ಗುಡಿಬಂಡೆ: ಊರ ಜಾತ್ರೆಯಲ್ಲಿ ದೀಪದಾರತಿ ರಂಗು

ಸಾದಲಿ ಗ್ರಾಮದಲ್ಲಿ ಹೂವಿನ ಅಲಂಕಾರದಿಂದ ಮಾಡಲಾಗಿದ್ದ ದೀಪಗಳನ್ನು ಹೊತ್ತ ಮಹಿಳೆಯರು ಮಂಗಳ ವಾದ್ಯಗಳೊಂದಿಗೆ ವಿವಿಧ ಭಾಗಗಳಲ್ಲಿ ಮೆರವಣಿಗೆ ನಡೆಸಿದರು. ಸಾದಿಲಮ್ಮ, ಗಂಗಮ್ಮ, ಮಹೇಶ್ವರಿ, ಚೌಡೇಶ್ವರಿ, ದುರ್ಗಾದೇವಿ, ಸಪ್ಪಲಮ್ಮ ಹಾಗೂ ಮುನೇಶ್ವರ ದೇವರಿಗೆ ಪೂಜೆ ಸಲ್ಲಿಸಿದರು. 15 ವರ್ಷಗಳ ಬಳಿಕ ದೀಪದ ಮೆರವಣಿಗೆ ನಡೆಯುತ್ತಿದೆ ಎಂದು ಗ್ರಾಮಸ್ಥರು ತಿಳಿಸಿದರು. 

ಈ ದೀಪದ ಮೆರವಣಿಗೆಯಲ್ಲಿ ಸಂವಿಧಾನ ಶಿಲ್ಪಿ ಅಂಬೇಡ್ಕರ್ ಸೇರಿದಂತೆ ಇನ್ನಿತರ ಮಹನೀಯರ ಚಿತ್ರಗಳು ಗಮನ ಸೆಳೆದವು.

ಯುವಕರು ತಮಟೆಯ ನಾದಕ್ಕೆ ಹೆಜ್ಜೆ ಹಾಕಿದ್ದು, ಮೆರವಣಿಗೆಗೆ ಮೆರುಗು ನೀಡಿತ್ತು. ಯಾವುದೇ ಅಹಿತಕರ ಘಟನೆ ನಡೆಯದಂತೆ ಮುನ್ನೆಚ್ಚರಿಕಾ ಕ್ರಮವಾಗಿ ಪೊಲೀಸ್ ಬಂದೋಬಸ್ತ್ ಏರ್ಪಡಿಸಲಾಗಿತ್ತು.