ಶಿವಮೊಗ್ಗ: ಆನ್‌ಲೈನ್‌ನಲ್ಲೇ ಪದವಿ ಪ್ರಮಾಣ ದೃಢೀಕರಣ

ಶಿವಮೊಗ್ಗ: ಕುವೆಂಪು ವಿಶ್ವವಿದ್ಯಾಲಯ ಹೊಸದಾಗಿ ಪರಿಚಯಿಸಿದ ‘ಮೈ ವೆರಿಫಿಕೇಷನ್ ಸಿಸ್ಟಂ’ ತಂತ್ರಾಂಶದ ಮೂಲಕ ಪದವೀಧರರು ತಮ್ಮ ಸೆಮಿಸ್ಟರ್ ಅಂಕಪಟ್ಟಿ, ತಾತ್ಕಾಲಿಕ ಪದವಿ ಪ್ರಮಾಣಪತ್ರಗಳ ನೈಜತೆಯ ದೃಢೀಕರಣವನ್ನು ಆನ್‌ಲೈನ್‌
ನಲ್ಲೇ ಪಡೆಯಬಹುದು.

ಕೆಲವು ವರ್ಷಗಳ ಹಿಂದೆ ವಿಶ್ವವಿದ್ಯಾಲಯದಲ್ಲಿ ನಕಲಿ ಅಂಕಪಟ್ಟಿಯ ಆರೋಪಗಳು ಕೇಳಿಬಂದಿತ್ತು. ಪದವಿ ಅಂಕಪಟ್ಟಿಗಳನ್ನು
ವಾಮಮಾರ್ಗದ ಮೂಲಕ ಹಲವರು ಪಡೆದುಕೊಂಡಿದ್ದಾರೆ ಎಂಬ ಕುರಿತು ಸುದೀರ್ಘ ತನಿಖೆ ನಡೆದಿತ್ತು. ಇಂತಹ ವಾಮಮಾರ್ಗಗಳಿಗೆ ತಿಲಾಂಜಲಿ ನೀಡಿ, ವಿಶ್ವವಿದ್ಯಾಲಯದಲ್ಲಿ ಅಧಿಕೃತವಾಗಿ ಕಲಿತ ವಿದ್ಯಾರ್ಥಿಗಳ ಅಂಕಪಟ್ಟಿ ನೈಜತೆ ದೃಢೀಕರಿಸಲು ಕುವೆಂಪು ವಿಶ್ವವಿದ್ಯಾಲಯ ಹೊಸ ತಂತ್ರಾಂಶ ಅಳವಡಿಸಿದೆ.

ಏನಿದು ಇ–ವೆರಿಫಿಕೇಷನ್ ತಂತ್ರಾಂಶ

ಈ ತಂತ್ರಾಂಶದಲ್ಲಿ ಪದವಿ ಪಡೆದ ಎಲ್ಲ ವಿದ್ಯಾರ್ಥಿಗಳ ದಾಖಲಾತಿ ಅಳವಡಿಸಲಾಗುತ್ತದೆ. ವಿದ್ಯಾರ್ಥಿ ಯಾವುದೇ ಸಮಯದಲ್ಲಿ ನಿಗದಿತ ಶುಲ್ಕ ಪಾವತಿಸಿ ಆನ್‌ಲೈನ್‌ನಲ್ಲೇ ಅಂಕಪಟ್ಟಿ, ಪದವಿ ಪ್ರಮಾಣಪತ್ರದ ನೈಜತೆ ಪರಿಶೀಲಿಸಬಹುದು. ದೃಢೀಕೃತ ಪ್ರಮಾಣಪತ್ರ ಪಡೆಯಬಹುದು.

‘ಹೊಸ ವ್ಯವಸ್ಥೆ ಅಳವಡಿಕೆಯಿಂದ ವಿದ್ಯಾರ್ಥಿಗಳು ಅನವಶ್ಯಕವಾಗಿ ವಿಶ್ವವಿದ್ಯಾಲಯಕ್ಕೆ ಅಲೆಡಾಡುವುದು ತಪ್ಪುತ್ತದೆ. ಸಮಯ, ಶ್ರಮ ಉಳಿತಾಯವಾಗಲಿದೆ’ ಎಂದು ಪರೀಕ್ಷಾಂಗ ವಿಭಾಗದ ಉಪ ಕುಲಸಚಿವ ಡಾ.ಕೆ. ಯೋಗೇಂದ್ರ ಮಾಹಿತಿ ನೀಡಿದರು. 

ಪರಿಶೀಲನಾ ಪ್ರಕ್ರಿಯೆ ಹೇಗೆ?

ಕುವೆಂಪು ವಿಶ್ವವಿದ್ಯಾಲಯದ ವೆಬ್‌ಸೈಟ್ ವಿಳಾಸ KUVEMPU.AC.IN ನಲ್ಲಿ ‘ಮೈ ವೆರಿಫಿಕೇಷನ್ ಸಿಸ್ಟಂ ಪೇಜ್ ಇರುತ್ತದೆ, ಅಲ್ಲಿ ವಿದ್ಯಾರ್ಥಿಗಳ ಸಂಪೂರ್ಣ ಮಾಹಿತಿ ನೀಡಲಾಗಿದೆ. ಅಲ್ಲಿ ನೋಂದಣಿ ಮಾಡಿಕೊಂಡ ನಂತರ ಪ್ರತಿಯೊಬ್ಬ ವಿದ್ಯಾರ್ಥಿಗೆ ಪ್ರತ್ಯೇಕ ಯೂಸರ್‌ ಐಡಿ ಮತ್ತು ಪಾಸ್‌ವರ್ಡ್‌ ನೀಡಲಾಗುತ್ತದೆ. ಪೋರ್ಟಲ್‍ನಲ್ಲಿ ಲಾಗಿನ್ ಆದ ವಿದ್ಯಾರ್ಥಿಯು ನಿರ್ದಿಷ್ಟಪಡಿಸಲಾದ ವಿವರಗಳನ್ನು ಭರ್ತಿ ಮಾಡಿ, ಆನ್‌ಲೈನ್‌ನಲ್ಲೇ ನಿಗದಿತ ಶುಲ್ಕ ಪಾವತಿಸಬೇಕು. ನಂತರ ಯಾವುದೇ ಸ್ಥಳದಲ್ಲಿ ತಮ್ಮ ದಾಖಲೆಗಳನ್ನು ಪಡೆದುಕೊಳ್ಳಬಹುದು.

ಹಿಂದಿನ ಪ್ರಕ್ರಿಯೆ ಹೇಗಿತ್ತು?

ಪದವಿ ಪೂರೈಸಿದ ವಿದ್ಯಾರ್ಥಿಗಳು ಯಾವುದೇ ಉದ್ಯೋಗಕ್ಕೆ ಸೇರುವಾಗ ತಾವು ಪಡೆದ ಅಂಕಪಟ್ಟಿ, ಪದವಿ ಪ್ರಮಾಣ ನೈಜತೆ ದೃಢೀಕರಣವನ್ನು ನೀಡಬೇಕು. ಇಂತಹ ಸಮಯದಲ್ಲಿ ವಿದ್ಯಾರ್ಥಿಗಳು ನೈಜತೆ ಪರಿಶೀಲನೆಗಾಗಿ ಅರ್ಜಿ ಸಲ್ಲಿಸಿದ ನಂತರ ಸಂಬಂಧಪಟ್ಟ ದಾಖಲೆಗಳನ್ನು ಪರೀಕ್ಷಾ ವಿಭಾಗದಲ್ಲಿರುವ ದಾಖಲೆಗಳ ಜತೆ ತಾಳೆ ನೋಡಲಾಗುತ್ತಿತ್ತು. ಭೌತಿಕವಾಗಿ ಪರಿಶೀಲಿಸಿದ ನಂತರ ನೈಜತೆ ದೃಢೀಕರಣ ಪ್ರಮಾಣಪತ್ರ ನೀಡಲಾಗುತ್ತಿತ್ತು. ಈ ಪ್ರಕ್ರಿಯೆ ಮುಗಿಯುವುದಕ್ಕೆ 15ರಿಂದ 20 ದಿನಗಳು ಹಿಡಿಯುತ್ತಿತ್ತು.