ಕಾಲವಾಡ ಗ್ರಾ.ಪಂ: ಶಾಂತಿಯುತ ಮತದಾನ 

ನವಲಗುಂದ: ತಾಲ್ಲೂಕಿನ ಕಾಲವಾಡ ಗ್ರಾಮ ಪಂಚಾಯ್ತಿಗೆ ಸೋಮವಾರ ಶಾಂತಿಯುತ ಮತದಾನ ನಡೆಯಿತು. ವಾರ್ಡ್‌ 1ರಲ್ಲಿ ಶೇ 89.89 ಹಾಗೂ ವಾರ್ಡ 2 ರಲ್ಲಿ ಶೇ 78.50ರಷ್ಟು ಮತದಾನವಾಗಿದೆ.

ಒಟ್ಟು 10 ಸ್ಥಾನಗಳನ್ನು ಹೊಂದಿರುವ ಕಾಲವಾಡ ಗ್ರಾಮ ಪಂಚಾಯ್ತಿಯಲ್ಲಿ ಈ ಮೊದಲೇ ಕರ್ಲವಾಡ ಗ್ರಾಮದ 3 ಸದಸ್ಯರು ಅವಿರೋಧ ಆಯ್ಕೆಯಾದ ಕಾರಣ 7 ಸ್ಥಾನಗಳಿಗೆ ಮಾತ್ರ ಚುನಾವಣೆ ನಡೆಯಿತು. ವಾರ್ಡ್‌ 1ರಲ್ಲಿ 3 ಸದಸ್ಯರನ್ನು ಆಯ್ಕೆ ಮಾಡಬೇಕಾಗಿದ್ದು ಅದರಲ್ಲಿ 11 ಅಭ್ಯರ್ಥಿಗಳು, ವಾರ್ಡ 2 ರಲ್ಲಿ 4 ಸದಸ್ಯರನ್ನು ಆಯ್ಕೆ ಮಾಡಬೇಕಾಗಿದ್ದು ಅದರಲ್ಲಿ 12 ಅಭ್ಯರ್ಥಿಗಳು ಸ್ಪರ್ಧೆ ಮಾಡಿದ್ದಾರೆ. ಕೋವಿಡ್ ಮಾರ್ಗಸೂಚಿಗಳನ್ನು ಅನುಸರಿಸಿ ಮತದಾನ ಮಾಡಲಾಗಿದ್ದು ಶಾಂತಿಯುತ ಮತದಾನ ನಡೆಯಿತು ಎಂದು ಚುನಾವಣಾಧಿಕಾರಿ ಎನ್.ವಿ.ಕುರವತ್ತಿಮಠ ತಿಳಿಸಿದರು.
ಇನ್ನು ತಡಹಾಳ ಗ್ರಾಮ ಪಂಚಾಯ್ತಿಯ ಅರಹಟ್ಟಿ ಗ್ರಾಮದ ಉಪಚುನಾವಣೆಯ 1 ಸ್ಥಾನಕ್ಕೆ 3 ಅಭ್ಯರ್ಥಿಗಳು ಸ್ಪರ್ಧಿಸಿದ್ದರು. ಇಲ್ಲಿ ಶೇ 73 ರಷ್ಟು ಮತದಾನವಾಗಿದೆ.

ಚುನಾವಣೆ ಬಹಿಷ್ಕಾರ: ಯಮನೂರ ಗ್ರಾಮ ಪಂಚಾಯ್ತಿ ವ್ಯಾಪ್ತಿಗೆ ಬರುವ ಆರೇಕುರಹಟ್ಟಿ ಗ್ರಾಮದಲ್ಲಿ ಒಟ್ಟು 8 ಸ್ಥಾನಗಳಿಗೆ ಚುನಾವಣೆ ನಡೆಯಬೇಕಾಗಿತ್ತು. ಆದರೆ ಯುಮನೂರ ಗ್ರಾಮ ಪಂಚಾಯ್ತಿ ಬದಲಾಗಿ ಆರೇಕುರಹಟ್ಟಿಯಲ್ಲಿಯೇ ಗ್ರಾಮ ಪಂಚಾಯ್ತಿ ಮಾಡಬೇಕೆಂದು ಪಟ್ಟು ಹಿಡಿದು ಗ್ರಾಮಸ್ಥರು ಚುನಾವಣೆ ಬಹಿಷ್ಕರಿಸಿದ್ದರಿಂದ ಚುನಾವಣೆ ನಡೆಯಲಿಲ್ಲ.