆ ಭಕ್ತಿ ಭಾವದೊಂದಿಗೆ ಹೆಜ್ಜೆ ಹಾಕಿ ತಮ್ಮ ಹರಕೆ ಇಷ್ಟಾರ್ಥವನ್ನು ನೆರವೇರಿಸಿದರು.

ತಮಿಳುನಾಡು ಹಾಗೂ ಜಿಲ್ಲೆಯ ವಿವಿಧೆಡೆಯಿಂದ ಸಾವಿರಾರು ಸಂಖ್ಯೆಯಲ್ಲಿ ಆಗಮಿಸಿದ್ದ ಭಕ್ತರು ಬಾಯಿಬೀಗ ಸೇವೆಯನ್ನು ಕಣ್ತುಂಬಿಕೊಂಡರು. ಈ ಬಾರಿ 12 ಮಹಿಳೆಯರು, 104 ಪುರುಷರು ಸೇರಿ ಒಟ್ಟು 116 ಭಕ್ತರು ಬಾಯಿಬೀಗ ಹಾಕಿಸಿಕೊಳ್ಳುವ ಮೂಲಕ ತಮ್ಮ ಹರಕೆ ಕಾಣಿಕೆ ಸಲ್ಲಿಸಿದರು. ಬಾಯಿ ಬೀಗ ವೀಕ್ಷಿಸಲು ಅಪಾರ ಸಂಖ್ಯೆಯಲ್ಲಿ ಜನರು ಆಗಮಿಸಿದ್ದರಿಂದ ಕೊಳ್ಳೇಗಾಲ ಮಲೆಮಹದೇಶ್ವರ ಬೆಟ್ಟ ಮುಖ್ಯ ರಸ್ತೆ, ಬಂಡಳ್ಳಿ ಮಣಗಳ್ಳಿ ಮುಖ್ಯ ರಸ್ತೆಗಳಲ್ಲಿ ಕೆಲಕಾಲ ಸಂಚಾರ ದಟ್ಟಣೆ ಉಂಟಾಗಿತ್ತು.

ಗಮನಸೆಳೆದ ಬಾಯಿಬೀಗ ರಥ: ಪ್ರಪ್ರಥಮ ಬಾರಿಗೆ ಬೆಟ್ಟಳ್ಳಿ ಮಾರಮ್ಮ ಅವರ ರಥೋತ್ಸವದ ಮಾದರಿಯಲ್ಲಿ ರಚನೆ ಮಾಡಲಾದ ತೇರನ್ನು ಹರಕೆ ಹೊತ್ತ ಭಕ್ತರೊಬ್ಬರು ಭುಜದ ಕೆಳಗೆ ಸಲಾಕೆ ಸಿಕ್ಕಿಸಿಕೊಂಡು ಎಳೆಯುವ ಮೂಲಕ ಭಕ್ತಿಯ ಪರಕಾಷ್ಠೆ ಮೆರೆದರು.