ಮಂಗಳೂರು: 300 ಮೀ ರಸ್ತೆಗೆ ಮೂರು ತಿಂಗಳು ಕಾಮಗಾರಿ!

‘ಕಾಂಕ್ರೀಟೀಕರಣ ನಡೆಸಲು ರಸ್ತೆಯನ್ನು ಅಗೆದಾಗ ಬಂಡೆ ಸಿಕ್ಕಿದ್ದರಿಂದ ಕಾಮಗಾರಿ ವಿಳಂಬವಾಗಿದೆ. ಅಕ್ಕ ಪಕ್ಕದಲ್ಲಿ ಮನೆಗಳು ಅಪಾರ್ಟ್‌ಮೆಂಟ್‌ ಸಮುಚ್ಚಯಗಳಿರುವುದರಿಂದ ಬಂಡೆಯನ್ನು ಸ್ಫೋಟಿಸಿ ತೆಗೆಯಲು ಆಗಲಿಲ್ಲ. ಹಾಗಾಗಿ  ಬಂಟೆಯನ್ನು ಸ್ವಲ್ಪ ಸ್ವಲ್ಪವೇ ಒಡೆದು ತೆಗೆಯಲು 22 ದಿನಗಳು ಬೇಕಾದವು. ಹಾಗಾಗಿ ಕಾಮಗಾರಿ ವಿಳಂಬವಾಗಿದೆ. ರಸ್ತೆಯ ಒಂದು ಪಾರ್ಶ್ವದ ಮಾರ್ಗದ ಕಾಂಕ್ರೀಟೀಕರಣ ಮುಗಿದಿದ್ದು ಇನ್ನೊಂದು ಪಾರ್ಶ್ವರ ಕಾಂಕ್ರೀಟೀಕರಣ ಮುಂದಿನವಾರ ಮುಗಿಯಲಿದೆ’ ಎಂದು ಬಿಜೈ ವಾರ್ಡ್‌ನ (ವಾರ್ಡ್‌ 31)  ಪಾಲಿಕೆ ಸದಸ್ಯ ಲ್ಯಾನ್ಸ್‌ ಲಾಟ್‌ ಪಿಂಟೊ‌ ತಿಳಿಸಿದರು. ‘ಮಳೆಗಾಲಕ್ಕೆ ಮುನ್ನವೇ ಕಾಮಗಾರಿ ಪೂರ್ಣಗೊಳಿಸುವ ಉದ್ದೇಶ ನಮ್ಮದು. ಜೂನ್‌ 1ಕ್ಕೆ ಕಾಂಕ್ರಿಟೀಕರಣ ಕಾಮಗಾರಿ ಪೂರ್ಣಗೊಳಿಸುವುದಾಗಿ ಗುತ್ತಿಗೆದಾರರು ಭರವಸೆ ನೀಡಿದ್ದಾರೆ.  ಆ ಬಳಿಕ ಕ್ಯೂರಿಂಗ್‌ ಹಾಗೂ ಅಂತಿಮ ಹಂತದ ಕೆಲಸಗಳಿಗೆ ಸ್ವಲ್ಪ ದಿನ ಬೇಕಾದೀತು’ ಎಂದು ಅವರು ತಿಳಿಸಿದರು. ‘ಇಲ್ಲಿ ಒಳಚರಂಡಿಯ ಹಳೆಯ ಕೊಳವೆಮಾರ್ಗವನ್ನು ಬಿಜೈ ಮುಖ್ಯರಸ್ತೆ ಪಕ್ಕದ ಮುಖ್ಯ ಕೊಳವೆಮಾರ್ಗಕ್ಕೆ ಜೋಡಿಸಿದ್ದೇವೆ. ಈ ಪ್ರದೇಶದ ಒಳಚರಂಡಿ ಸಮಸ್ಯೆಯೂ ಇದರಿಂದ ನಿವಾರಣೆ ಆಗಲಿದೆ’ ಎಂದು ಅವರು ತಿಳಿಸಿದರು.