ಅತಿವೃಷ್ಟಿ: ಸೊಪ್ಪು ಬೆಳೆಗೆ ಹಾನಿ | ಗ್ರಾಹಕರಿಗೆ ಬೆಲೆ ಏರಿಕೆ ಬಿಸಿ

ಈ ವಾರದಲ್ಲಿ ಕೊತ್ತಂಬರಿ, ಪಾಲಕ್, ಮೆಂಥ್ಯೆ ಸೊಪ್ಪಿನ ಬೆಲೆ ಪ್ರತಿ ಕಟ್ಟಿಗೆ ₹20, ಸಬ್ಬಸಿಗೆ ಪ್ರತಿ ಕಟ್ಟಿಗೆ ₹15, ಪುದೀನ, ಎಳೆ ಅರಿವೆ ಪ್ರತಿ ಕಟ್ಟಿಗೆ ₹10 ದರ ನಿಗದಿಗೊಂಡಿವೆ.

‘ಅಡಿಕೆ ತೋಟಗಳು ಹೆಚ್ಚಾದಂತೆ ಸೊಪ್ಪು ಬೆಳೆ ಪ್ರದೇಶ ಕುಸಿದಿತ್ತು. ಅದರಲ್ಲೂ ಕೆಲವರು ಸೊಪ್ಪು ಬೆಳೆದು ಮಾರಾಟ ಮಾಡಿ ಜೀವನ ಸಾಗಿಸುತ್ತಿದ್ದರು. ತೀವ್ರ ಮಳೆಗೆ ಬೆಳೆದ ಸೊಪ್ಪು ನಲುಗಿದೆ. ಕೊತ್ತಂಬರಿ, ಪಾಲಕ್, ಎಳೆ ಅರಿವೆ, ಸಬ್ಬಸಿಗೆ, ಪುದೀನ ಸೊಪ್ಪಿನ ಬೀಜ ಚೆಲ್ಲಲು ₹6 ಸಾವಿರ ಖರ್ಚು ಮಾಡಿದ್ದೆ. ಚೆಲ್ಲಿದ ಬೀಜ ಮೊಳಕೆಯೊಡೆಯಲಿಲ್ಲಿ. ಹಾಗಾಗಿ ಸೊಪ್ಪಿನ ಲಭ್ಯತೆ ಈ ಭಾಗದಲ್ಲಿ ಇಲ್ಲವೇ ಇಲ್ಲ’ ಎನ್ನುತ್ತಾರೆ ಸೊಪ್ಪು ಬೆಳೆವ ರೈತ ಪ್ರಶಾಂತ್.

‘2 ಎಕರೆಯಲ್ಲಿ 6 ಬಗೆಯ ಸೊಪ್ಪು ಬೆಳೆ ಇತ್ತು. ಅಧಿಕ ಮಳೆಯಿಂದ ಸೊಪ್ಪು ಕೊಳೆತು ಹಳದಿ ಬಣ್ಣಕೆ ತಿರುಗಿದೆ. ಸುಮಾರು ₹70 ಸಾವಿರ ಖರ್ಚು ಮಾಡಿದ್ದೆ. ಸೊಪ್ಪು ಬೆಳೆಯುವುದೇ ನಮ್ಮ ಕಾಯಕ. ಈ ಬಾರಿ ಪೂರ್ಣ ನಷ್ಟ ಅನುಭವಿಸಿದೆ’ ಎನ್ನುತ್ತಾರೆ ದೇವರಹಳ್ಳಿ ರೈತ ರಂಗಪ್ಪ.

‘ದಾವಣಗೆರೆ – ಚಿತ್ರದುರ್ಗದಿಂದ ಸೊಪ್ಪು ಸಗಟು ವ್ಯಾಪಾರದಲ್ಲಿ ಖರೀದಿಸುತ್ತೇನೆ. ಕೊತಂಬರಿ ಸೊಪ್ಪು 100 ಕಟ್ಟಿಗೆ ₹1800 ಕೊಟ್ಟು ತರಬೇಕು. ಪ್ರತಿ ಕಟ್ಟಿಗೆ ₹2 ಲಾಭ ಸಿಗಲಿದೆ. ಸೊಪ್ಪಿನ ಬೆಲೆ ಕೇಳಿ ಕೆಲವರು ಕೊಳ್ಳದೇ ಮುಂದೆ ಸಾಗುತ್ತಾರೆ. ಮಳೆಗಾಲಕ್ಕೆ ಮುಂಚೆ ಕೇವಲ ₹10ಕ್ಕೆ 3 ರಿಂದ 4 ಕಟ್ಟು ಸೊಪ್ಪು ಮಾರುತ್ತಿದ್ದೆ’ ಎನ್ನುತ್ತಾರೆ ಸೊಪ್ಪಿನ ವ್ಯಾಪಾರಿ ಸಾಕಮ್ಮ.

‘ಹೋಟೆಲ್ ನಡೆಸಲು ನಿತ್ಯ 10ರಿಂದ 15 ಕಟ್ಟು ಕೊತ್ತಂಬರಿ ಸೊಪ್ಪು ಬೇಕು. ತಾತ್ಕಾಲಿಕವಾಗಿ ಬೆಲೆ ಏರಿಕೆಯಾಗಿದೆ. ಮಳೆ ಕಡಿಮೆ ಆದಲ್ಲಿ ಬೆಲೆ ಇಳಿಯಬಹುದು’ ಎನ್ನುತ್ತಾರೆ ಉಮಾಕಾಂತ್.