ಗುಡಿಬಂಡೆ: ಸ್ಮಶಾನಗಳಿವೆ; ಅಭಿವೃದ್ಧಿ ಇಲ್ಲ!

1 ಸಾವಿರ ಜನಸಂಖ್ಯೆಗೆ 20 ಗುಂಟೆ ಪ್ರಕಾರ ಸ್ಮಶಾನಗಳಿಗೆ ಜಮೀನು ಮಂಜೂರಾಗಿದೆ. ಈ ಪ್ರಕಾರ ಗ್ರಾಮಾಂತರ ಪ್ರದೇಶದ ಸ್ಮಶಾನಕ್ಕೆ ಎಂದು ಒಟ್ಟು 89 ಎಕರೆ ಮತ್ತು ಪಟ್ಟಣಕ್ಕೆ 16.20 ಎಕರೆ ಸ್ಮಶಾನದ ಜಾಗವಿದೆ. ಹೀಗಿದ್ದರೂ ಶೇ 30ರಷ್ಟು ಸ್ಮಶಾನಗಳು ಮಾತ್ರ ಅಭಿವೃದ್ಧಿ ಕಂಡಿವೆ.

ಎಲ್ಲೆಲ್ಲಿ ಸ್ಮಶಾನ:ಪಟ್ಟಣದ ಸಂತೆ ಮೈದಾನದಲ್ಲಿ 20 ಗುಂಟೆ, ಮುಖ್ಯರಸ್ತೆ ಪಕ್ಕದಲ್ಲಿ 3 ಎಕರೆ, ವಾಪಸಂದ್ರದ ಬಳಿ ಪರಿಶಿಷ್ಟ ಜಾತಿ ಮತ್ತು ಪಂಗಡಕ್ಕೆ ಸ್ಮಶಾನವಿದೆ. 3 ಎಕರೆಯಲ್ಲಿರುವ ಮುಸ್ಲಿಮರ ಖಬರ್‌ಸ್ತಾನ, ಸಂತೆ ಮೈದಾನ ಮತ್ತು ಬ್ರಾಹ್ಮಣರಿಗೆ ಮೀಸಲಾಗಿರುವ ಸ್ಮಶಾನದಲ್ಲಿ ಶವ ಸಂಸ್ಕಾರಗಳು ನಡೆಯುತ್ತಿವೆ. ಇಲ್ಲಿಯೂ ಸೌಲಭ್ಯಗಳು ಇಲ್ಲ.

ಸಂತೆ ಮೈದಾನದಲ್ಲಿನ 20 ಗುಂಟೆ ಜಾಗ 50 ವರ್ಷಗಳ ಹಿಂದೆ ಸ್ಮಶಾನಕ್ಕೆ ಮಂಜೂರಾಗಿತ್ತು. ಆಗ ಪಟ್ಟಣದ ಜನಸಂಖ್ಯೆ 2 ಸಾವಿರ ಇತ್ತು. ಈಗ 10 ಸಾವಿರ ಮೀರಿದೆ.ಈ ಸ್ಮಶಾನ ಗೋರಿಗಳಿಂದ ತುಂಬಿದೆ. ಈಗ ಜಾಗದ ಕೊರತೆ ಇದೆ. ಹಳೇ ಗೋರಿಗಳ ಮೇಲೆ ಹೊಸ ಗುಣಿ ತೆಗೆದು ಶವಗಳನ್ನು ಹೂಳಬೇಕಾದ ಸ್ಥಿತಿ ಇದೆ.

ವಾಪಸಂದ್ರ ಸರ್ವೆ ನಂ. 76ರಲ್ಲಿ ಸಾರ್ವಜನಿಕ ಸ್ಮಶಾನಕ್ಕೆ ಎಂದು 5 ಎಕರೆ, ಪರಿಶಿಷ್ಟ ಜಾತಿ ಮತ್ತು ಪಂಗಡಕ್ಕೆ ಒಟ್ಟು ಮೂರು ಎಕರೆ ಜಮೀನು ಮಂಜೂರಾಗಿದೆ. ಪಹಣಿಯಲ್ಲಿಯೂ ಸ್ಮಶಾನ ಎಂದು ನಮೂದಾಗಿದೆ. ಆದರೆ, ಇಲ್ಲಿ ಕೆಲವರು ಉಳುಮೆ ಮಾಡುತ್ತಿದ್ದು ಅವರಿಂದ ಜಮೀನನ್ನು ಸ್ವಾಧೀನಕ್ಕೆ ಅಧಿಕಾರಿಗಳು ತೆಗೆದು
ಕೊಂಡಿಲ್ಲ.