ರಾಣೆಬೆನ್ನೂರು: ಬರಿದಾದ ತುಂಗಭದ್ರಾ ನದಿ ಒಡಲು

ತಾಲ್ಲೂಕಿನ ಮುದೇನೂರು ಬಳಿ ತುಂಗಭದ್ರಾ ನದಿಯಿಂದ ಜಾಕ್‌ವೆಲ್‌ ಮೂಲಕ ನೀರು ತಂದು, ಸಿದ್ಧೇಶ್ವರ ನಗರದಲ್ಲಿ ಶುದ್ಧೀಕರಿಸಿ ನಗರಕ್ಕೆ ನಿರಂತರ ಕುಡಿಯುವ ನೀರಿನ ಯೋಜನೆಯಿಂದ ಎಲ್ಲ ವಾರ್ಡ್‌ಗಳಿಗೆ ನೀರು ಪೂರೈಕೆ ಮಾಡಲಾಗುತ್ತಿತ್ತು. ಈಗ ತುಂಗಭದ್ರಾ ನದಿ ನೀರು ಸಂಪೂರ್ಣ ಬರಿದಾಗಿದ್ದರಿಂದ 35 ವಾರ್ಡ್‌ಗಳಿಗೆ ಕೊಳವೆಬಾವಿಯ ನೀರೇ ಗತಿಯಾಗಿದೆ.

ತಾಲ್ಲೂಕಿನಲ್ಲಿ ಒಟ್ಟು 108 ಗ್ರಾಮಗಳಿದ್ದು, ಅದರಲ್ಲಿ 80 ಗ್ರಾಮಗಳಿಗೆ ಕುದರಿಹಾಳ, ಕರ್ಲಗೇರಿ ಮತ್ತು ಬೈರನಪಾದ ಈ ಮೂರು ಬಹುಗ್ರಾಮ ಕುಡಿಯುವ ನೀರಿನ ಯೋಜನೆಯಿಂದ ನೀರು ಪೂರೈಕೆ ಮಾಡಲಾಗುತ್ತಿತ್ತು. ಎಲ್ಲಾ ಮನೆಗಳಿಗೂ ಮನೆ– ಮನೆಗೆ ಗಂಗೆ, ಜಲಜೀವನ ಯೋಜನೆಯಿಂದ ನೀರು ಸರಬರಾಜು ಮಾಡಲಾಗುತ್ತಿತ್ತು. ನದಿಯಲ್ಲಿ ನೀರು ಇಲ್ಲದ ಕಾರಣ ಎಲ್ಲ ಕಡೆ ಬೋರ್‌ವೆಲ್‌ನಿಂದ ನೀರು ಪೂರೈಕೆ ಮಾಡಿ, ಜನರ ಬಾಯಾರಿಕೆ ನೀಗಿಸಲು ಪ್ರಯತ್ನಿಸಲಾಗುತ್ತಿದೆ.

ನೀರಿಗೆ ಪರದಾಟ:

ಅಡವಿ ಆಂಜನೇಯ ಬಡಾವಣೆಯಲ್ಲಿ 1500ಕ್ಕೂ ಹೆಚ್ಚು ಬಡವರು, ಗುಡಿಸಲು ವಾಸಿಗಳು, ಬಗರಿಕಾರರು, ವೇಷಗಾರರು ವಾಸವಾಗಿದ್ದಾರೆ. ಇವರೆಲ್ಲರೂ ಈಗ ನೀರಿಗಾಗಿ ಪರದಾಡುವಂತಾಗಿದೆ. ಆಂಜನೇಯ ದೇವಸ್ಥಾನದ ಬೋರ್‌ವೆಲ್‌ ಅಥವಾ ಸುತ್ತಮುತ್ತಲಿನ ತೋಟದಿಂದ ನೀರು ತರುವ ಪರಿಸ್ಥಿತಿ ಒದಗಿದೆ. ದೊಡ್ಡ ಕರೆಯಲ್ಲಿ ನೀರು ಬರಿದಾಗಿದ್ದರಿಂದ ಬೋರ್‌ವೆಲ್‌ಗಳು ಕೂಡ ನೀರು ಕಡಿಮೆಯಾಗಿವೆ ಎನ್ನುತ್ತಾರೆ ಸಿದ್ದಣ್ಣ ಹಾದಿಮನಿ.

ತಾಲ್ಲೂಕಿನ ಮೇಡ್ಲೇರಿ, ಚಳಗೇರಿ, ಗಂಗಾಪುರ, ಕುದರಿಹಾಳ, ಕರೂರ, ಸುಣಕಲ್ಲಬಿದರಿ, ಬೆನಕನಕೊಂಡ ಕೆರೆ ಮತ್ತು ಅಸುಂಡಿ ದೊಡ್ಡ ಕೆರೆ ಮತ್ತು ಗುಡಗೂರ ಕೆರೆಯಲ್ಲಿ ನೀರು ತೀವ್ರ ಕಡಿಮೆಯಾಗಿ ಬೋರ್‌ವೆಲ್‌ಗಳ ಅಂತರ್ಜಲಮಟ್ಟ ಕುಸಿದಿವೆ. ಈ ಬಾರಿ ಮುಂಗಾರು ಹಂಗಾಮಿನಿಂದ ಇಲ್ಲಿಯವರೆಗೂ ತುಂಗಾ ಮೇಲ್ದಂಡೆ ಕಾಲುವೆಗೆ ನೀರು ಹರಿಸದ ಕಾರಣ ಜನ ಜಾನುವಾರುಗಳಿಗೆ ಕುಡಿಯುವ ನೀರಿನ ತೊಂದರೆ ಹೆಚ್ಚಾಗಿದೆ.

10 ಕೊಳವೆಬಾವಿ ಬಂದ್‌:

ತಾಲ್ಲೂಕಿನ ಬ್ಯಾಡಗಿ ಮತ ಕ್ಷೇತ್ರದ ವ್ಯಾಪ್ತಿಯ 26 ಹಳ್ಳಿಗಳಲ್ಲಿ 10ಕ್ಕೂ ಹೆಚ್ಚು ಗ್ರಾಮಗಳಲ್ಲಿ ಪ್ರತಿ ವರ್ಷ ಕುಡಿಯುವ ನೀರಿನ ಸಮಸ್ಯೆ ಉಲ್ಬಣವಾಗುತ್ತದೆ. ಜೋಯಿಸರಹರಳಹಳ್ಳಿ ಗ್ರಾಮದಲ್ಲಿ ಡಿಸೆಂಬರ್‌ ತಿಂಗಳಿಂದಲೇ ಸಮಸ್ಯೆ ಎದುರಾಗಿದೆ. ಈ ಗ್ರಾಮವು 5000 ಸಾವಿರಕ್ಕೂ ಹೆಚ್ಚಿನ ಜನಸಂಖ್ಯೆಯನ್ನು ಹೊಂದಿದ್ದು, ನದಿ ನೀರಿನ ಯೋಜನೆಗಳು ಯಾವುದೂ ಇಲ್ಲ. ಒಟ್ಟು 12 ಬೋರ್‌ವೆಲ್‌ಗಳಲ್ಲಿ 10 ಬೋರ್‌ವೆಲ್‌ಗಳಲ್ಲಿ ನೀರು ನಿಂತು ಹೋಗಿದೆ. ಸದ್ಯ 2 ಕೊಳವೆಬಾವಿಗಳಲ್ಲಿ ಮಾತ್ರ ನೀರು ಬರುತ್ತಿದೆ.