ಚಿಕ್ಕಬಳ್ಳಾಪುರ: ‘ಜಿಲ್ಲೆಯ ಐತಿಹಾಸಿಕ ಪ್ರವಾಸಿ ತಾಣ ನಂದಿಬೆಟ್ಟದ ನಿರ್ವಹಣೆಯನ್ನು ಪ್ರಸ್ತುತ ಮೂರು ಇಲಾಖೆಗಳು ನಡೆಸುತ್ತಿವೆ. ಇದನ್ನು ಪ್ರವಾಸೋದ್ಯಮ ಒಂದೇ ಇಲಾಖೆಗೆ ವಹಿಸಲು ಕ್ಯಾಬಿನೆಟ್‍ನಲ್ಲಿ ತೀರ್ಮಾನ ಆಗಿದ್ದು, ಇನ್ನು ಮುಂದೆ ನಂದಿಬೆಟ್ಟದ ನಿರ್ವಹಣೆ ಪ್ರವಾಸೋದ್ಯಮ ಇಲಾಖೆಯೇ ಮಾಡಲಿದೆ. ಇದರ ಜತೆಗೆ ನಂದಿಬೆಟ್ಟದ ಅಭಿವೃದ್ಧಿಗಾಗಿ ಸರ್ಕಾರದಿಂದ ₹ 10 ಕೋಟಿ ಬಿಡುಗಡೆಯಾಗಿದ್ದು, ಈ ಸಂಬಂಧ ಜಿಲ್ಲಾಡಳಿತ ಈಗಾಗಲೇ ಕ್ರಿಯಾಯೋಜನೆ ವರದಿ ನೀಡಿದೆ. ಒಂದು ವಾರದಲ್ಲಿ ಇದಕ್ಕೆ ಅಂತಿಮ ತೀರ್ಮಾನ ಕೈಗೊಳ್ಳಲಿದ್ದೇವೆ’ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಸುಧಾಕರ್‌ ತಿಳಿಸಿದರು.
