ಹುಣಸೂರು: ಗಂಡು ಹುಲಿ ಸಾವು

ಎಂದಿನಂತೆ ಗುರುವಾರವೂ ಅರಣ್ಯ ಇಲಾಖೆಯ ಸಿಬ್ಬಂದಿ ಅರಣ್ಯದಲ್ಲಿ ಗಸ್ತು ತಿರುಗುತ್ತಿದ್ದಾಗ, ಮಂಟಳ್ಳಿ ವಲಯದಲ್ಲಿ ಹುಲಿಯ ಕಳೆಬರಹ ಪತ್ತೆಯಾಗಿದೆ.

ವಿಷಯ ತಿಳಿದೊಡನೆ ಹುಲಿ ಯೋಜನಾ ನಿರ್ದೇಶಕ ಮಹೇಶ್‌ಕುಮಾರ್,ವೀರನಹೊಸಹಳ್ಳಿ ವಲಯ ಅರಣ್ಯಾಧಿಕಾರಿ ನಾರಾಯಣ ನಾಯಕ, ಪಶು ವೈದ್ಯಾಧಿಕಾರಿ ಡಾ.ಮುಜೀಬುರ್ ರೆಹಮಾನ್, ಎಸಿಎಫ್ ಸತೀಶ್ ನೇತೃತ್ವದ ಅಧಿಕಾರಿಗಳ ತಂಡ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿತು. ಉನ್ನತ ಅಧಿಕಾರಿಗಳ ಸಮ್ಮುಖದಲ್ಲೇ ನಿಯಾವಳಿಯಂತೆ ಮರಣೋತ್ತರ ಪರೀಕ್ಷೆ ನಡೆದಿದೆ.

‘11 ವರ್ಷ ಪ್ರಾಯದ ಗಂಡು ಹುಲಿ ಸ್ವಾಭಾವಿಕವಾಗಿಯೇ ಮೃತಪಟ್ಟಿದೆ. ಹುಲಿಯ ಹಲ್ಲು, ಕಾಲುಗಳ ಉಗುರು ಯಥಾಸ್ಥಿತಿಯಂತೆ ಇವೆ. ಯಾವುದೇ ಅನುಮಾನ ಕಾಣಿಸಿಲ್ಲ’ ಎಂದು ಪ್ರಕಟಣೆ ತಿಳಿಸಿದೆ.