ಕಲಬುರಗಿ | ಚುನಾವಣಾ ಕರ್ತವ್ಯ ನಿರತರಿಗೆ ‘ಇಡಿಸಿ’: ಮತಚಲಾವಣೆ ಹಕ್ಕು ತಪ್ಪುವ ಆತಂಕ

ಚುನಾವಣೆಗೆ ನಿಯೋಜನೆಗೊಳ್ಳುವ ಸಿಬ್ಬಂದಿ ಸ್ವಕ್ಷೇತ್ರದಲ್ಲಿ (ಮತದಾನದ ಅರ್ಹತೆ ಹೊಂದಿರುವ ಲೋಕಸಭಾ ಕ್ಷೇತ್ರ) ಕರ್ತವ್ಯಕ್ಕೆ ನಿಯೋಜನೆಗೊಂಡರೆ ‘ಇಡಿಸಿ’ ಅಥವಾ ಬೇರೆ ಕ್ಷೇತ್ರಕ್ಕೆ ನಿಯೋಜನೆಗೊಂಡಿದ್ದರೆ ಅಂಚೆ ಮತದಾನದ ಪತ್ರ (ಪೋಸ್ಟಲ್‌ ಬ್ಯಾಲೆಟ್‌) ಪಡೆಯುತ್ತಾರೆ. ಅಂಚೆ ಮತದಾನಕ್ಕೆ ನಮೂನೆ–12 ಹಾಗೂ ‘ಇಡಿಸಿ’ಗೆ ನಮೂನೆ– 12ಎ ಅರ್ಜಿಯನ್ನು ಪೂರ್ತಿ ವಿವರಗಳೊಂದಿಗೆ ಭರ್ತಿ ಮಾಡಿ ಸಂಬಂಧಿಸಿದ ಸಹಾಯಕ ಚುನಾವಣೆ ಅಧಿಕಾರಿಗೆ ನೀಡಬೇಕು.

‘ಇಡಿಸಿ’ ಪಡೆದ ಕೆಲವರು ಆಳಂದ ಮತ್ತು ಚಿಂಚೋಳಿ ಕ್ಷೇತ್ರಗಳಲ್ಲಿ ಚುನಾವಣಾ ಕರ್ತವ್ಯಕ್ಕೆ ನಿಯೋಜಿತರಾಗಿದ್ದಾರೆ. ಅವರು ತಮ್ಮ ನೋಂದಾಯಿತ ಕ್ಷೇತ್ರಕ್ಕೆ ಬಂದು ಮತ ಚಲಾಯಿಸಿ, ಮತ್ತೆ ವಾಪಸ್ ಹೋಗಿ ಚುನಾವಣಾ ಕೆಲಸಕ್ಕೆ ಹಾಜರಾಗುವ ಅನಿವಾರ್ಯತೆಯ ಸಂಕಷ್ಟಕ್ಕೆ ಸಿಲುಕ್ಕಿದ್ದಾರೆ. ದೂರದ ತೆಲಂಗಾಣ ಮತ್ತು ಮಹಾರಾಷ್ಟ್ರದ ಗಡಿ ಸಮೀಪದ ರಾಜ್ಯದ ಗ್ರಾಮಗಳ ನಿಯೋಜಿತ ಮತಗಟ್ಟೆಯಲ್ಲಿ ಮಂಗಳವಾರ ಬೆಳಿಗ್ಗೆಯೇ ಇವಿಎಂ ಯಂತ್ರ, ವಿವಿ ಪ್ಯಾಟ್‌ಗಳನ್ನು ಮತದಾರರಿಗಾಗಿ ಅಣಿಗೊಳಿಸಬೇಕು. ಆ ನಂತರ ಅಲ್ಲಿಂದ ತಮ್ಮ ಸ್ವ ಕ್ಷೇತ್ರಕ್ಕೆ ಬಂದು ಮತ ಹಾಕಿ, ಮತ್ತೆ ವಾಪಸ್ ತೆರಳುವ ಸವಾಲು ಕೆಲವು ಸಿಬ್ಬಂದಿಗೆ ಎದುರಾಗಿದೆ.

‘ಅಂಚೆ ಮತಪತ್ರಕ್ಕಾಗಿ ಭರ್ತಿ ಮಾಡಿಕೊಟ್ಟ ನಮೂನೆ–12 ತೆಗೆದುಕೊಳ್ಳಲಿಲ್ಲ. ಅದರ ಬದಲಿಗೆ ನಮೂನೆ 12ಎ (ಇಡಿಸಿ) ಭರ್ತಿ ಮಾಡಿಕೊಂಡು ಪಡೆದರು. ಈಗ ನನಗೆ ಆಳಂದ ಕ್ಷೇತ್ರಕ್ಕೆ ನಿಯೋಜನೆ ಮಾಡಿದ್ದಾರೆ. ನನ್ನ ಮುದ್ರಿತ ‘ಇಡಿಸಿ’ ಕಲಬುರಗಿ ಕ್ಷೇತ್ರದಲ್ಲಿ ಮಾತ್ರ ಹಾಕಬೇಕು. ಚುನಾವಣಾ ಕೆಲಸದ ನಡುವೆ ಕಲಬುರಗಿಗೆ ಬಂದು ಮತ ಹಾಕಿ ವಾಪಸ್ ಹೋಗುವುದು ಕಷ್ಟವಾಗುತ್ತದೆ’ ಎಂದು ಚುನಾವಣಾ ಕರ್ತವ್ಯಕ್ಕೆ ನಿಯೋಜಿತರಾದ ಶಿಕ್ಷಕರೊಬ್ಬರು ‘ಪ್ರಜಾವಾಣಿ’ ಬಳಿ ಅಳಲು ತೋಡಿಕೊಂಡರು.

‘ಕಳೆದ 25 ವರ್ಷಗಳಿಂದ ಚುನಾವಣಾ ಕೆಲಸವನ್ನು ನಿರ್ವಹಿಸುತ್ತಿದ್ದೇನೆ. ಹಿಂದೆಂದೂ ಈ ರೀತಿ ಆಗಿರಲಿಲ್ಲ. ಇದೇ ಮೊದಲ ಬಾರಿಗೆ ಗೊಂದಲವಾಗಿದೆ. ಬೇರೊಂದು ಕ್ಷೇತ್ರಕ್ಕೆ ನಿಯೋಜನೆ ಮಾಡುವುದಾಗಿದ್ದರೆ ‘ಇಡಿಸಿ’ ನೀಡಿದ್ದು ಏಕೆ? ಇನ್ನೂ  ಕೆಲವರಿಗೆ ‘ಇಡಿಸಿ’ ಸಹ ಸಿಕ್ಕಿಲ್ಲ’ ಎಂದು ದೂರಿದರು.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ ನೋಡಲ್ ಅಧಿಕಾರಿ ಸಕ್ರೆಪ್ಪಗೌಡ ಬಿರಾದಾರ, ‘ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ‘ಇಡಿಸಿ’ ಇರಲಿಲ್ಲ. ಅದರ ಬದಲಿಗೆ ಬ್ಯಾಲೆಟ್ ಪೇಪರ್‌ ಇತ್ತು. ಆಳಂದದಲ್ಲಿ ಇದ್ದವರನ್ನು ಚಿಂಚೋಳಿಗೆ, ಚಿಂಚೋಳಿಯವರನ್ನು ಆಳಂದಕ್ಕೆ ನಿಯೋಜಿಸಲಾಗಿತ್ತು. ಸಿಬ್ಬಂದಿಯನ್ನು ರ್‍ಯಾಂಡಮ್ ಆಗಿ ನಿಯೋಜನೆ ಮಾಡಿದ್ದರಿಂದ ಆಳಂದ ಮತ್ತು ಚಿಂಚೋಳಿಗೆ ನಿಯೋಜನೆ ಆದವರಿಗೆ ತೊಂದರೆಯಾಗಿದೆ’ ಎಂದರು.