ನಾಪೋಕ್ಲು (ಕೊಡಗು ಜಿಲ್ಲೆ): ಸಾಂಘಿಕ ಹೋರಾಟ ಮೆರೆದ ಮಂಡೇಪಂಡ ತಂಡದವರು, ಕುಂಡ್ಯೋಳಂಡ ಕಪ್ ಹಾಕಿ ಟೂರ್ನಿಯ ಗುರುವಾರದ ಪಂದ್ಯದಲ್ಲಿ 5–0 ಗೋಲುಗಳಿಂದ ನಾಗಂಡ ತಂಡದ ವಿರುದ್ಧ ಸುಲಭ ಜಯ ಸಾಧಿಸಿದರು.
ಚೆರಿಯಪರಂಬುವಿನ ಜನರಲ್ ಕೆ.ಎಸ್.ತಿಮ್ಮಯ್ಯ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಮಂಡೇಪಂಡ ತಂಡದ ಗೌತಮ್‌ ಹಾಗೂ ಕವನ್‌ ಮುತ್ತಪ್ಪ ತಲಾ 2 ಗೋಲು ಗಳಿಸಿದರೆ, ಚಂದನ್‌ ಒಂದು ಗೋಲನ್ನು ನೆಟ್‌ಗೆ ಸೇರಿಸಿದರು.
ಮತ್ತೊಂದು ಪಂದ್ಯದಲ್ಲಿ ಅರೆಯಡ ತಂಡದವರು ಪೆನಾಲ್ಟಿ ಶೂಟೌಟ್‌ನಲ್ಲಿ 5–4 ಅಂತದಲ್ಲಿ ಕರೋಟಿರ ತಂಡದವರ ವಿರುದ್ಧ ರೋಚಕ ಗೆಲುವು ದಾಖಲಿಸಿದರು. ಚೆರುಮಾದಂಡ ತಂಡದವರೂ ಅದೇ ಅಂತರದಲ್ಲಿ ಬಲ್ಲಚಂಡ ತಂಡದವರನ್ನು ಮಣಿಸಿದರು.
ಕುಪ್ಪಂಡ (ಕೈಕೇರಿ) ತಂಡವು ಬೊಪ್ಪಂಡ ವಿರುದ್ಧ ಹಾಗೂ ಕುಲ್ಲೇಟಿರ ತಂಡವು ಕಲಿಯಾಟಂಡ ವಿರುದ್ಧ 4-0ರಿಂದ ಜಯ ಗಳಿಸಿದವು.
