ದಾವಣಗೆರೆ: ಹಳೇ ಬಸ್ಸಾಯಿತು ಇಲ್ಲಿ ಹೊಸ ಶೌಚಾ‌ಲಯ

ದಾವಣಗೆರೆ: ಕೆಎಸ್‌ಆರ್‌ಟಿಸಿ ಬಸ್ ನಿಲ್ದಾಣದಲ್ಲಿ ಕೆಂಪು ಬಸ್‌ವೊಂದು ನಿಂತಿದೆ. ನಮ್ಮೂರಿನ ಕಡೆ ಆ ಬಸ್ ಹೋಗುತ್ತದೆ ಎಂದು ಭಾವಿಸಿ ಬಸ್ಸಿನತ್ತ ಹೋದರೆ ಅಲ್ಲಿ ಸಿಗುವುದು ಮಹಿಳೆಯರ ಹೈಟೆಕ್ ಶೌಚಾಲಯ.

ಶೌಚಾಲಯಗಳನ್ನು ಸಾಮಾನ್ಯವಾಗಿ ಕಾಂಕ್ರೀಟ್ ಕಟ್ಟಡಗಳಲ್ಲಿ ನಿರ್ಮಿಸುವುದು ಸಾಮಾನ್ಯ. ಆದರೆ ಇಲ್ಲಿನ ಹೈಸ್ಕೂಲ್‌ ಮೈದಾನದಲ್ಲಿ ಇರುವ ತಾತ್ಕಾಲಿಕ ಕೆಎಸ್‌ಆರ್‌ಟಿಸಿ ಬಸ್‌ ನಿಲ್ದಾಣದಲ್ಲಿ ಈ ಬಸ್‌ ಶೌಚಾಲಯ ಕಂಡು ಬಂದಿದೆ. ಅಧಿಕಾರಿಗಳು ಅನುಪಯುಕ್ತ ಬಸ್‌ವೊಂದನ್ನು ಶೌಚ ಗೃಹವಾಗಿ ಮಾರ್ಪಡಿಸಿ, ಅಲ್ಲಿ ಅಗತ್ಯ ಮೂಲಸೌಕರ್ಯಗಳನ್ನು ಕಲ್ಪಿಸುವ ಮೂಲಕ ಮಹಿಳೆಯರ ಶೌಚಾಲಯವನ್ನಾಗಿ ಮಾರ್ಪಡಿಸಿದ್ದಾರೆ.

ಹಾಳಾದ ಬಸ್‌ಗೆ ಹೊಸ ರೂಪ: ಈ ಬಸ್ 2011ರಲ್ಲಿ ಸಾರಿಗಾಗಿ ರಸ್ತೆಯಲ್ಲಿ ಓಡಾಡುತ್ತಿತ್ತು. ಕಳೆದ ವರ್ಷದಿಂದ ಸಂಪೂರ್ಣ ಹಾಳಾಗಿ ಗುಜರಿಗೆ ಹಾಕುವ ಸ್ಥಿತಿಗೆ ತಲುಪಿತ್ತು. ಆದರೆ ಕೆಎಸ್‌ಆರ್‌ಟಿಸಿ ಅಧಿಕಾರಿಗಳು ಆ ಬಸ್‌ ಅ‌ನ್ನು ಗುಜರಿಗೆ ಹಾಕದೆ ಕಸದಿಂದ ರಸವನ್ನು ತೆಗೆಯಬೇಕು ಎಂಬ ಉದ್ದೇಶದಿಂದ ಬಸ್‌ ಅ‌ನ್ನು ಹೈಟೆಕ್ ಶೌಚಾಲಯಕ್ಕೆ ಬಳಸಿಕೊಂಡಿದ್ದಾರೆ. ಈ ಮೂಲಕ ವಿನೂತನ ಕಾರ್ಯಕ್ಕೆ ಮುಂದಾಗಿದ್ದಾರೆ. ಇದು ಈಗ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.

₹7 ಲಕ್ಷ ವೆಚ್ಚದಲ್ಲಿ ಬಸ್ ಶೌಚಾಲಯ: ಹಾಳಾದ ಬಸ್‌ ಅನ್ನು ಜನರ ಉಪಯೋಗಕ್ಕೆ ಬರುವಂತೆ ಮಾಡಬೇಕು ಎಂದು ಯೋಜಿಸಿದ ಅಧಿಕಾರಿಗಳು ₹ 7 ಲಕ್ಷ ವೆಚ್ಚದಲ್ಲಿ ಯೋಜನಾ ವರದಿಯನ್ನು ಸಿದ್ಧಪಡಿಸಿಕೊಂಡು ಹೈಟೆಕ್ ಮಾದರಿ ಶೌಚಾಲಯವನ್ನಾಗಿ ಮಾರ್ಪಡಿಸಿದ್ದಾರೆ.

ಏನೇನು ಸೌಲಭ್ಯ: ಈ ಬಸ್‌ ಶೌಚಾಲಯದಲ್ಲಿ ಮಹಿಳೆಯರಿಗಾಗಿ 3 ಇಂಡಿಯನ್ ಶೌಚಾಲಯ, ಒಂದು ವೆಸ್ಟರ್ನ್ ಮಾದರಿ ಶೌಚಾಲಯ. ಮಕ್ಕಳಿಗೆ ಎದೆಹಾಲು ಉಣಿಸಲು ಮತ್ತು ವಿಶ್ರಾಂತಿ ಪಡೆಯಲು ವಿಶೇಷ ಕೊಠಡಿ ಇದೆ. ಶೌಚಾಲಯದಲ್ಲಿ ನೀರಿಗೆ ತೊಂದರೆ ಆಗದಂತೆ ಪ್ರತ್ಯೇಕ ಪೈಪ್‌ಲೈನ್ ಮೂಲಕ ನೀರಿನ ಸೌಲಭ್ಯವನ್ನು ಒದಗಿಸಲಾಗಿದೆ.