ಸಂವಿಧಾನ ಯಥಾವತ್ತಾಗಿ ಜಾರಿಯಾದಾಗ ಶೋಷಿತರ ಏಳಿಗೆ ಸಾಧ್ಯ: ಕೆ.ಬಿ ಸುಧಾ

ನಗರದ ಬಿಎಸ್‌ಪಿ ಕಚೇರಿಯಲ್ಲಿ ಭಾನುವಾರ ಏರ್ಪಡಿಸಿದ್ದ ‘ಸಂವಿಧಾನ ಸಮರ್ಪಣಾ ದಿನ’ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

‘ಬಿ.ಆರ್.ಅಂಬೇಡ್ಕರ್ ಅವರು ಹಗಲಿರುಳು ಶ್ರಮಿಸಿ ಸರ್ವರಿಗೂ ಸಮಬಾಳು ಎಂಬ ಆಶಯವಿರುವ ಜಗತ್ತು ಒಪ್ಪುವ ಸಂವಿಧಾನವನ್ನು ದೇಶಕ್ಕೆ ಕೊಡುಗೆ ನೀಡಿದ್ದಾರೆ. ಈವರೆಗೂ ಅಧಿಕಾರ ನಡೆಸಿದ ರಾಜಕೀಯ ಪಕ್ಷಗಳು ಸಂವಿಧಾನವನ್ನು ಇಡಿಯಾಗಿ ಜಾರಿ ಮಾಡದೆ ಅನ್ಯಾಯ ಮಾಡುತ್ತಿವೆ’ ಎಂದು ಆರೋಪಿಸಿದರು.

‘ದೇಶದ ನಾಗರಿಕರಿಗೆ ಸಂವಿಧಾನದ ಮೂಲಕ ಮತದಾನದ ಹಕ್ಕು ಕಲ್ಪಿಸಿದೆ. ಚುನಾವಣೆ ವೇಳೆ ಹಣ, ಆಮಿಷಕ್ಕೆ ಬಲಿಯಾಗದೆ ವಿವೇಚನೆಯಿಂದ ಹಕ್ಕು ಚಲಾಯಿಸಬೇಕು. ಆಗ ಭ್ರಷ್ಟಾಚಾರ ರಹಿತ ಸದೃಢ ದೇಶ ಕಟ್ಟಲು ಸಾಧ್ಯವಾಗಲಿದೆ’ ಎಂದು ಹೇಳಿದರು.

ಈ ವೇಳೆ ದೇಶದ ಸಂವಿಧಾನ ರಕ್ಷಿಸುವ ಕುರಿತು ಪ್ರತಿಜ್ಞಾವಿಧಿ ಸ್ವೀಕರಿಸಿದರು. ಪಕ್ಷದ ಅಸೆಂಬ್ಲಿ ಉಪಾಧ್ಯಕ್ಷ ಹೊನ್ನಪ್ಪ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು. ಜಿಲ್ಲಾ ಮಹಿಳಾ ಘಟಕದ ಉಪಾಧ್ಯಕ್ಷೆ ಕೆ.ಎಸ್. ಮಂಜುಳಾ, ಆಸೆಂಬ್ಲಿ ಸಂಯೋಜಕ ಕೆ.ಆರ್ ಗಂಗಾಧರ್, ಪದಾಧಿಕಾರಿಗಳಾದ ನವೀನ್‌ಕುಮಾರ್, ವಸಂತ್, ಸಿದ್ದಯ್ಯ ರತ್ನಾ, ಕಲಾವತಿ, ರುಕ್ಮಿಣಿ, ನವೀನ್ ಕುಮಾರಿ ಇದ್ದರು.