ತಿಪಟೂರು: ಕ್ರೀಡಾಂಗಣದಲ್ಲಿ ಸೌಕರ್ಯ ಕೊರತೆ

ಹಲವು ದಶಕಗಳಿಂದ ಅಂತರರಾಷ್ಟ್ರೀಯ, ರಾಷ್ಟ್ರೀಯ ಮಟ್ಟದ ಕ್ರೀಡಾಪಟುಗಳನ್ನು ಕೊಡುಗೆಯಾಗಿ ನೀಡಿದ ಕೀರ್ತಿ ತಾಲ್ಲೂಕಿಗಿದೆ. ಆದರೆ ಈಗ ಕ್ರೀಡಾಪಟುಗಳು ವ್ಯವಸ್ಥಿತ ಅಭ್ಯಾಸಕ್ಕೆ ತೊಂದರೆ ಅನುಭವಿಸುತ್ತಿದ್ದಾರೆ.

ಆರು ಎಕರೆ ವಿಸ್ತೀರ್ಣವುಳ್ಳ ಕಲ್ಪತರು ಕ್ರೀಡಾಂಗಣದಲ್ಲಿ ನಿತ್ಯ ಬೆಳಿಗ್ಗೆ ಹಾಗೂ ಸಂಜೆ ಸಾವಿರಾರು ಜನರು ವಾಯುವಿಹಾರಕ್ಕೆ, ಕ್ರೀಡಾಭ್ಯಾಸಕ್ಕೆ ಬರುತ್ತಿದ್ದು ಇವರಿಗೆ ಸರಿಯಾದ ಟ್ರ್ಯಾಕ್‌ ವ್ಯವಸ್ಥೆ ಇಲ್ಲ.

ಮಳೆ ಬಂದಾಗ ಟ್ರ್ಯಾಕ್‌ ಮಧ್ಯೆ ನೀರು ನಿಲ್ಲುತ್ತಿದ್ದು, ತರಬೇತಿ ಪಡೆಯಲು ಸಾಧ್ಯವಾಗುತ್ತಿಲ್ಲ. ಟ್ರ್ಯಾಕ್‌ ಸುತ್ತ ಅಳವಡಿಸಿರುವ ಬಾಕ್ಸ್ ಚರಂಡಿಗಳು ಕಸ ಹಾಗೂ ಮಣ್ಣಿನಿಂದ ತುಂಬಿವೆ. ಮಳೆ ನೀರು ಅಲ್ಲಿಯೇ ಶೇಖರಣೆಯಾಗಿ ಹೋರ ಹೋಗಲು ಸರಿಯಾದ ಯುಜಿಡಿ ಸಂಪರ್ಕ ಇಲ್ಲದೆ ಟ್ರ್ಯಾಕ್‌ ಮಧ್ಯೆಯೇ ನಿಲ್ಲುತ್ತಿದೆ.

ಕ್ರೀಡಾಂಗಣದಲ್ಲಿನ ಫೇಡ್ ಲೈಟ್ ವ್ಯವಸ್ಥೆ ಅಸಮರ್ಪಕವಾಗಿದ್ದು ಮಿಂಚು ಹುಳುವಿನಂತೆ ಬೆಳಕು ಬೀರುತ್ತಿದೆ. ರಾತ್ರಿ ವಾಕಿಂಗ್ ಮಾಡುವ ಸಾರ್ವಜನಿಕರು ಕತ್ತಲೆಯಲ್ಲಿ ಕಾಲ ಕಳೆಯಬೇಕಿದೆ. ಕುಡುಕರ ಹಾವಳಿ ಹೆಚ್ಚಾಗಿ, ಅಲ್ಲಲ್ಲಿ ಮದ್ಯದ ಬಾಟಲಿಗಳು ಕಾಣ ಸಿಗುತ್ತವೆ.

ವಾರಕೊಮ್ಮೆಯಾದರೂ ಕ್ರೀಡಾಂಗಣದಲ್ಲಿ ಯಾವುದಾದರೂ ಕ್ರೀಡಾ ಚಟುವಟಿಕೆಗಳು ನಡೆಯುತ್ತಿರುತ್ತವೆ. ವೀಕ್ಷಕರು ಕುಳಿತುಕೊಳ್ಳುವ ಗ್ಯಾಲರಿ ಆಸನದ ಕಲ್ಲು ಕಳಚಿ ಬೀಳುತ್ತಿವೆ. ಕ್ರೀಡಾಂಗಣದ ಒಂದು ಭಾಗದಲ್ಲಿ ಮಾತ್ರ ವೀಕ್ಷಕರ ಗ್ಯಾಲರಿಗೆ ನೆರಳು ಹಾಗೂ ಮಳೆಯಿಂದ ಆಶ್ರಯ ಪಡೆಯಬಹುದು. ಉಳಿದ ಮುಕ್ಕಾಲು ಭಾಗದಲ್ಲಿ ಯಾವುದೇ ಚಾವಣಿ ಇಲ್ಲ.

ಕ್ರೀಡಾಂಗಣದಲ್ಲಿ ಅಭ್ಯಾಸ ಮಾಡವ ಕ್ರೀಡಾಪಟುಗಳಿಗೆ ಶುದ್ಧ ಕುಡಿಯುವ ನೀರಿನ ವ್ಯವಸ್ಥೆ ಇಲ್ಲ. ಶಾಲಾ– ಕಾಲೇಜುಗಳ ಶೈಕ್ಷಣಿಕ ಸಾಲಿನ ಕ್ರೀಡಾಕೂಟ ಆರಂಭವಾಗಿದೆ. ಕೆಸರು ಗದ್ದೆಯಂತಾಗಿರುವ ಓಟದ ಟ್ರ್ಯಾಕ್‌ನಲ್ಲಿಯೇ ಸ್ಪರ್ಧೆ ಆಯೋಜಿಸಿ ನೀರು ನಿಂತ ಜಾಗದಲ್ಲಿ ಬಿದ್ದು ಎದ್ದು ಸ್ವರ್ಧೆಯಲ್ಲಿ ಭಾಗವಹಿಸಬೇಕಾದ ಅನಿವಾರ್ಯವಿದೆ.