ಕೊಳ್ಳೇಗಾಲ: 3ನೇ ವಾರ್ಡ್‌ನಲ್ಲಿ ಇ–ಸ್ವತ್ತು ಸಮಸ್ಯೆ ತೀವ್ರ

ವಾರ್ಡ್‌ನ ನಿವಾಸಿಗಳಿಗೆ ತಮ್ಮ ಮನೆಗಳಿಗೆ ಇ–ಸ್ವತ್ತು ಮಾಡಿಸಲು ಆಗುತ್ತಿಲ್ಲ. ಇದರಿಂದಾಗಿ ಅವರಿಗೆ ಸಾಲ ಸೌಲಭ್ಯ ಸಿಗುತ್ತಿಲ್ಲ. ಹೊಸ ಮನೆ ಕಟ್ಟಿ ಕೊಳ್ಳಲೂ ಆಗುತ್ತಿಲ್ಲ.  ನೂರು ವರ್ಷಕ್ಕೂ ಹಳೆಯದಾದ ಮನೆಗಳು ವಾರ್ಡ್‌ನಲ್ಲಿವೆ. ಅವುಗಳಿಗೆ ಸರಿಯಾದ ದಾಖಲೆಗಳು ಇಲ್ಲ. ಹೀಗಾಗಿ ಇ–ಸ್ವತ್ತಿಗೆ ಬೇಕಾದ ದಾಖಲೆಗಳನ್ನು ನಗರಸಭೆಗೆ ಸಲ್ಲಿಸಲು ಆಗುತ್ತಿಲ್ಲ. ದಾಖಲೆಗಳು ಇಲ್ಲದಿರುವುದರಿಂದ ಸರ್ಕಾರದ ಸೌಲಭ್ಯಗಳಿಗೆ ಅರ್ಜಿ ಸಲ್ಲಿಸಲೂ ಸಾಧ್ಯವಾಗದ ಸ್ಥಿತಿ ಇದೆ.  ‘ನಾವು ಎದುರಿಸುತ್ತಿರುವ ಬಹುದೊಡ್ಡ ಸಮಸ್ಯೆ ಇದೆ. ಇದು. ನಗರಸಭೆ ಅಧಿಕಾರಿಗಳು ಶಾಸಕರು ವಾರ್ಡ್‌ ಸದಸ್ಯರು ಈ ಸಮಸ್ಯೆಯನ್ನು ಬಗೆಹರಿಸಲು ಮೊದಲು ಕ್ರಮ ವಹಿಸಬೇಕು’ ಎಂದು ನಿವಾಸಿ ನಾಗರಾಜು ಒತ್ತಾಯಿಸಿದರು. 

ವಾರ್ಡ್‌ ಸಮಸ್ಯೆಗಳ ಬಗ್ಗೆ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದ ವಾರ್ಡ್‌ನ ಸದಸ್ಯೆ ರೇಖಾ ರಮೇಶ್‌ ‘ಇ– ಸ್ವತ್ತಿನ ವಿಚಾರವಾಗಿ ನಾನು ಈಗಾಗಲೇ ಶಾಸಕರ ಜೊತೆ ಅನೇಕ ಬಾರಿ ಚರ್ಚೆ ಮಾಡಿದ್ದೇನೆ. ಮುಂದಿನ ದಿನಗಳಲ್ಲಿ ಬಡಾವಣೆಗೆ ಭೇಟಿ ನೀಡಿ ಈ  ಸಮಸ್ಯೆಗೆ ಪರಿಹರಿಸಲಾಗುವುದು ಎಂಬ ಭರವಸೆಯನ್ನು ಶಾಸಕರು ನೀಡಿದ್ದಾರೆ’ ಎಂದರು.  ‘ವಾರ್ಡ್‌ನಲ್ಲಿ ಬೇರೆ ಯಾವುದೇ ಸಮಸ್ಯೆಗಳಿದ್ದರೂ ಜನರು ನನ್ನ ಗಮನಕ್ಕೆ ತಂದರೆ ಅದನ್ನು ತಕ್ಷಣ ಬಗೆಹರಿಸಲು ಕೆಲಸ ಮಾಡುವೆ’ ಎಂದರು.