ಮಳೆಗೆ ಕುಸಿದ ಸಿದ್ದಾಪುರ ಗ್ರಾಮ ಪಂಚಾಯಿತಿ ಚಾವಣಿ

ಕಳೆದ ಹಲವು ವರ್ಷದಿಂದ ಸಿದ್ದಾಪುರ ಗ್ರಾಮ ಪಂಚಾಯಿತಿ ಕಟ್ಟಡ ಶಿಥಿಲಾವಸ್ಥೆಯಲ್ಲಿದ್ದು, ಸಭಾಂಗಣ ಸೇರಿದಂತೆ ಕಚೇರಿಯ ಚಾವಣಿ ಕುಸಿಯುವ ಹಂತದಲ್ಲಿತ್ತು. ಸಭಾಂಗಣದಲ್ಲಿ ಯಾವುದೇ ಸಭೆಗಳನ್ನು ನಡೆಸದಂತೆ ಜಿಲ್ಲಾಧಿಕಾರಿಗಳು ಗ್ರಾ.ಪಂ ಗೆ ಸೂಚನೆ ನೀಡಿದ್ದರು.

ಆ ಬಳಿಕ ಗ್ರಾ.ಪಂ ಸಾಮಾನ್ಯ ಸಭೆ ಸೇರಿದಂತೆ ಗ್ರಾಮ ಸಭೆಗಳನ್ನು ಅದೇ ಸಭಾಂಗಣದಲ್ಲಿ ಮಾಡುತ್ತಿದ್ದು, ಸಾಮಾಜಿಕ ಕಾರ್ಯಕರ್ತ ಹೆ.ಬಿ ರಮೇಶ್ ತಲೆಗೆ ಹೆಲ್ಮೆಟ್ ಧರಿಸಿ ಗ್ರಾಮಸಭೆಗೆ ತೆರಳಿ ಗಮನ ಸೆಳೆದಿದ್ದರು. ಇದೀಗ ಸಭಾಂಗಣದ ಸಮೀಪದಲ್ಲಿರುವ ಕೊಠಡಿಯ ಚಾವಣಿ ಕುಸಿದುಬಿದ್ದಿದೆ.

‘ಗ್ರಾ.ಪಂ ಹಿಂಭಾಗದಲ್ಲಿ ನೂತನ ಕಟ್ಟಡ ಕಾಮಗಾರಿ ಪ್ರಗತಿಯಲ್ಲಿದ್ದು, ಶೀಘ್ರದಲ್ಲೇ ಗ್ರಾ.ಪಂ ಕಚೇರಿಯನ್ನು ಸ್ಥಳಾಂತರ ಮಾಡಲಾಗುವುದು’ ಎಂದು ಗ್ರಾ.ಪಂ ಅಧ್ಯಕ್ಷೆ ರೀನಾ ತುಳಸಿ ತಿಳಿಸಿದ್ದಾರೆ.