ಲಾಕ್‌ಡೌನ್ ಪರಿಣಾಮ ತುಮಕೂರು ಕೆಎಸ್‌ಆರ್‌ಟಿಸಿಗೆ ₹ 51 ಕೋಟಿ ನಷ್ಟ

ತುಮಕೂರು ಕೆಎಸ್‌ಆರ್‌ಟಿಸಿಗೆ ಕೊರೊನಾ ಪೂರ್ವದಲ್ಲಿ ದಿನಕ್ಕೆ ₹ 65ರಿಂದ 67 ಲಕ್ಷ ಆದಾಯ ಸಂಗ್ರಹವಾಗುತ್ತಿತ್ತು. ಈಗ ₹ 6 ಲಕ್ಷ ಸಂಗ್ರಹವಾಗುತ್ತಿದೆ. ಶೇ 10ರಷ್ಟು ಮಾತ್ರ ಗಳಿಕೆಯಾಗುತ್ತಿದೆ. ಬಸ್ ಓಡಾಟ, ಆದಾಯ ಗಳಿಗೆ ಹೀಗೆ ಶೇ 10ರಷ್ಟು ಮಾತ್ರ ಚಟುವಟಿಕೆಗಳು ಆರಂಭವಾಗಿವೆ. ಇದು ಸಂಸ್ಥೆಯ ಮೇಲೆ ಪರಿಣಾಮ ಬೀರುವುದು ಖಚಿತ.

ಲಾಕ್‌ಡೌನ್ ಪರಿಣಾಮ ಇಲ್ಲಿಯವರೆಗೆ ತುಮಕೂರು ಕೆಎಸ್‌ಆರ್‌ಟಿಸಿಗೆ ₹ 51 ಕೋಟಿ ನಷ್ಟವಾಗಿದೆ. ಕೇವಲ ಎರಡು ತಿಂಗಳಲ್ಲಿ ಇಷ್ಟು ಪ್ರಮಾಣದಲ್ಲಿ ಆದಾಯ ಕೋತಾ ಆಗಿದೆ ಅಂದರೆ ಅದು ಸಹಜವಾಗಿ ಸಂಸ್ಥೆಯ ಬೆಳವಣಿಗೆಗಳ ಮೇಲೂ ಪರಿಣಾಮ ಬೀರಲಿದೆ.

ತಾಲ್ಲೂಕು ಕೇಂದ್ರಗಳು ಸೇರಿದಂತೆ ಹೊರ ಜಿಲ್ಲೆಗಳಿಗೆ ನಿತ್ಯ ತುಮಕೂರಿನಿಂದ 130ರಿಂದ 150 ಬಸ್‌ಗಳು ಸಂಚರಿಸುತ್ತಿವೆ. ತುಮಕೂರಿನಿಂದ ಬೆಂಗಳೂರಿಗೆ ಜನರ ಓಡಾಟ ಹೆಚ್ಚಿದೆ. ಈ ಹಿನ್ನೆಲೆಯಲ್ಲಿ ನಿತ್ಯ 35ಕ್ಕೂ ಹೆಚ್ಚು ಬಸ್‌ಗಳು ಈ ಮಾರ್ಗದಲ್ಲಿ ಸಂಚರಿಸುತ್ತಿವೆ. ಉಳಿದಂತೆ ಶಿರಾ, ಪಾವಗಡ, ಮೈಸೂರು, ಚಿತ್ರದುರ್ಗ, ಹಾಸನ ಜಿಲ್ಲೆಗಳಿಗೆ ಬಸ್ ಓಡಾಟ ಹೆಚ್ಚಿದೆ ಎಂದು ವಿಭಾಗೀಯ ನಿಯಂತ್ರಣಾಧಿಕಾರಿ ಗಜೇಂದ್ರ ಕುಮಾರ್ ತಿಳಿಸಿದ್ದಾರೆ.