ರಾಯಚೂರು: ಮೌಢ್ಯದಿಂದ ಭೂತ ಬಂಗಲೆಯಾದ ಸಾಂಸ್ಕೃತಿಕ ಭವನ!

ಹಟ್ಟಿ ಹೊಸೂರು ಗ್ರಾಮದ ಜನತೆಯ ಅನುಕೂಲಕ್ಕಾಗಿ ₹10 ಲಕ್ಷ ವೆಚ್ಚದಲ್ಲಿ ಸಾಂಸ್ಕೃತಿಕ ಭವನ ನಿರ್ಮಿಸಲಾಗಿತ್ತು. ಗ್ರಾಮದಲ್ಲಿ ಏನೇ ಕಾರ್ಯಕ್ರಮ ಇದ್ದರೂ ಜನತೆಗೆ ಅನುಕೂಲವಾಗಲಿ ಎಂಬ ಉದ್ದೇಶದಿಂದ ಭವನ ನಿರ್ಮಿಸಲಾಗಿತ್ತು. ಆದರೆ ಒಂದು ದಿನವೂ ಬಳಕೆಗೆ ಬಂದಿಲ್ಲ ಎಂದು ಗ್ರಾಮಸ್ಧರು ಹೇಳುತ್ತಾರೆ.

ಗ್ರಾಮದ ಹೊರ ಹೊಲಯದಲ್ಲಿ ಈ ಭವನ 1998ರಲ್ಲಿ ನಿರ್ಮಾಣ ಮಾಡಲಾಗಿದೆ. ಸಾಂಸ್ಕೃತಿಕ ಭವನ ಊರ ಹೊರಗಿದೆ. ಜತೆಗೆ ಸ್ಮಶಾನದ ಪಕ್ಕದಲ್ಲಿದೆ ಎಂದು ಮೌಢ್ಯಗಳನ್ನು ನಂಬುವ ಜನತೆ  ಬಳಕೆ ಮಾಡಲು ಹಿಂಜರಿದಿದ್ದಾರೆ. ಮದುವೆ ಅಥವಾ ಇತರ ಕಾರ್ಯಕ್ರಮಗಳು ನಡೆದಾಗ ಜನವಸತಿಗಾಗಿ ಭವನ ನಿರ್ಮಿಸಲಾಗಿದ್ದರೂ ಜನತೆ ಮಾತ್ರ ಇದರ ಬಳಕೆಗೆ ಮುಂದೆ ಬಾರದಿರುವುದು ನಡೆದಿದೆ. ₹20 ವರ್ಷಗಳಿಂದ ಆ ಭವನ ಪಾಳು ಬಿದ್ದಿದೆ ಎಂದು ಆದಪ್ಪ, ಶಿವಪ್ಪ, ಅಮರೇಶ, ಗ್ರಾಮಸ್ಧರು ತಿಳಿಸುತ್ತಾರೆ.

ಜನತೆ ಭವನ ಬಳಕೆಗೆ ಹಿಂದೇಟು ಹಾಕಿದ್ದರಿಂದ ಭವನ ಇದೀಗ ಸಂಪೂರ್ಣವಾಗಿ ಪಾಳು ಬಿದ್ದಿದೆ. ಭವನದ ಎಲ್ಲಾ ಬಾಗಿಲು, ಕಿಟಕಿಗಳು ಸೇರಿದಂತೆ ಇತರ ಸಾಮಾಗ್ರಿ ಸಂಪೂರ್ಣ ಹಾಳಾಗಿವೆ. ಗ್ರಾಮದ ಪುಂಡ-ಪೋಕರಿಗಳಿಗೆ ಆಶ್ರಯ ತಾಣವಾಗಿದ್ದು, ಅದರಲ್ಲಿ ಮದ್ಯಸೇವನೆ ಸೇರಿದಂತೆ ನಾನಾ ಅನೈತಿಕ ಚಟುವಟಿಕೆಗಳು ನಡೆಯುವಂತಾಗಿದೆ ಎಂದು ಹೇಳುತ್ತಾರೆ. ಮೌಢ್ಯದಿಂದಾಗಿ ಕಟ್ಟಡ ಬಳಕೆಗೆ ಬಾರದಂತಾಗಿ, ಸರ್ಕಾರದ ಹಣ ವ್ಯರ್ಥವಾದಂತಾಗಿದೆ.

ಅಮರೇಗೌಡ ಬಯ್ಯಾಪುರ ಪಾಟೀಲ್ ಶಾಸಕರಾಗಿದ್ದಾಗ ಈ ಭವನವನ್ನು ನಿರ್ಮಿಸಿದ್ದರು. ಜನರು ಅದರ ಸದ್ಬಳಕೆಗೆ ಮುಂದಾಗುವಂತೆ ಪ್ರಜ್ಞಾವಂತರು ಜಾಗೃತಿ ಮೂಡಿಸಬೇಕಾಗಿದೆ ಬಸವರಾಜ ಭೋವಿ ಗ್ರಾಮಸ್ಥ