ಮೈಸೂರು: ನಾಲೆ ಉಳಿಸದಿದ್ದರೆ ಪ್ರವಾಹಕ್ಕಿಲ್ಲ ತಡೆ!

ಎನ್‌ಐಇ ಕಾಲೇಜಿನ ಪ್ರೊ.ಎಂ.ಆರ್‌.ಯದುಪತಿ ಪುಟ್ಟಿ ಅವರು 2018ರ ನವೆಂಬರ್‌ನಲ್ಲಿಯೇ  ‘ಪೂರ್ಣಯ್ಯ ನಾಲೆಯ ಪುನರುಜ್ಜೀಕರಣ’ ಸಮೀಕ್ಷಾ ವರದಿಯನ್ನು ಜಿಲ್ಲಾಧಿಕಾರಿಗೆ ಸಲ್ಲಿಸಿದ್ದಾರೆ. ನಾಲೆಯ ಪುನರುಜ್ಜೀವನ ಮಾರ್ಗವನ್ನೂ ತೋರಿದ್ದಾರೆ. l ನಾಲೆಯನ್ನು ನಾಲ್ಕು ಭಾಗಗಳನ್ನು ವಿಂಗಡಿಸಿದ್ದು ನಾಲೆಯ ಕೊನೆಯ ಭಾಗವಾದ ಕುಕ್ಕರಹಳ್ಳಿ ಕೆರೆಯಿಂದ ಆಯಿಷ್‌ವರೆಗಿರುವ ನಾಲೆಯು ಸುಸ್ಥಿತಿಯಲ್ಲಿದ್ದು ಪುನರುಜ್ಜೀವನ ಸುಲಭವಾಗಿದೆ ಎಂದು ಹೇಳಿದ್ದಾರೆ. l ನಾಲೆಯ 2ನೇ ವಿಭಾಗವು ಎಸ್‌ಜೆಸಿಇ ಕಾಲೇಜಿನ ಪಶ್ಚಿಮ ಭಾಗದಿಂದ ಬೋಗಾದಿ ರಸ್ತೆ ಬಿಸಿಲು ಮಾರಮ್ಮನ ದೇವಸ್ಥಾನ ಆಯಿಷ್ ಸಂಸ್ಥೆವರೆಗಿದೆ. 2.5 ಕಿಮೀ ಉದ್ದವಿರುವ ಈ ಭಾಗವನ್ನು ಪುನರುಜ್ಜೀವನಗೊಳಿಸಿದರೆ ಕುಕ್ಕರಹಳ್ಳಿ ಕೆರೆಗೆ ದೊರೆಯುವ ಮಳೆಯ ನೀರಿನ ಪ್ರಮಾಣವು ಶೇ 60ರಷ್ಟು ಹೆಚ್ಚಲಿದೆ. ಕೆಲವು ಭಾಗ ಒತ್ತುವರಿಯಾಗಿದ್ದು ಇದನ್ನು ತೆರವುಗೊಳಿಸಬೇಕು ಎಂದು ತಿಳಿಸಿದ್ದಾರೆ. l ನಾಲೆಯ 3ನೇ ಭಾಗವು ನಗರಾಭಿವೃದ್ಧಿ ಕಾರಣ ಬಹುಪಾಲು ಒತ್ತುವರಿಯಾಗಿದೆ. ನಾಲೆಯನ್ನು ಗುರುತಿಸಲು ಸಾಧ್ಯವಾಗದ ಸ್ಥಿತಿಯಲ್ಲಿದೆ. l ನಾಲೆಯ 4ನೇ ಭಾಗದಲ್ಲಿ ನಗರಾಭಿವೃದ್ಧಿ ಇನ್ನೂ ಪೂರ್ಣವಾಗಿ ಆಗಿಲ್ಲ. ಹೀಗಾಗಿ ನಾಲೆಯು ನೆಲದ ಮೇಲೆ ಗೋಚರವಿದ್ದು ತಕ್ಷಣದಲ್ಲಿ ಕಾರ್ಯಪ್ರವೃತ್ತವಾದರೆ ಜಿಲ್ಲಾಡಳಿತ ಉಳಿಸಿಕೊಳ್ಳಬಹುದಾದ ಭಾಗ ಎಂದು ವಿವರಿಸಿದ್ದಾರೆ.