ಹುಬ್ಬಳ್ಳಿ: ಬೆಳಗಾವಿ ತಾಲ್ಲೂಕಿನ ಕಿಣಿಯೆ ಗ್ರಾಮದ ಹೆಸರಾಂತ ಪೈಲ್ವಾನ್‌ ಕೆ. ಎಂ. ಪಾಟೀಲ (75) ಭಾನುವಾರ ನಿಧನರಾದರು. ಮೃತರಿಗೆ ಪತ್ನಿ, ಇಬ್ಬರು ಪುತ್ರರು ಹಾಗೂ ಇಬ್ಬರು ಪುತ್ರಿಯರು ಇದ್ದಾರೆ.
ಪಾಟೀಲ ಅವರು ಬೆಳಗಾವಿಯಲ್ಲಿ ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯಲ್ಲಿ ಕುಸ್ತಿ ಕೋಚ್‌ ಆಗಿದ್ದರು. ಅವರ ಗರಡಿಯಲ್ಲಿ ಪಳಗಿದ ರತನ್ ಕುಮಾರ ಮಠಪತಿ, ಶಿವಾಜಿ ಚಿಂಗಳೆ, ಎಂ.ಆರ್. ಪಾಟೀಲ, ವಿನಾಯಕ ದಳವಾಯಿ, ಜಿ.ಎಂ. ನಾಯ್ಕ ಮುಂತಾದವರು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಸಾಧನೆ ಮಾಡಿದ್ದಾರೆ.
ಕೆ.ಎಂ. ಪಾಟೀಲ ಕುಸ್ತಿ ತರಬೇತಿ ಮುಗಿದ ಬಳಿಕ ಪೈಲ್ವಾನರಿಗೆ ಸಂಸ್ಕಾರ, ಬದುಕಿನ ಮೌಲ್ಯಗಳು ಮತ್ತು ಜೀವನ ಸಂಸ್ಕೃತಿ ಬಗ್ಗೆ ತರಗತಿಗಳನ್ನು ತೆಗೆದುಕೊಳ್ಳುವುದು ವಿಶೇಷವಾಗಿತ್ತು.
