ದಾವಣಗೆರೆ: ವೀರಶೈವ–ಲಿಂಗಾಯತ ಮಹಾ ಅಧಿವೇಶನಕ್ಕೆ ದೇವನಗರಿ ಸಿಂಗಾರ

ನಗರ ಸೇರಿದಂತೆ ಜಿಲ್ಲೆಯ ವಿವಿಧೆಡೆ ಮಹಾ ಅಧಿವೇಶನಕ್ಕೆ ಶುಭ ಕೋರುವ ಫ್ಲೆಕ್ಸ್ ಹಾಗೂ ಬಂಟಿಂಗ್ಸ್‌ಗಳು ರಾರಾಜಿಸುತ್ತಿವೆ. ರಾಜ್ಯದ ವಿವಿಧ ಜಿಲ್ಲೆಗಳು ಸೇರಿದಂತೆ ನೆರೆಯ ಮಹಾರಾಷ್ಟ್ರ, ಕೇರಳ ಹಾಗೂ ಆಂಧ್ರಪ್ರದೇಶಗಳಿಂದಲೂ ಜನರು ಆಗಮಿಸುವ ನಿರೀಕ್ಷೆ ಇದೆ.

ಬೃಹತ್ ಪೆಂಡಾಲ್:

400 ಮೀಟರ್ ಉದ್ದ ಹಾಗೂ 220 ಅಡಿ ಅಗಲದಲ್ಲಿ ಬೃಹತ್ ಪೆಂಡಾಲ್ ಹಾಕಲಾಗಿದ್ದು, ಎಸ್‌. ನಿಜಲಿಂಗಪ್ಪ ಪ್ರಧಾನ ವೇದಿಕೆಯಲ್ಲಿ 60 ಅಡಿ ಉದ್ದ ಹಾಗೂ 100 ಅಡಿ ಅಗಲ ಗಣ್ಯರು ಕುಳಿತುಕೊಳ್ಳಲು ಮೀಸಲಿಡಲಾಗಿದೆ. ಈ ವೇದಿಕೆಯಲ್ಲಿ 3 ಭಾಗಗಳು ಇರಲಿದ್ದು, ಮಠಾಧೀಶರು, ಗಣ್ಯರು, ಸಚಿವರು ಕುಳಿತುಕೊಳ್ಳಲು ವ್ಯವಸ್ಥೆ ಮಾಡಲಾಗಿದೆ. ಜೆ.ಎಚ್. ಪಟೇಲ್ ಹೆಸರಿನಲ್ಲಿ ಮತ್ತೊಂದು ವೇದಿಕೆ ಸಿದ್ಧಪಡಿಸಿದ್ದು, ಇಲ್ಲಿ ಗೋಷ್ಠಿಗಳು ನಡೆಯಲಿವೆ. ಎರಡು ಕಡೆ ಸೇರಿ ಸುಮಾರು 40 ಸಾವಿರ ಜನರು ಕುಳಿತುಕೊಳ್ಳಲು ಆಸನಗಳ ವ್ಯವಸ್ಥೆ ಮಾಡಲಾಗಿದೆ. ವೇದಿಕೆಯ ಹೊರಗಡೆ 10 ಕಡೆ ಎಲ್‌ಇಡಿ ಪರದೆಗಳ ವ್ಯವಸ್ಥೆ ಮಾಡಲಾಗಿದೆ.

120 ಮಳಿಗೆಗಳಲ್ಲಿ ಪ್ರದರ್ಶನ:

ಮಹಾ ಅಧಿವೇಶನದ ಅಂಗವಾಗಿ ಬೃಹತ್ ಪೆಂಡಾಲ್ ತುದಿಯಲ್ಲಿ 120 ಮಳಿಗೆಳನ್ನು ಹಾಕಲಾಗಿದ್ದು, ಕೃಷಿ, ಕೈಗಾರಿಕೆ ಸಂಬಂಧಪಟ್ಟ, ಶರಣ ಹಾಗೂ ರೇಣುಕಾ ಪರಂಪರೆಯನ್ನು ಬಿಂಬಿಸುವ ಚಿತ್ರಗಳು, ಪುಸ್ತಕಗಳ ಪ್ರದರ್ಶನ ನಡೆಯಲಿದೆ.

ಅಧಿವೇಶನಕ್ಕೆ ವಿವಿಧ ಬಗೆಯ ಭೋಜನ:

‘ಅಧಿವೇಶನದಲ್ಲಿ 2 ಲಕ್ಷಕ್ಕೂ ಹೆಚ್ಚು ಜನರು ಭಾಗವಹಿಸುವ ನಿರೀಕ್ಷೆ ಇದ್ದು, ಬೆಳಿಗ್ಗೆ, ಮಧ್ಯಾಹ್ನ ಹಾಗೂ ಸಾಯಂಕಾಲ ಉಪಾಹಾರದ ವ್ಯವಸ್ಥೆ ಮಾಡಲಾಗಿದೆ. ಗೋದಿ ಪಾಯಸ, ಲಡ್ಡು, ರೊಟ್ಟಿ, ಚಟ್ನಿ, ಅನ್ನ ಸಾಂಬಾರ್, ಬಜ್ಜಿ, ಪಲ್ಯ, ಚಿತ್ರಾನ್ನ ಇರಲಿದೆ. ಬೆಳಿಗ್ಗೆಯ ಉಪಾಹಾರಕ್ಕೆ ಉಪ್ಪಿಟ್ಟು ಹಾಗೂ ಕೇಸರಿಬಾತ್‌ಗಳನ್ನು ನೀಡಲಾಗುವುದು’ ಎಂದು ಮಹಾಸಭಾದ ಜಿಲ್ಲಾ ಘಟಕದ ಅಧ್ಯಕ್ಷ ದೇವರಮನೆ ಶಿವಕುಮಾರ್ ತಿಳಿಸಿದರು.

ಹೊರ ಜಿಲ್ಲೆಗಳಿಂದ ಬರುವ ಜನರಿಗೆ ಕಲ್ಯಾಣ ಮಂಟಪ, ಖಾಸಗಿ ಶಾಲಾ–ಕಾಲೇಜು, ಹಾಸ್ಟೆಲ್‌ಗಳು, ಸಮುದಾಯ ಭವನ, ಕಲ್ಯಾಣ ಮಂಟಪಗಳು, ವಸತಿ ಗೃಹಗಳಲ್ಲಿ ವ್ಯವಸ್ಥೆ ಮಾಡಲಾಗಿದೆ.

ಮಹಾ ಅಧಿವೇಶನ, ಅಧ್ಯಕ್ಷರ ಸೇವಾವಧಿ ವಿವರ

ಅಧಿವೇಶನ ಸಂಖ್ಯೆ;ಅಧ್ಯಕ್ಷರ ಹೆಸರು;ಅಧಿವೇಶನ ನಡೆದ ಸ್ಥಳ; ಅವಧಿ

1;ಶಿರಸಂಗಿ ಲಿಂಗರಾಜ;ಧಾರವಾಡ;1904–1905

2;ಶಿರಸಂಗಿ ಲಿಂಗರಾಜ;ಬೆಂಗಳೂರು;1905–1906

3;ಕೆ.ಪಿ.ಪುಟ್ಟಣ್ಣ ಚೆಟ್ಟಿ;ಸೊಲ್ಲಾಪುರ;1906–1907

4;ರಾಜಾಲಖಮನಗೌಡ;ಬಾಗಲಕೋಟೆ;1907–1909

5;ವಾರದ ಮಲ್ಲಪ್ಪ;ಬಳ್ಳಾರಿ;1909–1910

6;ಮಾಮಲೆ ದೇಸಾಯಿ;ಬೆಳಗಾವಿ;1910–1911

7;ಅರಟಾಳ ರುದ್ರಗೌಡ;ನಿಪ್ಪಾಣಿ;1911–1917

8;ಕೆ.ಪಿ.ಪುಟ್ಟಣ್ಣ ಚೆಟ್ಟಿ;ದಾವಣಗೆರೆ;1917–1920

9;ಶಾಂತವೀರಪ್ಪ ಮೆಣಸಿನಕಾಯಿ;ಬೀರೂರು;1920–1927

10;ಸಿದ್ಧಪ್ಪ ಕಂಬಳಿ;ಬೆಂಗಳೂರು;1927–1933

11;ಡಾ.ಫಕ್ಕೀರಪ್ಪ ಗುರುಬಸಪ್ಪ ಹಳಕಟ್ಟಿ;ಧಾರವಾಡ;1933–1937

12;ಸಿದ್ದಪ್ಪ ಕಂಬಳಿ;ರಾಯಚೂರು;1937–1938

13;ಎಸ್.ಎಸ್.ಬಸವನಾಳ್‌;ಹುಬ್ಬಳ್ಳಿ;1938–1940

14;ಎಂ.ಎಸ್.ಸರದಾರ್;ಕುಂಭಕೋಣಂ;1940–1945

15;ಸಿ.ಸಿ.ಹುಲಕೋಟಿ;ತುಮಕೂರು;1945–1955

16;ಬಂಥನಾಳ ಸಂಗನಬಸವ ಸ್ವಾಮೀಜಿ;ಬಸವಕಲ್ಯಾಣ;1955–1960

17;ಡಾ.ಡಿ.ಸಿ. ಪಾವಟಿ;ಶಿವಯೋಗ ಮಂದಿರ;1960–1969

18;ಡಾ.ಶಿವಕುಮಾರ ಸ್ವಾಮೀಜಿ;ಮುಂಬೈ;1969–1973

19;ಜೆ.ಬಿ.ಮಲ್ಲಾರಾಧ್ಯ;ಬೆಂಗಳೂರು;1973–1982

20;ಈಶ್ವರ ಮಲ್ಲಪ್ಪ ಮುಗ್ದುಂ;ಮೈಸೂರು;1983–1992

21;ಶರಣಬಸವಪ್ಪ ಅಪ್ಪಾ; ಬೆಳಗಾವಿ;1992–1999

22: ಭೀಮಣ್ಣ ಖಂಡ್ರೆ;ಮೈಸೂರು;1999–2011

23;ಶಾಮನೂರು ಶಿವಶಂಕರಪ್ಪ;ಶ್ರೀಶೈಲ (ಆಂಧ್ರಪ್ರದೇಶ);2012

24;ಶಾಮನೂರು ಶಿವಶಂಕರಪ್ಪ;ದಾವಣಗೆರೆ;2023