ಕಲಬುರಗಿ | ಚುನಾವಣಾ ಕರ್ತವ್ಯ ನಿರತರಿಗೆ ‘ಇಡಿಸಿ’: ಮತಚಲಾವಣೆ ಹಕ್ಕು ತಪ್ಪುವ ಆತಂಕ

‘ನಮೂನೆ– 12 ಭರ್ತಿ ಮಾಡಿಕೊಡುವ ಬದಲು ನಮೂನೆ– 12ಎ ‘ಇಡಿಸಿ’ ಕೊಟ್ಟಿದ್ದರಿಂದ ವ್ಯತ್ಯಾಸವಾಗಿದೆ. ಈಗಾಗಲೇ ಸುಮಾರು 70 ಸಿಬ್ಬಂದಿಯನ್ನು ಪತ್ತೆಹಚ್ಚಿ ಪಟ್ಟಿ ಮಾಡಿ ಸಹಾಯಕ ಚುನಾವಣಾ ಅಧಿಕಾರಿಗೆ ಕೊಟ್ಟಿದ್ದೇವೆ. ಅವರು ಪರ್ಯಾಯ ವ್ಯವಸ್ಥೆ ಮಾಡುತ್ತಾರೆ’ ಎಂದು ಹೆಸರು ಬಹಿರಂಗ ಪಡಿಸಲು ಇಚ್ಛಿಸದ ಹಿರಿಯ ಚುನಾವಣಾ ಅಧಿಕಾರಿಯೊಬ್ಬರು ‘ಪ್ರಜಾವಾಣಿ’ಗೆ ತಿಳಿಸಿದರು. ‘ಆಳಂದ ಮತ್ತು ಚಿಂಚೋಳಿಯಲ್ಲಿ ಕರ್ತವ್ಯ ನಿರತರಾದವರು ತಮ್ಮ ಸ್ವ ಕ್ಷೇತ್ರಕ್ಕೆ ಬಂದು ಮತಚಲಾಯಿಸಿ ವಾಪಸ್ ಹೋಗಿ ಮತ್ತೆ ಕರ್ತವ್ಯಕ್ಕೆ ಹಾಜರಿ ಆಗಲು ಸಮಯ ಅವಕಾಶ ಕೊಡುತ್ತಿವೆ. ಮತದಾನದಿಂದ ದೂರಾಗಲು ಯಾರಿಗೂ ಅವಕಾಶ ಮಾಡಿಕೊಡುವುದಿಲ್ಲ’ ಎಂದು ಹೇಳಿದರು.

ಕಲಬುರಗಿ ಕ್ಷೇತ್ರದಲ್ಲಿ ಚುನಾವಣಾ ಕರ್ತವ್ಯಕ್ಕೆ ನಿಯೋಜಿತರಾದ 7129 ಸಿಬ್ಬಂದಿಗೆ ‘ಇಡಿಸಿ’ ಮುದ್ರಿತ ಮತಪತ್ರ ನೀಡಲಾಗಿದೆ ಎಂದು ಚುನಾವಣಾ ನೋಡಲ್ ಅಧಿಕಾರಿಯೊಬ್ಬರು ತಿಳಿಸಿದರು. ಆಳಂದ ಮತ್ತು ಚಿಂಚೋಳಿಯಲ್ಲಿ 364 ‘ಇಡಿಸಿ’ ನೀಡಲಾಗಿದೆ. ಕಲಬುರಗಿ ದಕ್ಷಿಣದಲ್ಲಿ 1392 ಸೇಡಂನಲ್ಲಿ 619 ಗುರುಮಠಕಲ್‌ನಲ್ಲಿ 334 ಜೇವರ್ಗಿಯಲ್ಲಿ 752 ಕಲಬುರಗಿ ಉತ್ತರದಲ್ಲಿ 1397 ಚಿತ್ತಾಪುರದಲ್ಲಿ 419 ಕಲಬುರಗಿ ಗ್ರಾಮೀಣದಲ್ಲಿ 840 ಹಾಗೂ ಅಫಜಲಪುರದಲ್ಲಿ 1012 ಸಿಬ್ಬಂದಿ ‘ಇಡಿಸಿ’ ಪಡೆದಿದ್ದಾರೆ ಎಂದು ಮಾಹಿತಿ ನೀಡಿದರು.