ಬಿಸಿಲ ತಾಪ: ತಂಪೆರೆಯುತ್ತಿರುವ ಕಬ್ಬು, ಕಲ್ಲಂಗಡಿ

ಕಲ್ಲಂಗಡಿ ಹಣ್ಣು ಮಾರಾಟ ಮಾಡುವವರು ಚೆನ್ನರಾಯಪಟ್ಟಣ, ಹಾಸನದಿಂದ ಹಣ್ಣು ತರಿಸುತ್ತಾರೆ. ₹12 ರಿಂದ ₹13 ಸಾವಿರಕ್ಕೆ ಒಂದು ಟನ್ ಕಲ್ಲಂಗಡಿ ತರಿಸುತ್ತಾರೆ. ಸಂಕರಣ ತಳಿಯ (ಹೈಬ್ರಿಡ್) ಹಣ್ಣು ₹12 ರಿಂದ ₹15 ಸಾವಿರಕ್ಕೆ ಒಂದು ಟನ್ ದೊರೆಯುತ್ತದೆ. ಒಮ್ಮಲೆ ಮೂರರಿಂದ ನಾಲ್ಕು ಟನ್ ತರಿಸುವ ವ್ಯಾಪಾರಿಗಳು ಅದನ್ನು  ಕೆ.ಜಿ ಲೆಕ್ಕದಲ್ಲಿ ಮತ್ತು ಕೊಯ್ದು ಪ್ಲೇಟ್ ಲೆಕ್ಕದಲ್ಲಿ ಮಾರುತ್ತಾರೆ. ಒಂದು ಪ್ಲೇಟ್‌ಗೆ ₹20 ಬೆಲೆ ಇದೆ. ನಾಲ್ಕರಿಂದ ಐದು ಕೆಜಿ ತೂಕದ ಒಂದು ಹಣ್ಣು ಕೊಯ್ದರೆ ಕನಿಷ್ಠ 10 ಪ್ಲೇಟ್‌ ಆಗುವಷ್ಟು  ಸಿಗುತ್ತದೆ ಎನ್ನುತ್ತಾರೆ ವ್ಯಾಪಾರಿಗಳು.

ಹೆಚ್ಚಿನವರು ಕೊಯ್ದು ಇಟ್ಟ ಹಣ್ಣನ್ನು ತಿನ್ನುತ್ತಾರೆ. ಮತ್ತೆ ಕೆಲವರು ಇಡೀ ಹಣ್ಣನ್ನೇ ಕೊಂಡೊಯ್ಯುತ್ತಾರೆ. ಕಲ್ಲಂಗಡಿ ನಾಟಿ ತಳಿಗೆ ಕೆಜಿಗೆ ₹30, ಹೈಬ್ರಿಡ್ ಹಣ್ಣಿಗೆ ಒಂದು ಕೆಜಿಗೆ ₹25 ಬೆಲೆ ಇದೆ. ನಾಲ್ಕರಿಂದ ಎಂಟು ಕೆ.ಜಿ.ತೂಗುವ ಹಣ್ಣುಗಳಿವೆ.

ಬಿಸಿಲ ಝಳಕ್ಕೆ ದಾಹ ತಣಿಸಲು ಕಬ್ಬಿನ ಹಾಲಿನ ಅಂಗಡಿಗಳು ರಸ್ತೆಯಂಚಿನಲ್ಲಿ ತಲೆ ಎತ್ತಿವೆ. ತಳ್ಳು ಗಾಡಿಗಳಲ್ಲಿ ಚಿಕ್ಕ ಯಂತ್ರದ ಗಾಣವನ್ನಿಟ್ಟುಕೊಂಡು ಕಬ್ಬು ಅರೆದು ಹಾಲು ಮಾರುವವರು ಇದ್ದಾರೆ. ಕಬ್ಬನ್ನು ಮಂಡ್ಯ, ಚೆನ್ನರಾಯಪಟ್ಟಣ, ಪಾಂಡವಪುರ ಕಡೆಯಿಂದ ತರಿಸುತ್ತಾರೆ. ಒಂದು ಟನ್ ಕಬ್ಬಿಗೆ ₹250ರಿಂದ ₹300 ಕೊಟ್ಟು ತರುತ್ತಾರೆ. ಒಂದು ಕಬ್ಬಿನ ಕೋಲಿನಲ್ಲಿ ಕನಿಷ್ಟ 2 ಲೋಟದಷ್ಟು ಹಾಲು ಸಿಗುತ್ತದೆ. ಕಬ್ಬಿನ‌ ರಸಕ್ಕೆ ನಿಂಬೆಹಣ್ಣಿನ ರಸ, ಮೆಣಸಿನ‌ಕಾಯಿ,‌ ಶುಂಠಿ ಬೆರೆಸಿ ಮಾರುತ್ತಾರೆ. ಒಂದು ಲೋಟ ಕಬ್ಬಿನ ರಸಕ್ಕೆ ₹20 ಬೆಲೆಯಿದೆ.

Quote -