ತುಮಕೂರು: ಸೊಪ್ಪು ಮತ್ತಷ್ಟು ಅಗ್ಗ; ಬೀನ್ಸ್ ಏರಿಕೆ

ಅವರೆಕಾಯಿ ಸೀಸನ್ ಆರಂಭವಾಗಿದ್ದರೂ ದುಬಾರಿ ಬೆಲೆಯಿಂದಾಗಿ ಜನರು ಅದರ ರುಚಿ ನೋಡಲು ಸಾಧ್ಯವಾಗುತ್ತಿಲ್ಲ. ಕಳೆದ ವಾರ ಕೆ.ಜಿ ₹50– 60ಕ್ಕೆ ಮಾರಾಟವಾಗಿದ್ದರೆ, ಈ ವಾರ ₹40– 50ಕ್ಕೆ ಇಳಿದಿದೆ ಎಂಬುದೇ ಸಮಾಧಾನಕರ ಸಂಗತಿ. ಈ ಸಮಯದಲ್ಲಿ ಅವರೆಕಾಯಿಗೆ ಸಾಕಷ್ಟು ಬೇಡಿಕೆ ಕಂಡುಬರುತ್ತದೆ. ಜನರೂ ವಿವಿಧ ಬಗೆಯ ಅಡುಗೆ ತಯಾರಿಸಿ ಸವಿಯುತ್ತಾರೆ. ಬೆಲೆ ಏರಿಕೆಯಿಂದಾಗಿ ಜನಸಾಮಾನ್ಯರು ಬಳಸುವುದು ಕಷ್ಟಕರವಾಗಿದೆ. ಅವರೆಕಾಯಿ ಸೀಸನ್ ಆರಂಭವಾದರೆ ತರಕಾರಿ ಬಳಕೆ ಕಡಿಮೆಯಾಗಿ, ಬೆಲೆಯೂ ತೀವ್ರವಾಗಿ ಇಳಿಕೆಯಾಗುತಿತ್ತು.

ಕೊತ್ತಂಬರಿ ಸೊಪ್ಪು ಕೆ.ಜಿ ₹20, ಸಬ್ಬಕ್ಕಿ ಕೆ.ಜಿ ₹20, ಮೆಂತ್ಯ ಸೊಪ್ಪು ಕೆ.ಜಿ 30, ಪಾಲಕ್ ಸೊಪ್ಪು (ಕಟ್ಟು) ₹30ಕ್ಕೆ ಇಳಿಕೆಯಾಗಿದೆ. ಬೀನ್ಸ್ ಮತ್ತೆ ದುಬಾರಿಯಾಗಿದ್ದು, ಕೆ.ಜಿ ₹70–80ಕ್ಕೆ ಹೆಚ್ಚಳವಾಗಿದೆ. ಬೀಟ್ರೂಟ್ ಸಹ ಏರಿಕೆ ದಾಖಲಿಸಿದ್ದು, ಕೆ.ಜಿ ₹60–70ಕ್ಕೆ ಜಿಗಿದಿದೆ. ಟೊಮೆಟೊ ಬೆಲೆತೀವ್ರವಾಗಿ ಇಳಿಕೆಯಾಗಿದ್ದು, ಕೆ.ಜಿ ₹50–60ರಿಂದ ₹30–40ಕ್ಕೆ ಕುಸಿದಿದೆ. ಬದನೆಕಾಯಿ, ಎಲೆಕೋಸು, ಹಾಗಲಕಾಯಿ ಧಾರಣೆ ಇಳಿಕೆಯತ್ತ ಸಾಗಿದ್ದು, ನಿಂಬೆ ಹಣ್ಣು ಸ್ವಲ್ಪ ದುಬಾರಿಯಾಗಿದೆ.

ದಾಳಿಂಬೆ ದುಬಾರಿ: ಸೇಬಿನ ಬೆಲೆ ಯಥಾಸ್ಥಿತಿ ಕಾಯ್ದುಕೊಂಡಿದ್ದರೆ, ದಾಳಿಂಬೆ ದುಬಾರಿಯಾಗಿದೆ. ಪೈನಾ
ಪಲ್ ಸಹ ಹೆಚ್ಚಳವಾಗಿದೆ. ಕಲ್ಲಂಗಡಿ, ಕರಬೂಜ ಧಾರಣೆ ಅಲ್ಪ ಮಟ್ಟದಲ್ಲಿ ತಗ್ಗಿದೆ. ಉಳಿದಂತೆ ಇತರೆ ಹಣ್ಣುಗಳ ಬೆಲೆಯಲ್ಲಿ ಹೆಚ್ಚಿನ ವ್ಯತ್ಯಾಸವಾಗಿಲ್ಲ.

ಧಾನ್ಯ ಏರಿಳಿತ: ಅಲಸಂದೆ ಕೆ.ಜಿ ₹100ಕ್ಕೆ ತಲು‍ಪಿದ್ದರೆ, ಅವರೆಕಾಳು ಬೆಲೆ ಕೊಂಚ ಇಳಿಕೆಯಾಗಿದೆ. ಉದ್ದಿನ ಬೇಳೆ ಕೆ.ಜಿ ₹10, ಹೆಸರು ಕಾಳು, ಕಡಲೆ ಬೀಜ ಸ್ವಲ್ಪ ಮಟ್ಟಿಗೆ ದುಬಾರಿಯಾಗಿದೆ. ಅಡುಗೆ ಎಣ್ಣೆಯಲ್ಲಿ ಸನ್‌ ಫ್ಲವರ್ ಕೆ.ಜಿ ₹130– 132ಕ್ಕೆ, ಪಾಮಾಯಿಲ್ ಕೆ.ಜಿ ₹115– 118ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಮಾರಾಟ ಮಾಡಲಾಗುತ್ತಿದೆ.

ಕೋಳಿ ಯಥಾಸ್ಥಿತಿ: ಹೊಸ ವರ್ಷಾಚರಣೆ ಸಮಯದಲ್ಲಿ ದುಬಾರಿಯಾಗಿದ್ದ ಕೋಳಿ ಬೆಲೆ ನಂತರ ಯಥಾಸ್ಥಿತಿ ಕಾಯ್ದುಕೊಂಡಿದೆ. ಬ್ರಾಯ್ಲರ್ಕೋಳಿ ಕೆ.ಜಿ ₹150ಕ್ಕೆ, ರೆಡಿ ಚಿಕನ್ ₹220ಕ್ಕೆ ಮಾರಾಟವಾಗುತ್ತಿದೆ. ಮೊಟ್ಟೆ ಕೋಳಿ ಬೆಲೆ ಕೆ.ಜಿ ₹135ರಲ್ಲೇ ಮುಂದುವರೆದಿದೆ.

ಸೀಗಡಿ ದುಬಾರಿ: ಈ ವಾರ ಸೀಗಡಿ ಬೆಲೆ ತಿವ್ರವಾಗಿ ಹೆಚ್ಚಳ ಕಂಡಿದ್ದು, ಕೆ.ಜಿ ₹720ಕ್ಕೆ ತಲುಪಿದೆ. ಮಾರುಕಟ್ಟೆಗೆ ಸೀಗಡಿ ಬರುವುದು ಕಡಿಮೆಯಾಗಿದ್ದು, ಬೆಲೆ ಏರಿಕೆ ಕಾರಣ ಎಂದು ನಗರದ ಮತ್ಸ್ಯದರ್ಶಿನಿಯ ಮೂಲಗಳು ತಿಳಿಸಿವೆ.

ಬಂಗುಡೆ ಧಾರಣೆ ಇಳಿಕೆಯಾಗಿದ್ದು, ಕೆ.ಜಿ ₹210ಕ್ಕೆ, ಬೂತಾಯಿ ಕೆ.ಜಿ.ಗೆ ₹70 ಏರಿಕೆಯಾಗಿ, ₹200ಕ್ಕೆ ಹೆಚ್ಚಳವಾಗಿದೆ. ಅಂಜಲ್ ಕೆ.ಜಿ ₹680, ಕಪ್ಪು ಮಾಂಜಿ ಕೆ.ಜಿ ₹780ಕ್ಕೆ ಇಳಿಕೆಯಾಗಿದೆ.