ಪಟ್ಟಣ ಪಂಚಾಯಿತಿ ವಾಹನಗಳಿಗೆ ನೋಂದಣಿಯೇ ಇಲ್ಲ!

ಪಟ್ಟಣದ 22 ಸಾವಿರ ಜನಸಂಖ್ಯೆಗೆ 18 ವಾರ್ಡ್‌ಗಳು ಇದ್ದು, ಪ್ರತಿನಿತ್ಯ ಪಟ್ಟಣ ಪಂಚಾಯಿತಿ ಸಿಬ್ಬಂದಿ ಮತ್ತು ಪೌರ ಕಾರ್ಮಿಕರು ಸೇರಿ ಒಟ್ಟು 28 ಜನ ಇದೇ ವಾಹನಗಳನ್ನು ಬಳಸಿ ಕಸ ವಿಲೇವಾರಿ ಮಾಡುತ್ತಾರೆ. ಕಳೆದ ಮೂರ್ನಾಲ್ಕು ವರ್ಷಗಳಿಂದ ನೋಂದಣಿಯಾಗದ ಎಲ್ಲಾ ವಾಹನಗಳನ್ನು ಬಳಸುವ ಪೌರ ಕಾರ್ಮಿಕರ ವಾಹನಗಳು ಅಪಘಾತಕ್ಕೆ ಒಳಗಾದರೆ ಗತಿಯೇನು? ಎನ್ನುವ ಪ್ರಶ್ನೆ ಎದುರಾಗಿದೆ.

2019–20ನೇ ಸಾಲಿನ 14ನೇ ಹಣಕಾಸು ಯೋಜನೆ ಅಡಿಯಲ್ಲಿ ಟ್ರ್ಯಾಕ್ಟರ್‌ ಖರೀದಿ ಮಾಡಲಾಗಿದ್ದು, ಅದನ್ನೂ ನೋಂದಣೆ ಮಾಡಿಲ್ಲ. ಅದರಂತೆ ಮೂರು ಟಾಟಾ ಎಸಿ ವಾಹನಗಳನ್ನು 2016- 2017ನೇ ಸಾಲಿನ 14ನೇ ಹಣಕಾಸು ಯೋಜನೆಯಲ್ಲಿ ಖರೀದಿ ಮಾಡಲಾಗಿದೆ. 2 ನೀರಿನ ಟ್ಯಾಂಕರ್‌ಗಳನ್ನು 2015 ಮತ್ತು 2016ನೇ ಸಾಲಿನಲ್ಲಿ ಖರೀದಿಸಲಾಗಿದೆ. ಸರ್ಕಾರದ ಭಾಗವೇ ಆದ ಪಟ್ಟಣ ಪಂಚಾಯಿತಿ ತನ್ನ ಸುಪರ್ದಿಯಲ್ಲಿರುವ ವಾಹನಗಳನ್ನು ನೋಂದಣಿ ಮಾಡಿಸದಿರುವುದು ಹಲವು ಚರ್ಚೆಗಳಿಗೂ ಕಾರಣವಾಗಿದೆ. 

ತಾವರಗೇರಾ ಪ.ಪಂ. ಮುಖ್ಯಾಧಿಕಾರಿ ನಭೀಸಾಬ ಖುದನ್ನವರ ಈ ಕುರಿತು ಪ್ರತಿಕ್ರಿಯಿಸಿ ‘ಸರ್ಕಾರದ ನಿಯಮಾವಳಿ ಪ್ರಕಾರ ಈಗಾಗಲೇ ನೋಂದಣಿ ಮಾಡಿಸಬೇಕಾಗಿತ್ತು. ನಾನು ಇಲ್ಲಿ ನೇಮಕವಾದ ಕೆಲ ದಿನಗಳಲ್ಲಿಯೇ ಇದೇ ವಿಷಯದ ಕುರಿತು ಆರೋಗ್ಯ ನಿರೀಕ್ಷಕರಿಗೆ ನೋಟಿಸ್‌ ನೀಡಿದ್ದೆ. ನಾಲ್ಕು ದಿನಗಳಲ್ಲಿ ನೋಂದಣಿ ಮಾಡಿಸುವೆ ಎಂದು ಹೇಳಿದರು.