Coconut Crop Disease: ರಾಜ್ಯದಲ್ಲಿ 4.73 ಲಕ್ಷ ಹೆಕ್ಟೇರ್‌ ತೆಂಗಿಗೆ ರೋಗಬಾಧೆ

ತೆಂಗಿಗೆ ವಿವಿಧ ರೋಗಗಳು ಕಾಡುತ್ತಿದ್ದು ಕಲ್ಪವೃಕ್ಷದ ಉತ್ಪಾದನೆ ಕುಸಿತವಾಗಿದೆ. ಇದರ ಪರಿಣಾಮವಾಗಿ ತೆಂಗಿನ ಉತ್ಪನ್ನಗಳ ಬೆಲೆ ಗಗನಕ್ಕೆ ಏರುತ್ತಿದೆ. ತೆಂಗಿನ ಕಾಯಿಗೆ ₹60 ರಿಂದ ₹75 ಬೆಲೆ ಇದ್ದು ಎಳನೀರಿಗೆ ₹60 ರಿಂದ ₹70 ಬೆಲೆ ಇದೆ. ಕೊಬ್ಬರಿಯ ಧಾರಣೆಯೂ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿದೆ. ಕೊಬ್ಬರಿ ಬೆಲೆ ಕ್ವಿಂಟಲ್‌ಗೆ ₹25 ಸಾವಿರದಿಂದ ₹30ಸಾವಿರ ಇದ್ದರೆ ಒಂದು ತೆಂಗಿನ ಚಿಪ್ಪಿಗೆ ₹2.50ರಿಂದ ₹ 3 ಹಾಗೂ ಒಂದು ಸಾವಿರ ತೆಂಗಿನ  ಸಿಪ್ಪೆಯ (ಮಟ್ಟೆ) ಬೆಲೆ ₹800 ರಿಂದ ₹ 1 ಸಾವಿರವರೆಗಿದೆ. ಹಾಸನ ಜಿಲ್ಲೆಯಲ್ಲಿ ಗುಜರಿ ಸಂಗ್ರಹಿಸುವ ಮಾದರಿಯಲ್ಲಿ ತೆಂಗಿನ ಚಿಪ್ಪು ನಾರನ್ನು ಖರೀದಿಸಲಾಗುತ್ತಿದೆ.