ಜೀವಸಾರ್ಥಕತೆ ಪೋರ್ಟಲ್‍ನಲ್ಲಿ ನೇತ್ರದಾನಕ್ಕೆ ಅವಕಾಶ: ಡಾ.ಚಂದ್ರಶೇಖರ್ ಕಾಂಬ್ಳಿಮಠ್

ಈವರೆಗೆ ಜೀವಸಾರ್ಥಕತೆ ಪೋರ್ಟಲ್‍ನಲ್ಲಿ ಪಿತ್ತಜನಕಾಂಗ, ಮೂತ್ರಕೋಶ, ಹೃದಯ, ಮೇದೋಜೀರಕಗ್ರಂಥಿ, ಶ್ವಾಸಕೋಶ ಅಂಗಾಂಗ ದಾನ ಮಾಡಲು ಬಯಸುವವರು ನೋಂದಣಿ ಮಾಡಿಕೊಳ್ಳಲು ಅವಕಾಶ ಕಲ್ಪಿಸಲಾಗಿತ್ತು. ಈಗ ನೇತ್ರದಾನಕ್ಕೂ ಅವಕಾಶ ನೀಡಲಾಗಿದೆ.

ನಿಧನ ಹೊಂದಿದ ದಾನಿಯ ಅಂಗ ಕಸಿಗೆ ಸಮನ್ವಯತೆ ಸಾಧಿಸುವುದು ಇದರ ಉದ್ದೇಶ. ಜತೆಗೆ ಸಾರ್ವಜನಿಕರನ್ನು ಅಂಗಾಂಗ ದಾನಕ್ಕಾಗಿ ಸುಶಿಕ್ಷಿತರನ್ನಾಗಿ ಮಾಡುವ ಧ್ಯೇಯೋದ್ದೇಶ ಹೊಂದಲಾಗಿದೆ ಎಂದು ಕಾರ್ಯಕ್ರಮ ಅನುಷ್ಠಾನಾಧಿಕಾರಿ ಡಾ.ಚಂದ್ರಶೇಖರ್ ಕಾಂಬ್ಳಿಮಠ್ ತಿಳಿಸಿದ್ದಾರೆ.

ನೇತ್ರದಾನಕ್ಕೆ ಪೋರ್ಟಲ್‍ನಲ್ಲಿ ನೋಂದಾಯಿಸುವಾಗ ಹೆಸರು, ಮೂಲ ವಿವರ, ಭಾವಚಿತ್ರ ಮತ್ತು ಮೊಬೈಲ್ ಸಂಖ್ಯೆ ನಮೂದಿಸಬೇಕು. ನಂತರ ಒಟಿಪಿ ಬರಲಿದ್ದು, ಅದನ್ನು ನಮೂದಿಸಿ, ದಾನ ಮಾಡಲು ಇಚ್ಛಿಸುವ ಅಂಗಾಂಗದ ಮುಂಭಾಗ ಕಣ್ಣನ್ನು ಆಯ್ಕೆ ಮಾಡಬೇಕು. ನೋಂದಾಯಿಸಿದ ಮೊಬೈಲ್ ಸಂಖ್ಯೆಗೆ ದಾನಿಯ ಕಾರ್ಡ್ ಲಿಂಕ್ ಕಳುಹಿಸಲಾಗುವುದು. ನೇತ್ರದಾನ ನೋಂದಣಿ ಯಾವಾಗ, ಹೇಗೆ ಮಾಡಬೇಕು ಎಂಬ ವಿವರ ಕೂಡ ಪೋರ್ಟಲ್‌ನಲ್ಲಿ ವೀಕ್ಷಿಸಬಹುದು ಎಂದು ಮಾಹಿತಿ ನೀಡಿದರು.