ತಾಮ್ರವಷ್ಟೇ ಹೊಳಪು, ಬದುಕು ಇಲ್ಲಿ ಮಸುಕು!

ವಿವಿಧ ಪಾತ್ರೆ ಅಂಗಡಿಗಳ ಮಾಲೀಕರು ತಂದು ಕೊಟ್ಟಂತಹ ಕಚ್ಚಾ ವಸ್ತುಗಳಿಂದ ಕೊಡ ಮಾಡುತ್ತಿರುವ ಇಕ್ಬಾಲ್‌ ಕುಟುಂಬದವರು, 1 ಕೆ.ಜಿ. ಕಚ್ಚಾ ತಾಮ್ರಕ್ಕೆ ₨30ರಂತೆ ತೆಗೆದುಕೊಳ್ಳುತ್ತಾರೆ. 2 ಕೆ.ಜಿ.ಗೆ ಒಂದು ಕೊಡ ತಯಾರಿಸುತ್ತಾರೆ. ಒಂದು ಕೊಡಕ್ಕೆ ಇವರಿಗೆ ಸಿಗುವುದು ₨60 ಮಾತ್ರ. ಬೆವರು, ರಕ್ತ ಒಂದು ಮಾಡಿ ದಿನವಿಡೀ ದುಡಿದರೂ ಇವರಿಗೆ ಸಿಗುವುದು ಒಬ್ಬರಿಗೆ ₨150 ಮಾತ್ರ. ಒಂದೇ ಕುಟುಂಬದ 5 ಜನ ಅಣ್ಣ–ತಮ್ಮಂದಿರು ಈ ಕಾಯಕದಲ್ಲಿ ತೊಡಗಿಸಿಕೊಂಡಿದ್ದಾರೆ. ತಲಾ 5ರಂತೆ ಪ್ರತಿದಿನ 25 ಕೊಡಗಳನ್ನು ತಯಾರಿಸುತ್ತಾರೆ. ಅಂಗಡಿ ಮಾಲೀಕರು ಕೊಟ್ಟ ಕಚ್ಚಾ ತಾಮ್ರವನ್ನು ಕಾಯಿಸಿ ತೆಳ್ಳಗೆ ಮೂರು ಭಾಗ ಮಾಡಿ ಅಂಟಿಸುತ್ತಾರೆ.

ಐದು ಜನರು ಮಾಡಿದ ಕೊಡಗಳಿಗೆ ಮನೆಯ ಹಿರಿಯರೊಬ್ಬರು ಕುಳಿತು ಫೈನಲ್‌ ಟಚಪ್‌ ನೀಡುತ್ತಾರೆ ತೇಜಪ್‌ನಿಂದ.
‘ಇಂದಿನ ದಿನಗಳಲ್ಲಿ ಪ್ಲಾಸ್ಟಿಕ್‌ ಬಳಕೆ ಹೆಚ್ಚಾಗುತ್ತಿದೆ. ಹಿರಿಯರು ಬಳಸುತ್ತಿದ್ದ ವಸ್ತುಗಳು ಕಣ್ಮರೆಯಾಗುತ್ತಿವೆ. ಸುಲಭವಾಗಿ ಸಾಗಿಸಬಹುದಾದ ಅಗ್ಗದ ಪ್ಲಾಸ್ಟಿಕ್‌ ವಸ್ತುಗಳೇ ಇದಕ್ಕೆ ಕಾರಣ. ಯಾವುದೇ ಮನೆ ಸಾಮಗ್ರಿಯೂ ಈಗ ಪ್ಲಾಸ್ಟಿಕ್‌ನಲ್ಲಿ ಲಭಿಸುತ್ತಿದೆ. ಪ್ಲಾಸ್ಟಿಕ್‌ ಕೊಡ, ಪ್ಲಾಸ್ಟಿಕ್ ಚರಿಗೆ ಇಂತಹ ಹಲವು ಗೃಹೋಪಯೋಗಿ ವಸ್ತುಗಳು ಇಂದು ಪ್ಲಾಸ್ಟಿಕ್‌ಮಯವಾಗಿದೆ. ಅನಾದಿ ಕಾಲದಿಂದಲೂ ಬಳಸಿಕೊಂಡು ಬಂದಿದ್ದ ತಾಮ್ರದ ವಸ್ತುಗಳು ಕಣ್ಮರೆ ಯಾಗುತ್ತಿವೆ’ ಎಂದು ವಿಷಾದಿಸುತ್ತಾರೆ ಗೃಹಿಣಿ ಸುಶೀಲಮ್ಮ.

‘ಹಿರಿಯರು ತಾಮ್ರದಿಂದ ಅನೇಕ ತರಹದ ವಸ್ತುಗಳನ್ನು ಮಾಡಿಕೊಂಡು ಉಪಯೋಗಿಸುತ್ತಿದ್ದರು. ತಾಮ್ರದ ಕೊಡ, ಟಾಕಿ, ಚರಿಗೆ, ಬಟ್ಟಲು, ಅಡುಗೆ ಪಾತ್ರೆ ಮುಂತಾದ ವಸ್ತುಗಳನ್ನು ತಮಗೆ ಬೇಕಾದ ಆಕಾರದಲ್ಲಿ ಸಿದ್ಧ ಮಾಡಿಕೊಂಡು ಬಳಸುತ್ತಿದ್ದರು. ಈಗ ತಾಮ್ರಕ್ಕೆ ಚಿನ್ನದ ಬೆಲೆ ಬಂದಿದೆ. ಮೊದಲೆಲ್ಲಾ ಮಗಳನ್ನು ಗಂಡನ ಮನೆಗೆ ಕಳಿಸುವಾಗ ತವರು ಮನೆಯವರು ತಾಮ್ರದ ಅನೇಕ ವಸ್ತುಗಳನ್ನು ಕೊಡುತ್ತಿದ್ದರು. ಆದರೆ, ಈಗ ನೆಪ ಮಾತ್ರಕ್ಕೆ ಪೂಜೆಯ ತಂಬಿಗೆ ಕೊಡಲಾಗುತ್ತಿದೆ’ ಎನ್ನುತ್ತಾರೆ ತಂಬಿಗೆ ಖರೀದಿಸಲು ಬಂದ ಶಂಕ್ರಮ್ಮ ಸನಾದಿ.