ಕೋಚಿಮುಲ್ ವಿಭಜನೆ: ಸಚಿವ ಸುಧಾಕರ್ ಮೇಲುಗೈ

ಬಿಜೆಪಿ, ಕಾಂಗ್ರೆಸ್‌ ಜಿದ್ದಾಜಿದ್ದಿ

ಕಾಂಗ್ರೆಸ್ ಮತ್ತು ಬಿಜೆಪಿ ನಡುವಿನ ಜಿದ್ದಾಜಿದ್ದಿ ರಾಜಕಾರಣಕ್ಕೆ ತಿರುಗಿದ್ದ ಕೋಚಿಮುಲ್‌ ವಿಭಜನೆಯ ವಿಚಾರ ರಾಜಕೀಯ ಪ್ರತಿಷ್ಠೆಗೂ ಕಾರಣವಾಗಿತ್ತು.ಸಚಿವ ಡಾ.ಕೆ.ಸುಧಾಕರ್ ಮತ್ತು ಅವರ ಬೆಂಬಲಿಗರು, ಜಿಲ್ಲೆಯ ಕಾಂಗ್ರೆಸ್ ಶಾಸಕರು ಹಾಗೂ ಆ ಪಕ್ಷದ ಬೆಂಬಲಿತ ನಿರ್ದೇಶಕರು ನಡುವೆ ರಾಜಕೀಯ ಜಟಾಪಟಿ ನಡೆಸಿದ್ದರು. ಪರಸ್ಪರ ಎರಡೂ ಬಣಗಳು ಹಾಲು ಉತ್ಪಾದಕರ ಸಹಕಾರ ಸಂಘಗಳ ಕಾರ್ಯದರ್ಶಿ ಮತ್ತು ಅಧ್ಯಕ್ಷರಿಂದ ಸಹಿ ಸಂಗ್ರಹಿಸಿದ್ದವು.

ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರನ್ನು ಮೊದಲ ಬಾರಿಗೆ ಸಚಿವ ಡಾ.ಕೆ.ಸುಧಾಕರ್ ನೇತೃತ್ವದ ನಿಯೋಗ ವಿಭಜನೆಯ ವಿಚಾರವಾಗಿ ಭೇಟಿ ಮಾಡಿತ್ತು.ಶಾಸಕ ಕೆ.ಆರ್.ರಮೇಶ್ ಕುಮಾರ್, ಶಿವಶಂಕರರೆಡ್ಡಿ, ವಿ.ಮುನಿಯಪ್ಪ, ಕೆ.ವೈ.ನಂಜೇಗೌಡ ನೇತೃತ್ವದ ನಿಯೋಗ ವಿಧಾನಸಭೆ ವಿರೋಧ ಪಕ್ಷದ ನಾಯಕ ಸಿದ್ದರಾಮಯ್ಯ ಮತ್ತು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರನ್ನು ಭೇಟಿ ಮಾಡಿತ್ತು. ‘ತಕ್ಷಣವೇ ವಿಭಜನೆ ಬೇಡ. ಸಾಧಕ ಬಾಧಕಗಳ ಕುರಿತು ಚರ್ಚೆಯಾಗಲಿ’ ಎಂದು ಒತ್ತಡ ತಂದಿತ್ತು. ರಾಜ್ಯ ಮಟ್ಟದಲ್ಲಿ ನಡೆದ ಈ ಬೆಳವಣಿಗೆಗಳು ಜಿಲ್ಲೆಯ ರಾಜಕಾರಣದಲ್ಲಿ ತೀವ್ರ ಕಾವು ಮೂಡಿಸಿತ್ತು.ಹೀಗೆ ಜಿಲ್ಲೆಯ ಅಂಗಳದಲ್ಲಿದ್ದ ವಿಚಾರ ಮುಖ್ಯಮಂತ್ರಿ ಮತ್ತು ವಿಧಾನಸಭೆ ವಿರೋಧ ಪಕ್ಷದ ನಾಯಕರವರೆಗೂ
ಮುಟ್ಟಿತ್ತು.

ಕೋಚಿಮುಲ್ ವಿಭಜನೆಯನ್ನುಸಚಿವ ಸುಧಾಕರ್ ಪ್ರತಿಷ್ಠೆಯಾಗಿ ಪರಿಗಣಿಸಿದ್ದರು. ತಮ್ಮ ರಾಜಕೀಯ ವಿರೋಧಿಗಳ ಎದುರು ತಮ್ಮ ಪ್ರಾಬಲ್ಯ ಪ್ರದರ್ಶನಕ್ಕೂ ಅವರಿಗೆ ವಿಭಜನೆಯ ವಿಚಾರ ಒದಗಿ ಬಂದಿತ್ತು. ಈಗ ಸಚಿವ ಸಂಪುಟದಲ್ಲಿ ವಿಭಜನೆಗೆ ತಾತ್ವಿಕ ಒಪ್ಪಿಗೆ ದೊರೆತಿದೆ. ಈ ಮೂಲಕ ಜಿಲ್ಲೆಯಲ್ಲಿ ಸುಧಾಕರ್ ಪ್ರಾಬಲ್ಯ ಮುಂದುವರಿದಿದೆ. ಚಿಕ್ಕಬಳ್ಳಾಪುರ ಪ್ರತ್ಯೇಕ ಒಕ್ಕೂಟದ ರಚನೆಯ ಪೂರ್ಣ ಶ್ರೇಯ ಡಾ.ಕೆ.ಸುಧಾಕರ್ ಅವರಿಗೆ ಸಂದಿದೆ.

ಬಿಜೆಪಿ ಪ‍್ರಾಬಲ್ಯ ವಿಸ್ತರಣೆಗೆ ಅವಕಾಶ?: ಜಿಲ್ಲೆಯ ಹಾಲು ಉತ್ಪಾದಕರ ಸಹಕಾರ ಸಂಘಗಳ ಮೂಲಕ ಕಾಂಗ್ರೆಸ್, ಜೆಡಿಎಸ್ ಮತ್ತು ಬಿಜೆಪಿ ತಮ್ಮದೇ ಆದ ರಾಜಕಾರಣ ನಡೆಸಿವೆ. ಕಾಂಗ್ರೆಸ್ ಮತ್ತು ಜೆಡಿಎಸ್ ಪ್ರಾಬಲ್ಯವೇ ಇಲ್ಲಿಯವರೆಗೂ ಹೆಚ್ಚಿತ್ತು. ಈಗ ಕೋಚಿಮುಲ್ ವಿಭಜನೆಯು ಜಿಲ್ಲೆಯಲ್ಲಿ ಬಿಜೆಪಿ ಪ್ರಾಬಲ್ಯ ವಿಸ್ತರಣೆಗೆ ಮತ್ತು ಸಚಿವ ಡಾ.ಕೆ.ಸುಧಾಕರ್ ಹಿಡಿತವನ್ನು ಹೊಂದಲು ಉತ್ತಮ ಅವಕಾಶವಾಗಿ ಒದಗಿಸಿದೆ.ಜಿಲ್ಲೆಯ ಸಹಕಾರಿ ವಲಯದಲ್ಲಿ ಬಿಜೆಪಿ ಬೆಂಬಲಿತರು ಪ್ರತಿಷ್ಠಾಪನೆಯಾಗುವ ಕಾಲ ಕೂಡಿಬಂದಿದೆ.