ಹಟ್ಟಿಚಿನ್ನದಗಣಿ | ಸೇವಾ ಬಡ್ತಿಯ ಮುನಿಸು: ಚಿನ್ನ ಉತ್ಪಾದನೆಗೆ ಅಡ್ಡಿ

ಕಾರ್ಮಿಕರ ಗೈರಿಗೆ ಅನಾರೋಗ್ಯ, ಸುರಕ್ಷತಾ ಉಪಕರಣಗಳ ಕೊರತೆ ಹಾಗೂ ಸೇವಾ ಬಡ್ತಿ ನೀಡದಿರುವುದು ಮುಖ್ಯ ಕಾರಣ ಎಂಬ ಆರೋಪ ಕೇಳಿಬಂದಿದೆ.

ಗಣಿ ಕಂಪನಿಯ ನಿರ್ದೇಶಕರ ಮಂಡಳಿ ನೀಡಿದ ವಾರ್ಷಿಕ ಚಿನ್ನ ಉತ್ಪಾದನೆ ಗುರಿ ತಲುಪಬೇಕು. ಶೇಕಡಾ ನೂರರಷ್ಟಲ್ಲದಿದ್ದರೂ, ಶೇ 80ರಷ್ಟಾದರೂ ಉತ್ಪಾದನೆಯಲ್ಲಿ ಗುರಿ ಮುಟ್ಟಬೇಕು. ಗುರಿ ತಲುಪಲು ಅಧಿಕಾರಿಗಳ ಮೇಲೆ ಒತ್ತಡದ ಹಾಕಲಾಗುತ್ತದೆ. ಈ ನಡುವೆಯೂ ಕಾರ್ಮಿಕರು ಗೈರಾಗುತ್ತಿರುವುದು ಆಡಳಿತ ಮಂಡಳಿಗೆ ತಲೆ ಬಿಸಿ ಮಾಡಿದೆ.

ಮಲ್ಲಪ್ಪ ಶಾಫ್ಟ್-470, ಸೆಂಟ್ರಲ್ ಶಾಫ್ಟ್-190, ವಿಲೇಜ್ ಶಾಫ್ಟ್-61, ತಾಂತ್ರಿಕ ವಿಭಾಗ-131, ಲೋಹ ವಿಭಾಗ-77, ಊಟಿ ಹಾಗೂ ಹೀರಾ ಬುದ್ದಿನ್ನಿ ಗಣಿಗಳಲ್ಲಿ-97, ಉಳಿದಂತೆ ಅಡ್ಮಿನ್, ಆಸ್ಪತ್ರೆ, ಕ್ಯಾಂಟೀನ್, ಭದ್ರತಾ ವಿಭಾಗ ಸೇರಿದಂತೆ ಒಟ್ಟು 1,054 ಕಾರ್ಮಿಕರು ಕೆಲಸಕ್ಕೆ ಗೈರಾಗುತ್ತಿದ್ದಾರೆ ಎಂದು ಗಣಿ ಕಂಪನಿಯ ಅಧಿಕಾರಿ ಹೇಳುತ್ತಾರೆ.

ಕಾರ್ಮಿಕರು ಗೈರಾಗುತ್ತಿರುವ ಪರಿಣಾಮ ನಾಲ್ಕು ಅಧಿಕಾರಿ ಒಳಗೊಂಡ ತಂಡವು ಸಿಬ್ಬಂದಿ ಹಾಗೂ ಕಾರ್ಮಿಕರ ಮನೆಗಳಿಗೆ ತೆರಳಿ ಸಮಾಲೋಚನೆ ಮಾಡಿ ಕರ್ತವ್ಯಕ್ಕೆ ಹಾಜರಾಗುವಂತೆ ಮನವೊಲಿಸಲು ಯತ್ನಿಸಿದೆ. ಆದರೂ ಪರಿಹಾರ ಕಾಣುತ್ತಿಲ್ಲ. ಅನುಕಂಪದ ಆಧಾರದ ಮೇಲೆ ಹಾಗೂ ಭೂಮಿ ಕಳೆದುಕೊಂಡ ಸಂತ್ರಸ್ತರ ಕುಟುಂಬದ ಮಹಿಳಾ ಕಾರ್ಮಿಕರನ್ನು ಉತ್ಪಾದನಾ ಕ್ಷೇತ್ರದಲ್ಲಿ ಬಳಸಿಕೊಳ್ಳಲು ಆಗುತ್ತಿಲ್ಲ.