ಮಂಡ್ಯ: ಭತ್ತದ ಬಿತ್ತನೆಗೆ ಹರ್ಷ ತಂದ ವರ್ಷಧಾರೆ

ಕಳೆದ ವರ್ಷ ಮಳೆಯ ತೀವ್ರ ಕೊರತೆಯಿಂದ ರೈತರು ಸಂಕಷ್ಟಕ್ಕೆ ಸಿಲುಕಿದ್ದರು. ಅಣೆಕಟ್ಟೆಯಲ್ಲಿ ನೀರಿನ ಪ್ರಮಾಣ ಕಡಿಮೆ ಇದ್ದ ಕಾರಣ ಬೇಸಿಗೆಯಲ್ಲಿ ಕೃಷಿ ಚಟುವಟಿಕೆಗೆ ನಾಲೆಗಳಿಗೆ ನೀರು ಹರಿಸಿರಲಿಲ್ಲ. ಇದರಿಂದ ‘ಬೇಸಿಗೆ ಬೆಳೆ’ ಬೆಳೆಯಲು ಸಾಧ್ಯವಾಗದೆ ರೈತರು ಸಮಸ್ಯೆ ಎದುರಿಸಿದ್ದರು. 

ಜಿಲ್ಲೆಯಲ್ಲಿ ಈ ಬಾರಿ ಏಪ್ರಿಲ್‌ 1ರಿಂದ ಜುಲೈ ಅಂತ್ಯದವರೆಗೆ 262 ಮಿ.ಮೀ. ವಾಡಿಕೆ ಮಳೆಗೆ 387 ಮಿ.ಮೀ. ಮಳೆ ಸುರಿದಿದ್ದು, ಸರಾಸರಿ ಶೇ 47.5ರಷ್ಟು ಹೆಚ್ಚುವರಿ ಮಳೆಯಾಗಿದೆ. ಇದರಿಂದ ಜಲಾಶಯ, ಕೆರೆ, ನಾಲೆಗಳಿಗೆ ನೀರು ಬಂದಿದ್ದು, ರೈತರು ಸಂತಸದಿಂದ ಕೃಷಿ ಕಾರ್ಯದಲ್ಲಿ ತೊಡಗಿದ್ದಾರೆ.

57 ಸಾವಿರ ಹೆಕ್ಟೇರ್ ಗುರಿ:

ಈ ಬಾರಿ ಜಿಲ್ಲೆಯಲ್ಲಿ 57,700 ಹೆಕ್ಟೇರ್‌ನಲ್ಲಿ ಭತ್ತದ ಬಿತ್ತನೆ ಕಾರ್ಯದ ಗುರಿಯನ್ನು ಕೃಷಿ ಇಲಾಖೆ ಹೊಂದಿದೆ. ಈಗಾಗಲೇ 45 ಹೆಕ್ಟೇರ್‌ನಲ್ಲಿ ಬಿತ್ತನೆ ಕಾರ್ಯವಾಗಿದೆ. ಕೆಸರುಗದ್ದೆಗಳನ್ನು ಹದಗೊಳಿಸಿ, ಭತ್ತದ ಒಟ್ಲು ಬಿಡುವ ಕಾರ್ಯ ಭರದಿಂದ ಸಾಗಿದೆ. ಆಗಸ್ಟ್‌ ಎರಡನೇ ವಾರದಿಂದ ಭತ್ತದ ಪೈರು ನಾಟಿ ಮಾಡುವ ಕಾರ್ಯ ಆರಂಭವಾಗಲಿದೆ.  

ಸಹಾಯಧನದಲ್ಲಿ ವಿತರಣೆ:

‘ಮಂಡ್ಯ ಜಿಲ್ಲೆಯಲ್ಲಿ 4 ಸಾವಿರ ಕ್ವಿಂಟಲ್‌ ಭತ್ತದ ಬಿತ್ತನೆ ಬೀಜವನ್ನು ಜಿಲ್ಲೆಯ ವಿವಿಧ ರೈತ ಸಂಪರ್ಕ ಕೇಂದ್ರಗಳು ಹಾಗೂ 78 ಮಾರಾಟ ಕೇಂದ್ರಗಳಲ್ಲಿ (ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘಗಳು) ದಾಸ್ತಾನು ಮಾಡಲಾಗಿದೆ. ಸಹಾಯಧನದಲ್ಲಿ 481 ಕ್ವಿಂಟಲ್‌ ಭತ್ತದ ಬಿತ್ತನೆ ಬೀಜವನ್ನು ವಿತರಣೆ ಮಾಡಲಾಗಿದೆ’ ಎಂದು ಜಂಟಿ ಕೃಷಿ ನಿರ್ದೇಶಕ ಅಶೋಕ ವಿ.ಎಸ್‌. ‘ಪ್ರಜಾವಾಣಿ’ಗೆ ಮಾಹಿತಿ ನೀಡಿದರು. 

‘ಎಂ.ಟಿ.ಯು– 1001’ ಭತ್ತದ ಬಿತ್ತನೆ ಬೀಜವು 1,959 ಕ್ವಿಂಟಲ್‌, ‘ಐ.ಆರ್‌–64’ ಬಿತ್ತನೆ ಬೀಜ 1,236 ಕ್ವಿಂಟಲ್‌, ‘ಜ್ಯೋತಿ ಭತ್ತ’ 292 ಕ್ವಿಂಟಲ್‌, ‘ಎಂ.ಟಿ.ಯು–1010’ ಬಿತ್ತನೆ ಬೀಜ 100 ಕ್ವಿಂಟಲ್‌, ‘ಬಿ.ಆರ್‌–2655’ ಬಿತ್ತನೆ ಬೀಜ 60 ಕ್ವಿಂಟಲ್‌ ಹಾಗೂ ‘ಆರ್‌.ಎನ್‌.ಆರ್‌–15048’ ಬಿತ್ತನೆ ಬೀಜವು 305 ಕ್ವಿಂಟಲ್‌ ಜಿಲ್ಲೆಗೆ ಸರಬರಾಜಾಗಿದೆ. ಒಟ್ಟಾರೆ ಜಿಲ್ಲೆಗೆ 3,957 ಕ್ವಿಂಟಲ್‌ ಭತ್ತದ ಬಿತ್ತನೆ ಬೀಜ ಸರಬರಾಜಾಗಿದ್ದು, 481 ಕ್ವಿಂಟಲ್ ಅನ್ನು ರೈತರಿಗೆ ವಿತರಿಸಲಾಗಿದೆ’ ಎಂದು ಮಾಹಿತಿ ನೀಡಿದರು.

190 ಕ್ವಿಂಟಲ್‌ ರಾಗಿ ಬಿತ್ತನೆ ಬೀಜ ದಾಸ್ತಾನು:

ಜಿಲ್ಲೆಯಲ್ಲಿ 190 ಕ್ವಿಂಟಲ್‌ ರಾಗಿ ಬಿತ್ತನೆ ಬೀಜವನ್ನು ದಾಸ್ತಾನು ಮಾಡಲಾಗಿದ್ದು, 97 ಕ್ವಿಂಟಲ್‌ನಷ್ಟು ಬಿತ್ತನೆ ಬೀಜವನ್ನು ಸಹಾಯಧನದಲ್ಲಿ ವಿತರಣೆ ಮಾಡಲಾಗಿದೆ. 130 ಕ್ವಿಂಟಲ್‌ ಮುಸುಕಿನ ಜೋಳದ ಬಿತ್ತನೆ ಬೀಜವನ್ನು ದಾಸ್ತಾನು ಮಾಡಲಾಗಿದ್ದು, 30 ಕ್ವಿಂಟಲ್‌ನಷ್ಟು ಬಿತ್ತನೆ ಬೀಜವನ್ನು ರೈತರಿಗೆ ವಿತರಿಸಲಾಗಿದೆ ಎಂದು ಕೃಷಿ ಅಧಿಕಾರಿಗಳು ತಿಳಿಸಿದರು. 

ಶೇ 15.1ರಷ್ಟು ಬಿತ್ತನೆ:

ಜಿಲ್ಲೆಯಲ್ಲಿ ಮುಂಗಾರು ಹಂಗಾಮಿನಲ್ಲಿ 1.92 ಲಕ್ಷ ಹೆಕ್ಟೇರ್‌ ಬಿತ್ತನೆ ಕ್ಷೇತ್ರದ ಗುರಿ ಹಾಕಿಕೊಂಡಿದ್ದು, 29,055 ಹೆಕ್ಟೇರ್‌ನಲ್ಲಿ ವಿವಿಧ ಬೆಳೆಗಳ ಬಿತ್ತನೆ ಪೂರ್ಣಗೊಂಡಿದೆ. ಅಂದರೆ ಶೇ 15.1ರಷ್ಟು ಬಿತ್ತನೆ ಕಾರ್ಯ ಪ್ರಗತಿಯಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 16.7ರಷ್ಟು ಪ್ರಗತಿಯಾಗಿತ್ತು. ಉದ್ದು (ಶೇ 88.5), ಹೆಸರು (ಶೇ 85.1) ಹಾಗೂ ಅಲಸಂದೆ (102.3), ನೆಲಗಡಲೆ (51.7)ರಷ್ಟು ಬಿತ್ತನೆ ಪ್ರಗತಿಯಾಗಿದೆ.