ದಾವಣಗೆರೆ | ಅರ್ಥಶಾಸ್ತ್ರ ಅರ್ಥೈಸಲು ‘ಆಕರ್ಷಕ’ ಮಾರ್ಗ: ಚಾರ್ಟ್‌ಗಳ ಲೋಕ ಅನಾವರಣ

ಪೇಪರ್ ಶೀಟ್‌ ಮೇಲೆ ಗೆರೆಗಳನ್ನು ಎಳೆದು ಕೋಷ್ಟಕವನ್ನು ರಚಿಸುವುದು ಸಾಮಾನ್ಯ. ನೀರಸವಾಗಿ ಚಿತ್ರಿಸುವುದಕ್ಕಿಂತ ಅದಕ್ಕೊಂದು ಹೊಸತನ ನೀಡಲಾಗಿದೆ. ಚೆಂದದ ಅಲಂಕಾರ ಮಾಡಿ ಇನ್ನಷ್ಟು ಆಕರ್ಷಣೀಯ ಮಾಡಿರುವುದು ವಿಶೇಷ.  ಚಾರ್ಟ್ ತಯಾರಿಸಲು ಬೇಕಾಗುವ ಪ್ಲೈವುಡ್‌ ಅಂದಾಜು ₹ 100ಕ್ಕೆ ಅಂಗಡಿಯಲ್ಲಿ ಸಿಗುತ್ತದೆ. ಇನ್ನುಳಿದಂತೆ ಮನೆಯಲ್ಲೇ ಸಿಗುವ ನಿರುಪಯುಕ್ತ ವೈರ್‌ಗಳು ಪ್ಲಾಸ್ಟಿಕ್‌ ಹೂ ಟೇಪ್‌ ದಾರ ಬಣ್ಣದ ಪೆನ್ಸಿಲ್ ಮೊದಲಾದ ವಸ್ತುಗಳನ್ನು ವಿದ್ಯಾರ್ಥಿಗಳೇ ಸಂಗ್ರಹಿಸಿ ಕೋಷ್ಟಕಗಳನ್ನು ಗಮನ ಸೆಳೆಯುವಂತೆ ರೂಪಿಸಿದ್ದಾರೆ.

ಈ ಕಾಲೇಜಿನ ವಿದ್ಯಾರ್ಥಿಗಳಿಗೆ ಮಾತ್ರವೇ ಈ ಪ್ರದರ್ಶನ ಸೀಮಿತವಾಗಿಲ್ಲ. ನಗರದ ವಿವಿಧ ಖಾಸಗಿ ಕಾಲೇಜುಗಳ ಅರ್ಥಶಾಸ್ತ್ರ ಹಾಗೂ ವಾಣಿಜ್ಯಶಾಸ್ತ್ರ ವಿಭಾಗದ ವಿದ್ಯಾರ್ಥಿಗಳು ಸರ್ಕಾರಿ ಕಾಲೇಜಿಗೆ ಭೇಟಿ ನೀಡಿ ಮಾಹಿತಿ ಪಡೆಯಲು ಅವಕಾಶ ಕಲ್ಪಿಸಲಾಗಿದೆ. ವಿದ್ಯಾರ್ಥಿಗಳು ತಮ್ಮ ಉಪನ್ಯಾಸಕರ ಜೊತೆ ಬಂದು ಚಾರ್ಟ್‌ಗಳನ್ನು ಅರ್ಥೈಸಿಕೊಳ್ಳಲು ಯತ್ನಿಸುತ್ತಿದ್ದಾರೆ. ಚಾರ್ಟ್ ಸಿದ್ಧಪಡಿಸಿದ ವಿದ್ಯಾರ್ಥಿಗಳು ಅವುಗಳ ಮುಂದೆ ನಿಂತು ವಿವರಣೆಯನ್ನೂ ನೀಡುತ್ತಾರೆ.  ಖಾಸಗಿ ಕಾಲೇಜುಗಳಿಗೆ ದಾಖಲಾಗಿ ಸಾವಿರಾರು ರೂಪಾಯಿ ಶುಲ್ಕ ಭರಿಸುವಷ್ಟು ಶಕ್ತಿ ಇಲ್ಲದ ಆರ್ಥಿಕವಾಗಿ ದುರ್ಬಲ ವರ್ಗಕ್ಕೆ ಸೇರಿದ ಬಹುತೇಕ ವಿದ್ಯಾರ್ಥಿಗಳು ಈ ಕಾಲೇಜಿನಲ್ಲಿ ಓದುತ್ತಿದ್ದಾರೆ. ಅವರಿಗೂ ಸಮರ್ಪಕವಾಗಿ ಪಠ್ಯಕ್ರಮವನ್ನು ಬೋಧಿಸುವ ಉದ್ದೇಶದಿಂದ ಕಂಡುಕೊಂಡ ಈ ಯತ್ನಕ್ಕೆ ಉತ್ತಮ ಸ್ಪಂದನೆ ಸಿಕ್ಕಿದೆ. ಇಲಾಖೆಯ ಉಪನಿರ್ದೇಶಕರು ಭೇಟಿ ನೀಡಿ ಬೆನ್ನು ತಟ್ಟಿದ್ದು ಈ ವಿಧಾನವನ್ನು ರಾಜ್ಯದ ಇತರ ಕಾಲೇಜುಗಳಲ್ಲಿ ಅಳವಡಿಸುವ ಬಗ್ಗೆ ಒಲವು ವ್ಯಕ್ತಪಡಿಸಿದ್ದಾರೆ ಎನ್ನುತ್ತಾರೆ ಉಪನ್ಯಾಸಕ ಷಂಸುದ್ದೀನ್.