ಗಡಿನಾಡಿಗರಿಗೆ ದಾರಿ ತೋರಿದ ಚೆಂಬೆಳಕು

ಚಾಮರಾಜನಗರ: ಗಡಿನಾಡು ಜನರ ತವಕ- ತಲ್ಲಣ. ಭಾಷಾ ರಾಜ್ಯಗಳ ಬಲಿಷ್ಠತೆ. ಕೇಂದ್ರ ಸರ್ಕಾರದ ಹೊಣೆಗಾರಿಕೆ. ರಾಜ್ಯ ಸರ್ಕಾರದ ಕನ್ನಡಪರ ಕರ್ತವ್ಯ. ಕನ್ನಡಿಗರ ಜವಾಬ್ದಾರಿಯ ಮೇಲೆ ಹಿರಿಯ ಕವಿ ಚನ್ನವೀರ ಕಣವಿ ‘ಚೆಂಬೆಳಕು’ ಚೆಲ್ಲಿದರು!

ಜಿಲ್ಲೆಯ ಹನೂರು ಪಟ್ಟಣದಲ್ಲಿ ಗುರುವಾರ ಕರ್ನಾಟಕ ಗಡಿ ಪ್ರದೇಶ ಅಭಿವೃದ್ಧಿ ಪ್ರಾಧಿಕಾರ, ಜಿಲ್ಲಾಡಳಿತ ಹಾಗೂ ಜಿಲ್ಲಾ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯಿಂದ ಹಮ್ಮಿಕೊಂಡಿದ್ದ ಗಡಿನಾಡ ಸಾಂಸ್ಕೃತಿಕ ಉತ್ಸವಕ್ಕೆ ಚಾಲನೆ ನೀಡಿದ ಅವರ ಭಾಷಣದಲ್ಲಿ, ಕನ್ನಡ ನಾಡು-ನುಡಿ ಕುರಿತ ಕಾಳಜಿ ಅನಾವರಣಗೊಂಡಿತು. ಚೆಂಬೆಳಕಿನ ಕವಿಯಾದ ಕಣವಿ, ನೆರೆಹೊರೆಯ ರಾಜ್ಯಗಳ ಆಕ್ರಮಣಶೀಲತೆ ಬಗ್ಗೆ ಪ್ರಸ್ತಾಪಿಸುತ್ತಲೇ ಕನ್ನಡಿಗರ ಹೊಣೆಗಾರಿಕೆ ಯತ್ತಲೂ ಬೊಟ್ಟು ಮಾಡಿದರು. ಸುಮಾರು ಅರ್ಧಗಂಟೆ ಕಾಲದ ಭಾಷಣದಲ್ಲಿ ಕನ್ನಡದ ಸುಧೆ ಹರಿಸಿದರು. ಗಡಿನಾಡಿನ ಕನ್ನಡ ಪ್ರದೇಶಗಳ ರಕ್ಷಣೆ ಬಗ್ಗೆಯೂ ಕಹಳೆ ಮೊಳಗಿಸಿದರು.

‘ಪ್ರತಿಯೊಂದು ಭಾಷಾ ರಾಜ್ಯವೂ ಬಲಿಷ್ಠವಾಗಬೇಕು. ಕೇಂದ್ರ ಸರ್ಕಾರವೆಂಬುದು ಬಲಿಷ್ಠ ರಾಜ್ಯಗಳ ಸಮತೋಲನದಿಂದ ಪರಸ್ಪರ ಸಂಘರ್ಷ ತಪ್ಪಿಸಿ, ಶೋಷಣೆ ನಿಯಂತ್ರಿಸುವ ವ್ಯವಸ್ಥೆಯಾಗಬೇಕಿದೆ. ಆದರೆ, ಇಂಥ ಕರ್ತವ್ಯ ನಿರ್ವಹಿಸಲು ಕೇಂದ್ರ ವಿಮುಖವಾಗಿದೆ. ಇದರ ಪರಿಣಾಮ ದೇಶದ ತುಂಬೆಲ್ಲಾ ಪ್ರಾದೇಶಿಕ ಅಸಮಾನತೆಯ ಕೂಗು ಎದ್ದಿದೆ’ ಎಂದರು ಚನ್ನವೀರ ಕಣವಿ.

ಕನ್ನಡ ಅಥವಾ ಕರ್ನಾಟಕತ್ವ ಒಂದು ಭಾಷೆಯ ಹೆಸರಲ್ಲ. ಭೌಗೋಳಿಕ ಪ್ರದೇಶವೊಂದರಲ್ಲಿ ವಾಸಿಸುವ ಜನಸಮುದಾಯದ ರಾಜಕೀಯ, ಸಾಮಾಜಿಕ ಹಾಗೂ ಸಾಂಸ್ಕೃತಿಕ ಬದುಕಿನ ಐತಿಹಾಸಿಕ ದಾಖಲೆ. ಈ ಸಮುದಾಯದ ವರ್ತಮಾನ ಸಾವಿರಾರು ನಾಲಿಗೆಯ ಮೂಲಕ