ಹಾವೇರಿ:ನಗರದ ರೈಲ್ವೆ ನಿಲ್ದಾಣದ ಹತ್ತಿರದ ಹಕ್ಕಲಮರಿಯಮ್ಮ ಮತ್ತು ನವದುರ್ಗಾ ದೇವಸ್ಥಾನದಲ್ಲಿ ದಸರಾ ಅಂಗವಾಗಿ ನವದುರ್ಗೆಯರಿಗೆ ನಿತ್ಯವೂ ವಿಶೇಷ ಅಲಂಕಾರ ಮಾಡಲಾಗುತ್ತಿದೆ.
ಶೈಲ ಪುತ್ರಿ, ಬ್ರಹ್ಮಚಾರಿಣಿ, ಚಂದ್ರಘಂಟಾ, ಕೂಷ್ಮಾಂಡಾ, ಸ್ಕಂದಮಾತಾ, ಕಾತ್ಯಾಯಿನಿ, ಕಾಲರಾತ್ರಿ, ಮಹಾಗೌರಿ, ಸಿದ್ಧಿದಾತ್ರಿ ದೇವಿಯರಿಗೆ ನವರಾತ್ರಿ ಹಿನ್ನೆಲೆಯಲ್ಲಿ ಪ್ರತಿ ದಿನ ವಿಶೇಷ ಪೂಜೆ ಮಾಡಲಾಗುತ್ತಿದೆ.
ನಿತ್ಯ ಬೆಳಿಗ್ಗೆ ಮತ್ತು ಸಂಜೆ ದೇವರಿಗೆ ಕುಂಕುಮಾರ್ಚನೆ, ಅಭಿಷೇಕ, ದೇವಿ ಪಾರಾಯಣ, ಮಂಗಳಾರತಿ ಸೇರಿದಂತೆ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳನ್ನು ನಡೆಸಲಾಗುತ್ತಿದೆ.ದೇವಿಯರ ಆರಾಧನೆ ಜತೆಗೆ ಇಲ್ಲಿರುವ 37 ದೇವರ ವಿಗ್ರಹಗಳಿಗೂ ವಿಶೇಷ ಪೂಜೆ ಸಲ್ಲುತ್ತಿದೆ.
‘ಪ್ರತಿ ವರ್ಷ ದಸರಾ ಹಬ್ಬದಲ್ಲಿ ನಿತ್ಯ ಚಂಡಿ ಹೋಮ, ದುರ್ಗಾದೇವಿ ಹೋಮಗಳನ್ನು ನೆರವೇರಿಸಿದ್ದೇವೆ. ಈ ಬಾರಿ ಕೋವಿಡ್ ಹಿನ್ನೆಲೆಯಲ್ಲಿ ಈ ಹೋಮಗಳನ್ನು ರದ್ದುಪಡಿಸಲಾಗಿದೆ. ಸರಳ ಪೂಜೆ ಮತ್ತು ವಿಶೇಷ ಅಲಂಕಾರ ನೋಡಲು ಭಕ್ತರು ಬರುತ್ತಿದ್ದಾರೆ’ ಎಂದು ದೇವಸ್ಥಾನದ ಮುಖ್ಯಸ್ಥ ವಾಮನ ಕೃಷ್ಣರಾವ್ ಕೇಳಕರ ತಿಳಿಸಿದರು.