ಕಲಬುರ್ಗಿ: ಜಿಲ್ಲೆಯಲ್ಲಿ ಮೂರು ದಿನ ಸಂಪೂರ್ಣ ಲಾಕ್ ಡೌನ್ ಜಾರಿಗೊಳಿಸಿದ್ದು, ಆರಂಭದಿಂದಲೇ ಅದನ್ನು ಬಿಗಿಗೊಳಿಸುವ ಉದ್ದೇಶದಿಂದ ನಗರದಲ್ಲಿ ಗುರುವಾರ ಬೆಳಿಗ್ಗೆಯೇ ಪೊಲೀಸರು ಅಖಾಡಕ್ಕೆ ಇಳಿದರು.
ಬೆಳಗ್ಗೆ 6 ಗಂಟೆಗೆ ಪೊಲೀಸ್ ಅಧಿಕಾರಿಗಳು ಹಾಗೂ ಕಾನ್ ಸ್ಟೆಬಲ್ ಗಳು ವಾಹನ ಸಮೇತ 'ಸಿಟಿ ರೌಂಡ್ಸ್' ಶುರು ಮಾಡಿದರು.
ಜನರು ನಿದ್ದೆಯಿಂದ ಕಣ್ಣುಬಿಡುವ ಹೊತ್ತಿಗೆ ಪೊಲೀಸ್ ವಾಹನಗಳು ಸೈರನ್ ಸದ್ದು ಮಾಡಿದವು. ನಗರದ ಪ್ರಮುಖ ರಸ್ತೆ, ವೃತ್ತ, ಚೌಕಗಳನ್ನು ಸುತ್ತಿದ ಪೊಲೀಸರು, ಅನವಶ್ಯಕವಾಗಿ ಹೊರಗೆ ಬರದಂತೆ ಜನರಿಗೆ ಎಚ್ಚರಿಕೆ ನೀಡಿದರು.
ಎಲ್ಲ ವೃತ್ತಗಳಲ್ಲೂ ಪೊಲೀಸರು ಬೀಡು ಬಿಟ್ಟಿದ್ದು ಜನ- ವಾಹನ ಸಂಚಾರದ ಮೇಲೆ ನಿಗಾ ಇಟ್ಟರು.
ಇಲ್ಲಿನ ಕಣ್ಣಿ ಮಾರ್ಕೆಟ್ಟಿನಲ್ಲಿ ಹಳ್ಳಿಯಿಂದ ಬಂದ ರೈತರು ಹಾಗೂ ಸಗಟು ವ್ಯಾಪಾರಿಗಳು ಗುಂಪುಗೂಡಿ ತರಕಾರಿ ಮಾರುತ್ತಿದ್ದರು. ಪೊಲೀಸ್ ವಾಹನಗಳ ಸಾಲು ಕಂಡು ವ್ಯಾಪಾರಕ್ಕೆ ಬಂದವರೆಲ್ಲ ಅಲ್ಲಿಂದ ಕಾಲ್ಕಿತ್ತರು.
