ತಿಳವಳ್ಳಿ | ಮೈ ನವಿರೇಳಿಸಿದ ಹೋರಿ ಹಬ್ಬ

ದೀಪಾವಳಿ ಹಬ್ಬದ ನಂತರ ಗ್ರಾಮೀಣ ಪ್ರದೇಶಗಳಲ್ಲಿ ಹೋರಿ ಬೆದರಿಸುವ ಹಬ್ಬ ಮಹತ್ವ ಪಡೆದಿದ್ದು, ಅಖಾಡದಲ್ಲಿ ಹೋರಿಗಳು ಓಡಿ ಹೋಗುವುದನ್ನು ನೋಡಲು ತಾಲ್ಲೂಕಿನ ವಿವಿಧ ಗ್ರಾಮಗಳು ಸೇರಿದಂತೆ ನೆರೆಯ ತಾಲ್ಲೂಕು, ಜಿಲ್ಲೆಗಳಿಂದ ಭಾರೀ ಸಂಖ್ಯೆಯಲ್ಲಿ ಹೋರಿ ಪ್ರಿಯರು ಆಗಮಿಸಿದ್ದರು. ಅಖಾಡದಲ್ಲಿ ಪೈಲ್ವಾನರ ಕೈಗೆ ಸಿಗದಂತೆ ಹೋರಿಗಳು ಓಡಿ ಹೋಗುವ ದೃಶ್ಯ ನೋಡುಗರ ಮೈನವಿರೇಳಿಸಿತು.

ಅಖಾಡದಲ್ಲಿ ರಾಣೇಬೆನ್ನೂರು ಕಾ ರಾಜಾ, ತಿಳವಳ್ಳಿ ಅಂಬೇಡ್ಕರ್‌ ಹುಲಿ, ತಿಳವಳ್ಳಿ ಜಾಕಿ, ಮೆಂಟಲ್ ರಾಣಿ, ತ್ರಿಶೂಲ, ಕೆಂಚಾಂಬಾ ಎಕ್ಸ್‌ಪ್ರೇಸ್, ಹಾನಗಲ್ಲ ರಾಜಕುಮಾರ, ಆನವಟ್ಟಿ ದೊರೆ, ಮುಂಡಗೋಡ ಬಲರಾಮ, ಎಂ.ಎಸ್.ಬಿ ಸರ್ಕಾರ, 7 ಸ್ಟಾರ್ ಸುಲ್ತಾನ, ಹಾವೇರಿ ಬೆಟ್ಟದ ಹುಲಿ, ದೇವಗಿರಿ ಸಿಂಹಾದ್ರಿ, ಶ್ರೀಗಂಧ, ಮಹಾರಾಜ, ದಂಗೆ, ಬ್ಯಾಡಗಿ ರಾಷ್ಟ್ರಪತಿ, ಹಾವೇರಿ ಹುಲಿ, ಸಿ.ಜಿ.ಬಿ ಸಾಹುಕಾರ, ಓಂಕಾರ, ಜೈಹನುಮಾನ, ರೋಲೆಕ್ಸ್ 107, ಮಾಯಮ್ಮ ಎಕ್ಸ್‌ಪ್ರೇಸ್, ಹಿಂದೂ ಹುಲಿ, ಮುತ್ತೂರು ದ್ರೋಣ, ಭೂ ವೀರಾಪೂರದ ಅಗಸ್ತ್ಯ, ಮುತ್ತಿನಕೊಪ್ಪದ ಚಿನ್ಮಯಿ, ವಾಸನದ ಕೆ.ಡಿ, ಕುರುಕ್ಷೇತ್ರ, ಬಹದ್ದೂರ, ರಾಜರತ್ನ, ಗೌಡ್ರಗುಳಿ, ಹಿಂದೂ ಕೇಸರಿ, ರಾಕ್ಷಸ, ಬೆಟಗೇರಿ ಡಾನ್‌, ಬಾರಂಗಿ ಮಹಾವೀರ, ಅದಿಪತಿ, ಪುನೀತ್‌ ರಾಜ್‌ಕುಮಾರ್‌ ಸವಿನೆನಪಿಗಾಗಿ ಪವರ್‌ ಸ್ಟಾರ್‌ ಸೇರಿದಂತೆ ವಿವಿಧ ಹೆಸರುಗಳ ಹೋರಿಗಳು ಅಖಾಡದಲ್ಲಿ ಓಡಿದವು.

ಹೋರಿ ಹಬ್ಬ ಆಯೋಜಿಸಿದ್ದ ಹುಲಗಡ್ಡಿ ಗ್ರಾಮಸ್ಥರು ಅಖಾಡದಲ್ಲಿ ಎರಡು ಬದಿಯಲ್ಲಿ ಸುರಕ್ಷತಾ ಕ್ರಮ ಕೈಗೊಂಡು ಅಖಾಡದಲ್ಲಿ ಕ್ರಮವಾಗಿ ಒಂದೊಂದೇ ಹೋರಿಗಳನ್ನು ಓಡಿಸಿದರು. ಇದರಿಂದ ಯಾವುದೇ ಅಪಾಯ ಸಂಭವಿಸಲಿಲ್ಲ. ಅಖಾಡದಲ್ಲಿ ಉತ್ತಮವಾಗಿ ಓಡಿದ ಹೋರಿಗಳು ಹಾಗೂ ಬಲ ಪ್ರದರ್ಶನ ತೋರಿದ ಯುವಕರನ್ನು ಗುರುತಿಸಿ ಬಹುಮಾನ ನೀಡಲಾಯಿತು.