ಮಂಗಳವಾರ, ಆಗಸ್ಟ್ 3, 2021
21 °C

ಪಪ್ಪಾಯದಿಂದ ಸಂತೃಪ್ತ ಜೀವನ ಕಂಡುಕೊಂಡ ಯುವ ರೈತ

ಮಲ್ಲಿಕಾರ್ಜುನ್‌ ಎಂ.ಎಂ Updated:

ಅಕ್ಷರ ಗಾತ್ರ : | |

Prajavani

ಆನಂದಪುರ: ಆಧುನಿಕ ಯುಗದಲ್ಲಿ ಯುವಕರು ಉದ್ಯೋಗಕ್ಕಾಗಿ ನಗರಗಳಿಗೆ ವಲಸೆ ಹೋಗುತ್ತಿರುವ ಸಂದರ್ಭದಲ್ಲಿ ತಮ್ಮ ಹಳ್ಳಿಯಲ್ಲಿಯೇ ಉತ್ತಮ ಕೃಷಿ ಮಾಡಿರುವ ಯುವ ರೈತ ಗಣೇಶ್‌ ಸಾಧನೆಯ ಹಾದಿಯಲ್ಲಿದ್ದಾರೆ.

ಸಾಗರ ತಾಲ್ಲೂಕಿನ ಆನಂದಪುರ ಸಮೀಪದ ಕೆರೆಹಿತ್ಲು ಗ್ರಾಮದ ಕೃಷಿಕ ಗಣೇಶ್‌ ಕೃಷಿಯಲ್ಲಿ ತೊಡಗಿಕೊಳ್ಳುವ ಮೂಲಕ ಆದಾಯ ಮೂಲವನ್ನು ಕಂಡುಕೊಂಡಿದ್ದಾರೆ. ಕೃಷಿಯಲ್ಲಿಯೂ ಉತ್ತಮ ಸಾಧನೆ ಮಾಡಿ ಕೈತುಂಬ ಆದಾಯ ಪಡೆಯಬಹುದು ಎಂಬುದನ್ನು ತೋರಿಸುವ ಮೂಲಕ ಸದಾ ಕೆಲಸದಲ್ಲೇ ತಮ್ಮ ಜೀವನ ಕಳೆಯುವ ನಗರ ಉದ್ಯೋಗಿಗಳ ಮುಂದೆ ನೆಮ್ಮದಿಯ ಬದುಕು ಕಟ್ಟಿಕೊಳ್ಳುತ್ತಿದ್ದಾರೆ.

ಮೊದಲು ವಿವಿಧ ರೀತಿಯ ಸ್ವಂತ ಉದ್ಯೋಗಗಳಿಗೆ ಕೈ ಹಾಕಿದರು. ಇದರಿಂದ ಸಮಯಕ್ಕೆ ಸರಿಯಾಗಿ ಹೂಡಿದ ಬಂಡವಾಳ ಸಹ ಸಿಗಲಿಲ್ಲ. ಕೆಲವರು ಹಣ ನೀಡದೆ ದಿನ ಮುಂದೂಡುತ್ತಾ ಹೋದರು. ಸಾಲದ ಸುಳಿಗೆ ಸಿಲುಕುವ ಸಂದರ್ಭದಲ್ಲಿ ಅವರ ಬದುಕು ಕೃಷಿಯಿಂದ ಹಸನಾಯಿತು.

ಎರಡು ವರ್ಷಗಳಿಂದ ಪಪ್ಪಾಯ ಬೆಳೆಯುವ ಮೂಲಕ ಯಶಸ್ಸು ಕಂಡಿದ್ದಾರೆ. ಮೊದಲು ಒಂದು ಎಕರೆಯಲ್ಲಿ ಪಪ್ಪಾಯ ಬೆಳೆದಿದ್ದರು. ಇದರಿಂದ ಉತ್ತಮ ಆದಾಯ ಪಡೆದ ಕಾರಣ ಪ್ರಸ್ತುತ 4 ಎಕರೆಯಲ್ಲಿ ಪಪ್ಪಾಯ ಬೆಳೆದಿದ್ದಾರೆ. ಜತೆಗೆ ಅಡಿಕೆ ಗಿಡಗಳನ್ನು ಸಹ ನೆಟ್ಟಿದ್ದಾರೆ. 

‘ದಾವಣಗೆರೆಯಿಂದ ಒಂದು ಗಿಡಕ್ಕೆ ₹ 18ಕ್ಕೆ ಖರೀದಿ ಮಾಡಿ ತಂದಿದ್ದೇವೆ. ಕೊಳವೆಬಾವಿ ಸೇರಿ ಸುಮಾರು ₹ 4 ಲಕ್ಷ ಖರ್ಚು ಮಾಡಲಾಗಿದೆ. ಕೃಷಿ ಮಾಡಿದ 10 ತಿಂಗಳಿಂದ ಸುಮಾರು 3 ವರ್ಷದವರೆಗೆ ನಿರಂತರ ಆದಾಯ ಸಿಗುತ್ತದೆ’ ಎಂದು ಗಣೇಶ್ ವಿವರಿಸಿದರು.

‘ಪಪ್ಪಾಯಿಯ ಒಂದು ಕಾಯಿ ಸುಮಾರು 2ರಿಂದ 3 ಕೆ.ಜಿ. ಬರುತ್ತದೆ. ತಿಂಗಳಿಗೆ 8ರಿಂದ 10 ಕ್ವಿಂಟಲ್‌ ಸಿಗುತ್ತದೆ. ಒಂದು ಕೆ.ಜಿ.ಗೆ ₹ 10 ಸಿಗುತ್ತದೆ. ವ್ಯಾಪಾರಸ್ಥರು ತೀರ್ಥಹಳ್ಳಿಯಿಂದ ಮನೆಬಾಗಿಲಿಗೆ ಬಂದು ಪಪ್ಪಾಯ ತೆಗೆದುಕೊಂಡು ಹೋಗುವುದರಿಂದ ಮಾರಾಟದ
ಸಮಸ್ಯೆ ಇಲ್ಲದಂತಾಗಿದೆ’ ಎನ್ನುವರು ಗಣೇಶ್‌.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು