ಎಸ್ಸೆಸ್ಸೆಲ್ಸಿ: ಕೊನೆಯ ಪರೀಕ್ಷೆ ಇಂದು

ಚಾಮರಾಜನಗರ: ಕೋವಿಡ್‌ –19 ನಿಯಂತ್ರಣಕ್ಕೆ ಹೇರಲಾಗಿದ್ದ ಲಾಕ್‌ಡೌನ್‌ನಿಂದಾಗಿ ಮುಂದೂಡಲಾಗಿದ್ದ 2019–20ನೇ ಸಾಲಿನ ಎಸ್ಸೆಸ್ಸೆಲ್ಸಿ ವಾರ್ಷಿಕ ಪರೀಕ್ಷೆಯ ಕೊನೆಯ ಪರೀಕ್ಷೆ (ತೃತೀಯ ಭಾಷೆ) ಶುಕ್ರವಾರ ನಡೆಯಲಿದೆ. 

ಜಿಲ್ಲೆಯಾದ್ಯಂತ 54 ಕೇಂದ್ರಗಳಲ್ಲಿ ಗುರುವಾರ ನಡೆದ ಪ್ರಥಮ ಭಾಷಾ (ಕನ್ನಡ) ವಿಷಯದ ಪರೀಕ್ಷೆಗೆ ಶೆ 98.97ರಷ್ಟು ವಿದ್ಯಾರ್ಥಿಗಳು ಹಾಜರಾಗಿದ್ದಾರೆ. 

10,943 ವಿದ್ಯಾರ್ಥಿಗಳು ನೋಂದಣಿ ಮಾಡಿಕೊಂಡಿದ್ದು, 10,831 ವಿದ್ಯಾರ್ಥಿಗಳು ಹಾಜರಾಗಿದ್ದಾರೆ. 112 ವಿದ್ಯಾರ್ಥಿಗಳು ಗೈರಾಗಿದ್ದಾರೆ. ಹಾಜರಾದವರಲ್ಲಿ 5,439 ಬಾಲಕರು ಹಾಗೂ 5,392 ಬಾಲಕಿಯರು. 41 ಹುಡುಗರು ಹಾಗೂ 71 ಹುಡುಗಿಯರು ಪರೀಕ್ಷೆ ಬರೆದಿಲ್ಲ. 

ಕಂಟೈನ್‌ಮೆಂಟ್‌ ವಲಯದ 16 ವಿದ್ಯಾರ್ಥಿಗಳು ಗುರುವಾರ ಪರೀಕ್ಷೆ ಬರೆದಿದ್ದಾರೆ. ಅನಾರೋಗ್ಯ ಹೊಂದಿದ್ದ 24 ಮಕ್ಕಳು ಪರೀಕ್ಷೆ ಬರೆದಿದ್ದಾರೆ. ಇವರಿಗೆಲ್ಲರಿಗೂ ಪ್ರತ್ಯೇಕ ಕೊಠಡಿ ವ್ಯವಸ್ಥೆ ಮಾಡಲಾಗಿತ್ತು. 

ಡಿಡಿಪಿಐ ಭೇಟಿ: ಸಾರ್ವಜನಿಕ ಶಿಕ್ಷಣ ಇಲಾಖೆಯ ಉಪನಿರ್ದೇಶಕ (ಡಿಡಿಪಿಐ) ಎಸ್‌.ಟಿ.ಜವರೇಗೌಡ ಅವರು ಗುರುವಾರ ಕೊಳ್ಳೇಗಾಲ ತಾಲ್ಲೂಕಿನ ಏಳು ಪರೀಕ್ಷಾ ಕೇಂದ್ರಗಳಿಗೂ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.