ನಗರದ ಕಿಲ್ಲಾ ಓಣಿ, ವೀರನಾರಾಯಣ ದೇವಸ್ಥಾನ, ಖಾನತೋಟ, ಮದ್ಲಿಓಣಿ, ಗಂಗಾಪುರ ಪೇಟೆ, ನರಿಬಾವಿ ಓಣಿ, ಹಾಳದಿಬ್ಬ ಓಣಿ, ಒಕ್ಕಲಗೇರಿ ಓಣಿ ಸೇರಿದಂತೆ ನಗರದ 17 ಕಡೆಗಳಲ್ಲಿ ಕಾಮ-ರತಿಯರ ಮೂರ್ತಿ ಪ್ರತಿಷ್ಠಾಪನೆ ಮಾಡಲಾಗಿತ್ತು. ಕೋವಿಡ್–19 ಕಾರಣದಿಂದಾಗಿ ಈ ಬಾರಿಯ ಹೋಳಿಯ ಸಂಭ್ರಮ ಆಚೆ ವರ್ಷಗಳಿಗೆ ಹೋಲಿಕೆ ಮಾಡಿ ನೋಡಿದಲ್ಲಿ ತುಂಬ ಕಡಿಮೆ ಇತ್ತು. ಆದರೂ, ನಗರದ ಓಣಿಗಳಲ್ಲಿ ಆಚರಣೆ ಜೋರಾಗಿತ್ತು. ಮನೆ ಮಂದಿ ಅಕ್ಕ ಪಕ್ಕದ ಮನೆಯವರ ಜತೆಗೂಡಿ ಹೋಳಿ ಆಚರಿಸಿದರು. ಹಣೆಗೆ ಬಣ್ಣದ ತಿಲಕವಿಟ್ಟು ಶುಭಾಶಯ ವಿನಿಮಯ ಮಾಡಿಕೊಂಡರು. ಬಣ್ಣದೊಂದಿಗೆ ಖುಷಿಯನ್ನೂ ಹಂಚಿ ಓಕುಳಿ ಹಬ್ಬವನ್ನು ಸಂಪನ್ನಗೊಳಿಸಿದರು.