ಹುಬ್ಬಳ್ಳಿ: ನೈರುತ್ಯ ರೈಲ್ವೆಯ 1.25 ಕಿಲೋಮೀಟರ್ ಉದ್ದದ ಗೂಡ್ಸ್ ರೈಲು ಮೊದಲ ಬಾರಿಗೆ ಹೊಸಪೇಟೆಯಿಂದ ತಿನೈ ಘಾಟ್‌ವರೆಗೆ ಯಶಸ್ವಿಯಾಗಿ ಸಂಚಾರ ನಡೆಸಿ, ಹೊಸ ದಾಖಲೆ ಬರೆಯಿತು. ಹೊಸಪೇಟೆಯಿಂದ ಜುಲೈ 19ರಂದು ಮಧ್ಯಾಹ್ನ 2.35ಕ್ಕೆ ಹೊರಟ ರೈಲು, ಸಂಜೆ 5.25ಕ್ಕೆ ತಿನೈ ಘಾಟ್ ತಲುಪಿತು. 250 ಕಿ.ಮೀ. ದೂರವನ್ನು ಪ್ರತಿ ಗಂಟೆಗೆ 56 ಕಿ.ಮೀ. ವೇಗದಲ್ಲಿ 4 ಗಂಟೆ 50 ನಿಮಿಷದಲ್ಲಿ ಕ್ರಮಿಸಿತು.
ಗೂಡ್ಸ್ ರೈಲುಗಳು ಸಾಮಾನ್ಯವಾಗಿ 59 ಬೋಗಿಗಳನ್ನು ಒಳಗೊಂಡಿರುತ್ತವೆ. ಆದರೆ, ಎರಡು ಗೂಡ್ಸ್‌ಗಳ ಉದ್ದಕ್ಕೆ ಸಮವಾಗಿರುವ ಈ ರೈಲು 117 ಬೋಗಿ, 2 ಬ್ರೇಕ್‌ ವ್ಯಾನ್ ಹಾಗೂ ನಾಲ್ಕು ಲೋಕೊಮೋಟಿವ್ ಎಂಜಿನ್‌ (2 ಮುಂದೆ ಮತ್ತು 2 ಮಧ್ಯ ಭಾಗದಲ್ಲಿ) ಒಳಗೊಂಡಿತ್ತು
‘ಅತಿ ಉದ್ದವಾದ ರೈಲಿನ ಕಾರ್ಯಾಚರಣೆಯು ರೈಲು ಮಾರ್ಗಗಳಲ್ಲಿನ ದಟ್ಟಣೆ ತಗ್ಗಿಸಿ, ರೈಲುಗಳ ವೇಗವನ್ನು ಹೆಚ್ಚಿಸಲು ನೆರವಾಗಲಿದೆ. ಲೋಡಿಂಗ್ ಮತ್ತು ಅನ್‌ಲೋಡಿಂಗ್ ಪಾಯಿಂಟ್‌ಗಳಲ್ಲಿ ಸರಕು ಸಾಗಣೆಯ ಸಾಮರ್ಥ್ಯ ಹೆಚ್ಚಿಸಲಿದೆ’ ಎಂದು ನೈರುತ್ಯ ರೈಲ್ವೆಯ ಪ್ರಧಾನ ವ್ಯವಸ್ಥಾಪಕ ಎ.ಜಿ. ಸಿಂಗ್ ಸಂತಸ ವ್ಯಕ್ತಪಡಿಸಿದ್ದಾರೆ.
